Nehemia 13:1-31
13 Oko kiro ekyo, ekitabu kya Musa mukyasomwa abandu bosi ibanowire. Mubabanamo omulondo owabughire ati Omuamoni kutse Omumoabu isyanatingira omo ndeko y’oMungu w’ekwenene ekiro n’ekighuma.
2 Kusangwa mubatayahindana n’Abaisraeli erileterabo omukati n’amaghetse; aliwe omo mwanya w’ekyo, mubaliha Balamu bati ase atakirebo. Nikwa oMungu wetu mwabindula eritakira eryo lyamabya miyisa.
3 Babere bowa omughambo oyo, mubatsuka erisolola omo Baisraeli mw’abosi abate Baisraeli.*
4 Embere w’aho, omuhereri oyo wabya akimanira ebyumba by’eribikamo* by’enyumba* y’oMungu wetu, abya Eliashibu, omutunga wa Tobia.
5 Abya iniabirimuha ekyumba kinene ky’eribikamo* ekyabya kikahirwamo kera obuhere bw’eyisyano, obubani, n’ebindu n’ekighuma ky’omw’ikumi* ky’eyisyano, edivai nyihya-nyihya, n’amaghuta; ebyabya by’Abalawi, Abimbi, n’abateya b’esyongyo, haghuma n’ebihembo by’abahereri.
6 Omughulu wosi oyo, sinabya e Yerusalema, kusangwa munaya eyiri omwami omo mwaka wa 32 w’omwami Artashasta we Babiloni; n’enyuma sy’omughulu mulebe, munasaba omwami y’ekonze.
7 Neryo munasa e Yerusalema namalangira omwatsi mubi ogho Eliashibu abya iniabirikolera Tobia, akamulighira ekyumba ky’eribikamo omo butala bw’enyumba y’oMungu w’ekwenene.
8 Omwatsi oyu mwanihitania kutsibu. Neryo ebindu byosi bya Tobia ebyabya omo kyumba ky’eribikamo,* munaghusangabyo ehihya.
9 Enyuma sy’aho, munahamula, bamabirya ebyumba by’eribikamo;* neryo munatasyasubyamo ebindu by’enyumba y’oMungu w’ekwenene haghuma n’obuhere bw’eyisyano n’obubani.
10 Kandi munafumbula ngoko Abalawi sibabya bakahabwa amaghabo wabo, neryo Abalawi n’abimbi ababya bakakola omubiiri mubayighendera, obuli mundu omo lirima liwe.
11 Neryo munakaramira abatabali niti: “Ekyalekire enyumba y’oMungu iyalekeranibwa yitya niki?” Neryo munahindaniabo haghuma n’erisubya obuli mundu oko mubiiri wiwe.
12 Abandu bosi be Yuda mubaleta omo byumba by’eribikamo, ekighuma ky’omw’ikumi ky’esyonguma, edivai nyihya-nyihya, n’amaghuta.
13 Neryo munahiraho Shelemia omuhereri, Zadoki omuhandiki, na Pedaya ow’oko Balawi mo bahanganiri b’ebyumba by’eribikamo. Na Hanani mughala wa Zakuri mughala wa Matania abya muwatikya wabo. Kusangwa abalume aba babya b’eriyiketerwa. Omubiiri wabo abya erighabira abaghala babo.
14 Kisi Mungu waghe, unyibuke busana n’eki, kandi isiwibirirawa emibiiri yaghe y’olwanzo oluteleghula eyo nabirikola busana n’enyumba y’oMungu waghe n’emibiiri eyikakolekamo.*
15 Omo biro ebyo, munalangira e Yuda abandu ibanemukamira edivai omo bikamiro omo kiro ky’Esabato, ibanemuleta e Yerusalema emighanda y’engano n’erihirayo oko syopunda, n’erileta edivai, emizabibu, esyotini, n’emihanda yosi y’emiheke omo kiro ky’Esabato. Neryo munahayirabo busana n’eribya bakaghulya ebindu omo kiro ekyo.*
16 N’abandu be Tiro ababya bikere omo muyi, ibakaletamo esyosamaki n’emihanda yosi y’ebindu by’erighulya, ibaghulyabo abandu be Yuda ne Yerusalema omo kiro ky’Esabato.
17 Neryo munatsumanga abakulu be Yuda niti: “Omwatsi mubi ogho mukakola oyu ni mwatsiki, nibya mukatsandaya n’ekiro ky’Esabato tami!
