Nehemia 12:1-47
12 Abahereri n’abalawi abahetuka haghuma na Zerubabeli mughala wa Salatieli na Yeshua ba bano: Seraya, Yeremia, Ezra,
2 Amaria, Maluku, Hatusi,
3 Shekania, Rehumu, Meromoti,
4 Ido, Ginetoi, Abiya,
5 Miyamini, Madia, Bilga,
6 Shemaya, Yoyaribu, Yedaya,
7 Salu, Amoki, Hilkia, na Yedaya. Aba babya bakulu b’abahereri n’abaghala babo omo biro bya Yeshua.
8 Abahereri babya Yesua, Binui, Kadmieli, Sherebia, Yuda, na Mataniya, oyo wabya akasondola esyonyimbo sy’ewasingya haghuma n’abaghala babo.
9 Na Bakbukia na Uni abaghala babo, babya bakimana ibanasamalirene nabo busana n’emibiiri y’obuteya.*
10 Yesua mwabuta Yoyakimu, na Yoyakimu mwabuta Eliashibu, na Eliashibu mwabuta Yoyada,
11 na Yoyada mwabuta Yonatani, na Yonatani mwabuta Yadua.
12 Ababya bahereri omo biro bya Yoyakimu abakulu b’ebitunga by’abotatakulu b’aba: ow’ekitunga kya Seraya, Meraya, ow’ekitunga kya Yeremia, Hanania.
13 ow’ekitunga kya Ezra, Mesulamu, ow’ekitunga kya Amaria Yehohanani;
14 ow’ekitunga kya Maluki, Yonatani; ow’ekitunga kya Shebania, Yozefu;
15 ow’ekitunga kya Harimu, Adna; ow’ekitunga kya Merayoti, Helkayi;
16 ow’ekitunga kya Ido, Zekaria; ow’ekitunga kya Ginetoni, Mesulamu;
17 ow’ekitunga kya Abiya, Zikri; ow’ekitunga kya Miniamini, ...;* ow’ekitunga kya Moadia, Piltai;
18 ow’ekitunga kya Bilga, Shamua; ow’ekitunga kya Shemaya, Yehonatana;
19 ow’ekitunga kya Yoyaribu, Matenai; ow’ekitunga kya Yedaya, Uzi;
20 ow’ekitunga kya Salai, Kalayi; ow’ekitunga kya Amoki, Eberi;
21 ow’ekitunga kya Hilkia, Hashabia; ow’ekitunga kya Yedaya, Netanali.
22 Abakulu b’ebitunga by’abotatakulu by’Abalawi omo biro bya Eliashibu, Yoyada, Yohanani, na Yadua mubahandikwa, kutya n’abahereri erihika oko butabali bwa Dario Omupersia.
23 Abalawi ababya bakulu b’ebitunga by’abotatakulu mubahandikwa omo kitabu ky’emyatsi y’emighulu erihika oko biro bya Yohanani mughala wa Eliashibu.
24 Abakulu b’Abalawi babya Hashabia, Sherebia na Yesua mughala wa Kadmieli, n’abaghala babo babya bakahangana eyisirya kubo eripipa n’eriha ewasingya erikwamana n’emiteghekerere ya Daudi omughombe w’oMungu w’ekwenene, ekikuto ky’abateya aho lutambi oko kindi kikuto ky’abateya.
25 Mataniya, Bakbukiya, Obadia, Mesulamu, Talmoni, na Akubu, ini bateya b’esyongyo ababya bakakola omubiiri w’obuteya. Babya bakateya ebyumba by’eribikamo ebyabya hakuhi n’emilango y’ehekalu.
26 Aba mubakola omubiiri omo biro bya Yoyakimu mughala wa Yeshua mughala wa Yozadaki n’omo biro bya Nehemia omuguvernere na Ezra omuhereri kandi omuhandiki.*
27 Omughulu w’eriherera esyombimbo sye Yerusalema oko Mungu, mubasondya Abalawi, bamaletabo e Yerusalema erilua ehosi eyo babya bikere erikola ekiro kikulu ky’eriherera esyombimbo ibanatsemire, ibanemwimba n’eriha ewasingya omo masengo,* omo byombo by’eriwatamo omuzike ebiriko esyokamba, n’esyonanga.*
28 N’abaghala b’abimbi mubahindana haghuma erilua omo kiharo* kye Yordani, erilua omo biharo byosi ebitimbire oko Yerusalema, erilua omo miyi y’Abanetofa,
29 erilua e Bete-gilgali n’erilua omo malima we Geba, ne Asimaweti. Kusangwa abimbi babya ibabiriyihimbira ehiyi eritimba oko Yerusalema.
30 N’abahereri n’Abalawi mubayerya, bamerya n’abandu, esyongyo, n’oluhimbo.
31 Neryo munaleta abatabali be Yuda namahetukiryabo oko luhimbo. Kandi munahiraho emilondo ibiri* y’abimbi b’esyonyimbo sy’ewasingya, n’abandu abakwamiresyo. Omulondo mughuma mwalaba oko luhande lw’amali lw’oluhimbo erilolera oko Lukyo lw’Ebilundo by’Eribu.
