Nehemia 2:1-20
2 Oko mwisi we Nisani,* oko mwaka we 20 w’Omwami Artashasta, edivai yabya iyine embere siwe. Neryo ngoko nanabya nibeghere erikola, munimya edivai namaleterayo omwami. Aliwe nabya isindinatalangirika n’obulighe embere siwe.
2 Neryo omwami mwanibulya ati: “Busanaki wabiribya omo bulighe, kandi isighulwere? Alinga omo mutima waghu muli obulighe.” Munabya nabyowa eki, munubaha kutsibu.
3 Neryo munasubirya omwami niti: “Omwami akote! Nangatoka niti eritendibya omo bulighe, omuyi eyo abotata-kulu waghe batere ini bisambukalirya n’esyongyo syagho isyabiritimibwa omo muliro?”
4 Neryo omwami mwanibulya ati: “Wanzire iwakolerwaki?” Aho n’aho munalw’inasaba oMungu w’elubula.
5 Neryo munabwira omwami niti: “Kyamatsemesya omwami, n’omughombe waghu amabya iniabiribana erisimwa embere syaghu, unitume e Yuda omuyi eyo abotata-kulu waghe batere, nangatasyayahimbagho.”
6 Omughole w’omwami abya inianikere aho lutambi okw’iye; neryo omwami mwanibulya ati: “Olughendo lwahgu lukendibugha ebiro bingahi, kandi ukendisyasubula mughulu wahi?” Omwami mwanilighira ati nighende. Neryo munamubwira ebiro ebyo ngendibughayo.
7 Neryo munabwira omwami niti: “Kyamabitsemesya omwami, nihabawe esyobaruha esy’erikangya abaguvernere b’ekiharo ky’Eyisirya* w’Olusi, banilighire erilaba erihika aho ngendihikira e Yuda,
8 n’ebaruha y’eriha Asafu omuteya w’akasitu k’omwami, ambe emiti y’erilusyamo esyosingiti esy’erihira oko syongyo sy’ahakongotere h’enyumba* eyo, n’esyongyo sy’esyombimbo sy’omuyi, n’esy’enyumba eyo ngendibyamo.” Neryo omwami mwamba esyobaruha esyo, kusangwa ebyala bibuya by’oMungu waghe byabya okw’ingye.
9 Neryo munahika ahali abaguvernere b’ekiharo ky’Eyisirya w’Olusi namahabo esyobaruha sy’omwami. Kandi omwami mwanituma n’abakulu b’abasuda n’abakaghenda oko syosabayiri.
10 Omughulu ye Sanbalati Omuhoroni n’omukulu* Tobia Omuamoni bowa omwatsi oyo, mubapona kutsibu bakowa ngoko omundu abiryasa akasyakolera Abaisraeli b’omwatsi mubuya.
11 Neryo munahika e Yerusalema; muhalaba ebiro bisatu.
12 Munabuka omo kiro, ingye n’abalume balebe. Munitabwira omundu wosi-wosi y’ekyo oMungu abirihira omo mutima waghe, eky’erikolera e Yerusalema; kandi munitaghenda n’enyama yosi-yosi, erilusyako eyabya inihekire.
13 Neryo munahuluka omo kiro namalaba omo Lukyo lw’Omusya. Munalaba hakuhi n’Ekitehero ky’Enzoka Nene, namalolera oko Lukyo lw’Ekilundo ky’Eribu, namayiteghererya esyombimbo sye Yerusalema esyabya isyabirisambulwa n’esyongyo syayo esyabya isyabiritimibwa omo muliro.
14 Munaghenda erihika oko Lukyo lw’Ekitehero n’erihika oko Kiriba ky’Omwami. Eyo siyabya omwanya ogho enyama eyabya inihekire yangalabamo.
15 Aliwe muniruka omo musya* omo kiro ininemuyiteghererya oluhimbo. Enyuma sy’aho, munasubula, namingirira omo Lukyo lw’Omusya. Ko nasubula nitya.
16 Abasondoli mubataminya eyo nayire n’ekyo nabya ngakola, kusangwa nabya isindinabwira omwatsi wosi-wosi Abayahudi, abahereri, abakulu, n’abasondoli, n’abandi b’oko bakoli.
17 Oko nduli munabwirabo niti: “Inyw’ibene-bene munayilangirire ngoko tuli omo mibere eyikita obulighe, ngoko e Yerusalema ni bisambukalirya, n’esyongyo syayo syabiritimibwa omo muliro. Mwase twatasyahimba esyombimbo sye Yerusalema, akaghonero ako kahwe.”
18 Neryo munakaniryabo ngoko ebyala bibuya by’oMungu waghe byabya okw’ingye. Munabwirabo n’ebinywa ebyo omwami ambwira. Neryo mubabugha bati: “Tuhangane tuhimbe.” Neryo mubayikalya-kalya* erikola omubiiri oghuwene.
19 Neryo omughulu Sanbalati Omuhoroni, n’omukulu* Muamoni ye Tobia, na Geshemu Omuarabu bowa omwatsi oyo, mubatsuka eritughonera n’eritusekererya bati: “Ekyo mukakola eki niki? Mukasonda eriyisamambula oko mwami.”
20 Nikwa munasubiryabo niti: “OMungu w’elubula yukenditutokesya; n’itwe baghombe biwe, tukendihangana n’erihimba; aliwe inywe simuwite erighabo kutse ehamuli kutse eryibukwa* e Yerusalema.”
Amaelezo awehikwa
^ Ulebaye Endomeko B15.
^ Kutse “ekiharo ky’oko lundi luhande lwe Efrati.”
^ Kutse “ehekalu.”
^ Kinywa kwa kinywa, “omughombe.”
^ Kutse “omusya owakumamo amaghetse omughulu w’omwisi.”
^ Kinywa kwa kinywa, “mubakalya-kalya ebyala byabo.”
^ Kinywa kwa kinywa, “omughombe.”
^ Kutse “ehamuli y’eribya n’omwandu.”