18 Eki, si kyo abotata-kulu wenyu bakola, ekyaleka oMungu wetu iniatuletako obuhanya bosi obu n’eriletabo oko muyi oyu? Neryo lino munemwongera erihitana erikaghulumira oko Israeli mukatsandya Esabato.”
19 Neryo omughulu omwirimya atsuka eriwa ahisi oko syongyo sye Yerusalema, embere Esabato ihike, munabugha niti emilango ikingawe. Kandi munabugha niti isiyakingulawa Esabato ite yahwa. Kandi munahira abaghuma b’oko baghombe baghe oko syongyo; emisiko isiyingira omo muyi omo kiro ky’Esabato.
20 Neryo abatundi n’abakaghulaya emihanda yosi y’ebindu by’erighulya mubaghotsera ehihya we Yerusalema kaghuma kutse kabiri.
21 Neryo munahayirabo niti: “Mwabere mukaghotsera ehihya w’oluhimbo omo kiro busanaki? Mwamabitasyakola mutya eryo ingabapepaya.” Eritsuka ekiro ekyo mubaleka eribya bakasa omo kiro ky’Esabato.
22 Kandi munabwira Abalawi niti mughulu wosi babye bakayerya, kandi babye bakasa eriteya esyongyo, ekiro ky’Esabato kibye ikinabuyirire. Mungu waghe unyibuke busana n’eki nakyo. Kandi unikanganaye obughanyiri erikwamana n’olwanzo lwaghu lunene oluteleghula.
23 Omo biro ebyo, kandi munalangira Abayahudi ababya ibabiritahya* abakali Abaashdodi, Abaamoni, n’Abamoabu.
24 Enusu y’oko bana babo babya bakabugha Ekiashdodi, n’eyindi nusu ibakabugha emibughe y’ebihanda mbiriri-mbiriri; nikwa sihabya n’omughuma wa kubo oyo wabya asi eribugha omubughe w’Abayahudi.
25 Neryo munahayirabo, namatakirabo, n’erihunza abaghuma b’oko balume babo n’erikura esyonzwiri syabo. Kandi munalapisyabo omo rina ly’oMungu niti: “Isimwaha abana benyu b’obukali b’abana babo b’obulume kutse isimwatahiraya abana benyu b’obulume kutse eriyitahirya inywibene-bene omwana wabo wasi-wosi w’obukali.
26 Emyatsi eyi yo italeka Omwami Solomona we Israeli iniahalya kwehi? Omo bihanda bingyi sihabya omwami oyuli nga ye. Kandi oMungu wiwe abya amwanzire; neryo mwamuyira mo mwami oko Israeli yosi. Nikwa abakali b’ebindi bihanda mubaleka iniahalya.
27 Simulangire ngoko oyu ni mwatsi owakaswekaya busana nenyu, mukakola ekibi kingana n’eki n’erileghula oko Mungu wetu n’eritahya abakali b’ebindi bihanda?”
28 Omughuma w’oko baghala ba Yoyada mughala wa Eliashibu, omuhereri mukulu, abya iniabiribya mukwe wa Sanbalati Omuhoroni. Neryo munamuhigha embere syaghe.
29 Mungu waghe wibukebo, kusangwa babiritsandya obuhereri n’endaghane y’obuhereri n’ey’Abalawi.
30 Kandi muneryabo oko butsandirya bwosi bw’ebindi bihanda n’erihira Abalawi n’abahereri oko mibiiri, obuli mundu oko mubiiri wiwe,
31 n’erihiraho emipango y’erileta esyongwi oko mighulu eyahirawaho na busana n’eby’erimbere ebikatsuka eryera.
Kisi Mungu waghe, unyibuke,* kandi unitsumule.
Amaelezo awehikwa
^ Kutse “ab’emisasi ibiri.”
^ Kutse “enyumba y’eriliramo.”
^ Kutse “ehekalu.”
^ Kutse “ekyumba ky’eriliramo.”
^ Kutse “moya ya kumi.”
^ Kutse “ekyumba ky’eriliramo.”
^ Kutse “ebyumba by’eriliramo.”
^ Kutse “obuteya bwayo.”
^ Kutse alinga, “munahayirabo niti isibabya bakaghulya ebindu omo kiro ekyo.”
^ Kutse “ababya ibabirileta omo manyumba wabo.”
^ Kutse “busana n’ebibuya.”