32 Hosaya n’enusu y’abatabali be Yuda, mubakwambo enyuma,
33 haghuma na Azaria, Ezra, Mesulamu,
34 Yuda, Benyamini, Shemaya, na Yeremia.
35 Haghuma nabo, habya abaghuma b’oko baghala b’abahereri ibanawite oko syongunga: Zekaria mughala wa Yonatana mughala wa Shemaya mughala wa Mataniya mughala wa Mikaya mughala wa Zakuri mughala wa Asafu,
36 haghuma n’abaghala babo ye Shemaya, Azareli, Milalai, Gilalai, Maai, Netaneli, Yuda, na Hanani. Babya n’ebyombo by’omuziki bya Daudi omughombe w’oMungu w’ekwenene. Na Ezra omuhandiki* mwaghenda embere syabo.
37 Oko Lukyo lw’Ekitehero, mubaghenda butakita erihika oko bisambiro ebikerukira oko Muyi wa Daudi erilaba omo keruka akerukire oko luhimbo endata oko nyumba ya Daudi erihika oko Lukyo lw’Amaghetse oko luhande lw’eyo eryuba rikasira.
38 Oghundi mulondo w’abimbi* ababya bakimba esyonyimbo sy’ewasingya, mwaghenda oko lundi luhande,* naghe munakwamagho n’enusu y’abandu. Mutwalaba oko luhimbo, endata oko Nyumba Nyiri-nyiri y’Ameko erihika oko Oluhimbo Olughalihire,
39 n’erihetuka erihika oko Lukyo lwa Efraimu n’oko Lukyo lw’Omuyi wa Kera n’oko Lukyo lw’Amahere, oko Nyumba Nyiri-nyiri ya Hananeli, oko Nyumba Nyiri-nyiri ya Mea, n’oko Lukyo lw’Esyombuli; neryo mubasa bamimana oko Lukyo lw’Omuteya.
40 Oko nduli emilondo* eyabya ikimba esyonyimbo sy’ewasingya muyimana embere w’enyumba y’oMungu w’ekwenene; naghe kutya haghuma n’abatabali bake-bake,
41 n’abahereri ye Eliakimu, Maaseya, Miniamini, Mikaya, Eliyoenai, Zekaria, na Hanania ibanawite oko syongunga,
42 na Maaseya, Shemaya, Eleazari, Uzi, Yehohanani, Malkiya, Elamu, na Ezeri. Abimbi mubimba omo mulenge muli. Izirahia yo wabya akasondolabo.
43 Ekiro ekyo mubaherera amahere manene, kandi mubatsema, kusangwa oMungu w’ekwenene mwaleka ibabya n’obutseme bunene kutsibu. Abakali mubatsema, n’abana kutya, erihika oko kika obogho b’obutseme obwabya e Yerusalema bwamowika hali.
44 Ekiro ekyo abalume mubasombolwa erimanira esyodepo* sy’eribikamo ebihembo, eby’erimbere ebikatsuka eryera, n’ekighuma ky’omw’ikumi. Erikwamana n’Emighambo, babya batolere erikuma-kumira omo madepo ayo ebihembo by’Abalawi n’abahereri, ebyo bakakuma-kuma erilua omo malima w’emiyi. Kusangwa e Yuda yabya obutseme bunene, busana n’Abahereri n’Abalawi ababya bakakola omubiiri.
45 Neryo mubatsuka erikola emibiiri y’oMungu wabo n’emibiiri y’eriyerya eyo babya basabirwe erikola ngoko abimbi n’abateya b’esyongyo banabya bakakola erikwamana n’emiteghekerere ya Daudi n’eyo mughala wiwe ye Solomona.
46 Kusangwa kera omo biro bya Daudi na Asafu, habya abasondoli* b’abimbi n’ab’esyonyimbo sy’eripipa n’esy’eriha oMungu y’ewasingya.
47 N’omo biro bya Zerubabeli n’omo biro bya Nehemia, Abaisraeli bosi mubaha abimbi n’abateya b’esyongyo b’amaghabo erikwamana n’obwagha bw’obuli kiro. Kandi mubahighula erighabo busana n’Abalawi, n’Abalawi mubahighula erighabo busana n’abana ba Haruni.
Amaelezo awehikwa
^ Kutse alinga, “omubiiri w’eriramya.”
^ Amasako w’Ekiebrania alinga mwatahandika erina lya hano.
^ Kutse “omusakangyi.”
^ Kutse “esyosembale.”
^ Kutse “edungu.”
^ Ni bugha ambu, ebiharo ebitimbire oko Yordani.
^ Kutse “esyokwaya ibiri; esyokorale ibiri.”
^ Kutse “omusakangyi.”
^ Kutse “ekwaya; ekorale.”
^ Kutse “embere.”
^ Kutse “esyokwaya; esyokorale.”
^ Kutse “ebighona.”
^ Kinywa kwa kinywa, “abakulu.”
