Nehemia 1:1-11
1 Ebinywa bya Nehemia* mughala wa Hakalia: Neryo oko mwisi we Kislevi,* omo mwaka we 20, nabya omo nyumba y’omwami* e Shushani.*
2 Oko mughulu oyo, Hanani omughuma w’oko baghala betu, mwahika akalua e Yuda haghuma n’abandi balume. Munabulyabo oko syongulu sy’abakisiya oko Bayahudi abalua omo bunyewa, n’oko syongulu esilebirye e Yerusalema.
3 Mubasubirya bati: “Abakisiya omo ngabiro* ab’oko ababala oko bunyewa bali omo mibere eyikita obulighe, kandi eyikit’isoni. Esyombimbo sye Yerusalema syabirisambukala, n’esyongyo syayo syabirihisibwa omo muliro.”
4 Nabere nabinowa ebinywa ebyo, munikala ahisi namatsuka erilira, n’eribya omo bulighe omo biro bingyi, kandi munayitsinga erikola amafungo n’erisaba embere sy’oMungu w’elubula.
5 Munabugha niti: “Kisi, Yehova Mungu w’elubula, oMungu mukulu n’oyutolere eryubahwa, oyukabereraya endaghane yiwe n’erikangya olwanzo oluteleghula oko bosi abamwanzire n’abakakwama ebihano biwe,
6 kisi, uteghe okutu, n’ameso waghu anitungerere, wowe omusabe w’omughombe waghu ogho ngakusaba munabwire omo musibo n’omo kiro owalebirye abaghombe baghu Abaisraeli ininemughungama amalolo agho abandu baghu Abaisraeli babirikukolera; twabirikola erilolo, ingye n’ekitunga kya tata waghe.
7 Twabiriyitsandya n’erikukosera kutsibu omw’itendikwama ebihano byaghu, ebyalayiro byaghu, n’amahamulo waghu, ebyo waha omughombe waghu Musa.
8 “Kisi, wibuke ekinywa ekyo wahana* omughombe waghu ye Musa uti: ‘Mwamabiyighendya kitya-kitya, ingendisyabapanza-panzira omo bihanda.
9 Nikwa mwamabisuba eyo niri n’erikwama ebihano byaghe n’erisikyabyo, abandu baghu abapanza-panzawa, nomo bangabya ibabirihika oko nduli y’ekyanya, ingendisyabakuma-kuma erilua eyo, n’eriletabo omo mwanya ogho nabirisombola niti ho hakendisyikala erina ryaghe.’
10 Ni baghombe baghu n’abandu baghu, abo wakombola omo butoki bwaghu bunene n’omo byala byaghu by’amaka.
11 Kisi Yehova, uteghe okutu oko musabe w’omughombe waghu, n’oko musabe w’abaghombe baghu abanzire eryubaha erina ryaghu, kandi kisi, utokesaye omughombe waghu munabwire, kandi ngakusaba omulume oyu anikanganaye olukogho.”
Oko mughulu oyo nabya mutengyi w’omwami.
Amaelezo awehikwa
^ Likamaanisaya “Akakiranaya.”
^ Ulebaye Endomeko B15.
^ Kutse “ekikali; ahakongotere.”
^ Kutse “Susa.”
^ Kutse “ekiharo ky’obutabali.”
^ Kutse “erikunga eryo waha.”
