Nehemia 4:1-23
4 Sanbalati mwabya abyowa ngoko tunemutasyahimba oluhimbo mwahitana n’erikapikira* kutsibu, kandi mwalola embere erisekererya Abayahudi.
2 Embere sy’abaghala babo n’abasuda be Samaria mwabugha ati: “Abayahudi abaleghetsene aba bakakolaki? Bakalengekanaya bati banemwendibugha omubiiri oyu w’ibobene? Banemwendiherera amahere? Banemwendibugha omo kiro kighuma? Banemwenditoka erisubya amabwe awahisibawa n’omuliro awali omo bilundo by’olututu kwehi?”
3 Neryo Tobia Omuamoni oyo wabya imene aho lutambi okw’iye mwabugha ati: “Oluhimbo lw’amabwe olo bakahimba olu, nibya n’eboha yamabisambira kulo ilukalw’ilwahimbukala.”
4 Mungu wetu, utwowe, kusangwa abandu bano banemutukolera omo kaghonero; ebitsumi byabo usubayebyo oko mitwe yabo kandi uyirebo mo kindu ekiryanyeghawa omo kihugho ky’obunyewa.
5 Kandi isiwaswika olubanza lwabo kutse isiwaleka erilolo lyabo likazimwa embere syaghu, kusangwa babiritsuma abahimbi.
6 Neryo mutwalola embere erihimba oluhimbo. N’oluhimbo losi mulwahindanibwa n’eritasyahimbwa erihika omo kati-kati k’obuli bwalo, n’abandu mubalola embere erihira omutima wabo oko mubiiri.
7 Neryo Sanbalati, Tobia, Abaarabu, Abaamoni, n’Abaashdodi babere babinowa ngoko omubiiri w’erikokotya oluhimbo lwe Yerusalema anemulola embere, kandi ngoko ahasambukere hanemuhimbwa, mubahitana kutsibu.
8 Mubaya embita y’erisyalwa ne Yerusulama n’eriletamo obutsumbu-tsumbu.
9 Aliwe mutwasaba oMungu wetu kandi mutwahiraho abateya omo musibo n’omo kiro busana nabo.
10 Aliwe abandu be Yuda mubabya bakabugha bati: “Abakoli* babirinogha, n’ebisambukalirya ni bingyi, sitwendisyabugha arihimba oluhimbo olu n’ahake.”
11 N’esyonzighu syetu syabya sikabugha siti: “Embere baminye omupango wetu, kutse embere batulangire, tukendibahikako kitsumbukirania, tukendiitabo, neryo itwimania n’omubiiri.”
12 Omughulu Abayahudi ababya bikere hakuhi nabo babya bakasa, babya bakatubwira kangyi-kangyi* bati: “Bakenditubambira oko mbande syosi.”
13 Neryo busana n’ekyo, munahiraho abalume omo myanya y’eyikwa kandi eyitahimbire y’oluhimbo; munapangabo erikwamana n’ebihanda byabo ibane n’emiyali yabo, amatumo wabo, n’amata wabo.
14 Omughulu nalangira ngoko babiryubaha, munalw’inahangana namabwira abakulu, abasondoli, n’abandi bandu bosi niti: “Isimubahabo. Mwibuke Yehova, iye ni mukulu kandi oyukubahawa; neryo mulwire oko baghala benyu, oko bana benyu b’obulume, oko bali benyu, oko bakali benyu, n’oko manyumba wenyu.”
15 Esyonzighu syetu syabere syabyowa ngoko twabiriminya omupango wabo, kandi ngoko oMungu w’ekwenene abirilutya embita yabo, itwe bosi mutwasuba oko mubiiri w’erihimba oluhimbo.
16 Eritsuka oko kiro ekyo, enusu y’abalume baghe mubabya bakakola omubiiri n’eyindi nusu ya kubo ibakabya ibanawite oko matumo, esyongabo, n’amata. Kandi ibakabya ibanambite ekindu ekikateghaya ekikuba. Mubabya bakimana enyuma sy’Abayahudi n’eriwatikya
17 ababya bakahimba oluhimbo. Ababya bakaheka emiheke ibakakola omubiiri omo byala bighuma, n’ebindi byala ibinahekire ekyamano ky’amalwa.
18 N’abosi ababya bakahimba, mubabya bakahimba omuyali inianabohere oko mukaba, n’oyukabuha engubi abya inyanimene aho lutambi okw’ingye.
19 Neryo munabwira abakulu, abasondoli, n’abandi bandu niti: “Omubiiri ni munene n’oluhimbo ni luli, netu tughabene oko luhimbo, oghundi hali oko ghundi.
20 Mwamabyowa omulenge w’engubi imwasa imwayikumira hakuhi netu. OMungu wetu akenditulwira.”
21 Neryo mutwalola embere erikola omubiiri n’eyindi nusu ibanahekire amatumo, eritsuka omo ngyakya-ngyakya erihika aho esyongununu syahulukira.
22 Oko mughulu oyo munabwira abandu niti: “Abalume baghotsere omo Yerusalema, obuli mundu n’omuwatikya wiwe, bakendibya bakatuteya omo kiro n’omwitungyi ibakola omubiiri.”
23 Neryo ingye n’abaghala betu n’abawatikya baghe, n’abateya ababya bakanikwama, isitulilusaya esyongyimba syetu. Kandi obuli mughuma w’okw’itwe iniakabya inianawite oko kyamano kiwe ky’amalwa omo byala biwe by’amali.
Amaelezo awehikwa
^ Kutse “mwakarama.”
^ Kutse “abaheki b’emiheke.”
^ Kinywa kwa kinywa, “ngendo ikumi.”
