Engulu mbuya eyahandikawa na Matayo 9:1-38
9 Neryo Yesu mwingira omo bwato, amasokera eyisirya w’engetse n’eriya omo muyi w’ewabo.
2 Neryo mubamuletera omundu oyubasireko ebitsuko iniane oko ngyingo. Yesu abere abilangira obwikirirya bwabo, mwabwira omulume oyubasireko ebitsuko oyo ati: “Mwana waghe, usikaye omutima; ebibi byaghu byamaghanyirwa!”
3 Abakangirirya b’Emighambo balebe mubabwirana bati: “Omulume oyu akatsuma oMungu.”
4 Kundi Yesu abya inianasi ebyo bakalengekanaya omo mitima yabo, mwabugha ati: “Kundiki mukalengekanaya emyatsi mibi omo mitima yenyu kwehi?
5 Eribugha niti, ‘Ebibi byaghu byamaghanyirwa’ kutse eribugha nyiti ‘Hangana ughende,’ ekyolobire oko kindi kye kyahi?
6 Nikwa nyanzire imwaminya ngoko Omughala w’omundu awite oko kihugho kw’ehamuli y’erighanyira amalolo.” Neryo Yesu mwabwira omulume oyubasireko ebitsuko oyo, ati: “Hangana uheke engyingo yaghu ughende eka.”
7 Neryo omulume oyo mwahangana, mwasuba eka.
8 Abandu babere balangira eki, mubasweka kutsibu kandi mubapipa oMungu oyo waha abandu b’ehamuli eyiri ng’eyi.
9 Omughulu Yesu abya akaluaho, mwalangira omulume oyukahulawa mo Matayo, inianikere aho bakalihira ebitasi.* Neryo mwamubwira ati: “Unikwame.” Neryo mwahangana n’erimukwama.
10 Enyuma syaho, Yesu inianemulya akalyo omo nyumba, abalihisya b’ebitasi* bangyi n’abakola-nabi mubasa bamalya haghuma naye n’abigha biwe.
11 Nikwa Abafarisayo babere balangira omwatsi oyo, mubabulya abigha biwe bati: “Busanaki omukangirirya wenyu akalya haghuma n’abakalihisaya ebitasi* n’abakola-nabi kwe?”
12 Abere abyowa ekyo bakabugha, mwabugha ati: “Abatalwere sibalilagha oko munganga, nikwa abalwere bo bakamulaghako.
13 Neryo mughende muyighe ebinywa bino ebiri omo Masako nga bikasonda eribugha bitiki: ‘Ekyo nyanzire abandu ibakola, ry’eribya bakakwira abandi b’obulighe omo mwanya w’eriniletera obuhere.’ Kusangwa mundasa erisyabirikira abatunganene, nikwa nasa erisyabirikira abakola-nabi.”
14 Neryo abigha ba Yohana mubasa eyiri Yesu, bamamubulya bati: “Busanaki itwe haghuma n’Abafarisayo tukakola amafungo, aliwe abigha baghu sibekola batya?”
15 Neryo Yesu mwabasubirya ati: “Abira b’iba w’omulunga* banganabya omo bulighe, ibane n’omulunga oyo kwehi? Aliwe omughulu akendisyahika iba w’omulunga iniabya isyakiri haghuma nabo;* neryo oko mughulu oyo bakendisyakola amafungo.
16 Sihali omundu oyo wangasonera ekibandiko ky’olukimba* luhya-luhya oko lukimba lwa kera. Kusangwa ekibandiko ky’olukimba luhya-luhya ikikenditula olukimba, nalo ilukenditulika kutsibu kulenga ngoko lulue.
17 Kandi abandu sibalibika edivai nyihya-nyihya omo bindu by’engobi ebya kera. Bamabibika y’omo, ebindu by’engobi ebyo ibikenditulika, n’edivai iyutikira ahisi. Kandi ebindu by’engobi ebyo ibikenditsanda kutsibu. Nikwa abandu bakabika edivai nyihya-nyihya omo bindu by’engobi bihya-bihya; neryo edivai n’ebindu by’engobi isibyenditsanda.”
18 Yesu abere anemubakanirya emyatsi eyi, omutabali mughuma oyo wabya iniamabihikaho, munama embere siwe n’eribugha ati: “Oko ndambi eno, mwali waghe anganabya iniamabihola. Kisi, wase umuhireko ebyala byaghu, naye akendisuba.”
19 Yesu mwahangana; neryo iye haghuma n’abigha biwe bamakwama omutabali oyo.
20 Neryo omukali oyo wabya iniamabibugha emyaka 12 inianakwire obukoni bw’eriluako omusasi mwasira enyuma sya Yesu n’eritula oko musike w’olukimba* lwiwe.
21 Kusangwa omukali oyo abya inianemuyibwira omo mutima ati: “Namabitatula n’oko lukimba* lwiwe lisa, inamalama.”
22 Yesu mwabinduka, amamulangira. Neryo mwabugha ati: “Mwali waghe, utulere. Obwikirirya bwaghu bwamabikulamya.” Omukali oyo mwalw’inyalama oko ndambi eyo.
23 Omughulu Yesu ingira omo nyumba y’omutabali oyo, n’erilangira abandu abakabuha esyonyabulere, n’abandu bangyi abakabughaya olukanda,
24 mwabugha ati: “Museghere; kusangwa omumbesa oyu syaholire, aliwe aghotsere.” Abandu babere babyowa ebinywa ebyo, mubamusekererya.
25 Neryo abandu babere babihulukira ehihya, Yesu mwingira omo nyumba, n’erihamba oko byala by’omusika oyo. Neryo omusika mwahangana.
26 Engulu y’omwatsi oyu muyayitwala omo kiharo kyosi ekyo.
27 Omughulu Yesu abya akaluayo abalume babiri esyondime-time mubamukwama ibanemubirikira bati: “Mughala wa Daudi, utuwatikaye.”*
28 Yesu abere abingira omo nyumba, abalume abo mubahika aho ali. Neryo Yesu mwababulya ati: “Munikirirye ngoko nanganatoka eribalamya?” Nabo mubamusubirya bati: “Inga, Mukama!”
29 Neryo Yesu mwatula oko meso wabo inianemubugha ati: “Busana n’obwikirirya bwenyu, ameso wenyu alibukale.”
30 Neryo mubatsuka erilangira. Kandi Yesu mwabakongomerera ati: “Isimwakaniraya omwatsi oyu w’omundu wosi-wosi.”
31 Nikwa babere babihuluka, mubakania oko Yesu omo kiharo kyosi ekyo.
32 Babere bakaluaho, abandu mubaletera Yesu y’emumu.* Kandi omundu oyo abyako embinga.
33 Embinga eyo yabere yabihiwa, omundu oyo mwatsuka eribugha. Abandu mubasweka kutsibu, n’eribugha bati: “Omwatsi owali ng’oyu syalyatalolwako omo Israeli.”
34 Nikwa Abafarisayo mubabugha bati: “Akahigha esyombinga omo butoki bw’omutabali w’esyombinga.”
35 Neryo Yesu mwatimba omo miyi n’omo milongo yosi. Abya akakangirirya omo syosinagogi* syabo n’eritula engulu mbuya y’Obwami. Kandi abya akalamya emihanda yosi y’esyondwala n’amakoni.
36 Abere abilangira ebikumula by’abandu, mwabakwira obulighe; kusangwa babya bakaghalibwa n’erighuswa ng’esyombuli esitawite mulisya.
37 Neryo mwabugha n’abigha biwe ati: “Eby’erighesa ni bingyi, nikwa, abahingyi ni bake.”
38 Busana n’ekyo musabe Omukama w’erighesa, atume abahingyi omw’ighesa liwe.
Amaelezo awehikwa
^ Kutse “omusolo.”
^ Kutse “abasolesya.”
^ Kutse “abasolesya.”
^ Kutse “iba w’omuheruki.”
^ Kutse “inyalusibwa okw’ibo.”
^ Kutse “olukimba lw’eryambalira oko lundi.”
^ Kutse “olukimba lw’eryambalira oko lundi.”
^ Kutse “olukimba lw’eryambalira oko lundi.”
^ Kinywa kwa kinywa, “utukwire obulighe.”
^ Kutse “omundu oyutebugha.”
^ Kutse “amanyumba wabo w’eriramiryamo.”
