Nehemia 5:1-19
5 Nikwa abandu n’abakali babo mubalira kutsibu bakayihania oko baghala babo Abayahudi.
2 Abandi mubabya bakabugha bati: “Itwe n’abana betu b’obulume n’ab’obukali tuli bangyi, tutolere itwabana akalyo k’erirya tutoke eribyaho.”
3 N’abandi babya bakabugha bati: “Amalima wetu n’amalima wetu w’emizabibu, n’amanyumba wetu, twabiritsimbisyagho* busana n’eribana akalyo omo mughulu w’enzala.”
4 N’abandi mubabya bakabugha bati: “Twabiritsimbisya* amalima wetu, n’amalima wetu w’emizabibu busana n’eriyibweka esyofranga sy’eriliha engemu y’omwami.
5 Itwe n’abaghala betu* tuli mundu mughuma, kandi musasi mughuma, n’abana betu bali ng’abana babo; neryo ibwa ulangire abana betu b’obulume n’abana betu b’obukali bakabya bakobe, n’abaghuma b’oko bana betu b’obukali babiribya bakobe, aliwe situwite akaghala k’erikakirya omwatsi oyu, kusangwa amalima wetu n’amalima wetu w’emizabibu abiribya w’abandi.”
6 Munabya nabyowa ebinywa ebi, n’ekiriro kyabo, munahitana kutsibu.
7 Neryo munaghanirya oko myatsi eyi omo mutima waghe kandi munatsumanga abakulu n’abatabali. Munabwirabo niti: “Tami, abane baghala benyu-benyu bo mukalyako endundi.”*
Kandi busana nabo munateghekania omuhindano munene.
8 Kandi munabwirabo niti: “Twabirikola ngoko twangatoka erikombola abaghala betu abaghulibawa oko bihanda, neryo kandi nenyu mukenditasyaghulya abaghala benyu; neryo netu itwatasyakombolabo?” Neryo mubabya bukutu. Mubatabana n’eky’erisubirya.
9 Neryo munabugha niti: “Ekyo mukakola sikyuwene. Simwangubaha oMungu wetu, neryo ebihanda, esyonzighu syetu ibatasunga ekyangaleka ibatuseka?”
10 Nibya ingye n’abaghala betu n’abawatikya baghe tunemubabweka esyofranga n’akalyo. Neryo kisi, tuleke eribya tukasababo endundi twabibabweka.
11 Kisi munabwire musa-musa musubulirayebo amalima wabo, amalima wabo w’emizabibu, amalima wabo w’emizeituni, n’amanyumba wabo, haghuma n’ekighuma ky’oko 100* ky’esyofranga, engano, edivai nyihya-nyihya, n’amaghuta ebyo mukabasaba mo endundi.
12 Neryo mubasubirya bati: “Tukendibasubulirya ebindu ebi kandi sitwendibarondako kindu. Tukendikola ndeke-ndeke ngoko wanamabugha.” Neryo munabirikira abahereri, namalapisya abalume aba bakole ngoko banamayilagha.
13 Kandi munakunguta omukunyo w’oko lukimba lwaghe,* namabugha niti: “Obuli mundu oyutendisyaberererya eriyilagha eri, oMungu w’ekwenene amukungute atya erilua omo nyumba yiwe, n’erilua oko bindu biwe. Kandi akungutawe atya n’erisighanibwa butsira kindu.” Neryo endeko yosi muyabugha yiti: “Amina!”* Neryo mubapipa Yehova, n’abandu mubakola ngoko banayilagha.
14 Nibya eritsuka ekiro omwami anisombola eribya muguvernere wabo, omo kihugho kye Yuda, eritsuka oko mwaka wa 20 erihika oko mwaka wa 32 ow’omwami Artashasta, emyaka 12, ingye kutse abaghala betu mututalya akalyo akatolere erihabwa omuguvernere.
15 Nikwa abaguvernere ababya embere syaghe babya ibabirikondomya abandu kandi ibakasababo esyoshekeli* sy’efeza* 40 esy’akalyo n’edivai obuli kiro. Kandi n’abaghombe babo ibabirinubya abandu, nikwa ingye munitakola nitya kusangwa ingubaha oMungu.
16 Kandi nibya munakola oko mubiiri w’erihimba oluhimbo olu, kandi mututayira oko ririma n’erighuma, n’abaghombe baghe bosi ibakabya ibane ahali omubiiri.
17 Habya Abayahudi 150 n’abatabali ababya bakalira oko mesa yaghe, haghuma n’abandi abatuhikako bakasa erilua omo bindi bihanda.
18 Obuli kiro ingahukirawa* enume nguma y’ende, esyombuli 6 esyuwene kutsibu, n’esyonyunyu; kandi kaghuma omo buli biro 10, ihakabya edivai nyingyi y’obuli muhanda. Nomo bine, mundasaba akalyo akatolere erihabwa omuguvernere, kusangwa abandu babya ibanahekire omuheke wabo w’omubiiri.
19 Mungu waghe unyibuke kandi unitsumule* busana n’ebyosi ebyo nabirikolera abandu aba.
Amaelezo awehikwa
^ Kutse “twabirihityagho busana n’amadeni.”
^ Kutse “twabirihitya busana n’amadeni.”
^ Kinywa kwa kinywa, “emibiri yetu ko yine ng’ey’abaghala betu.”
^ Kutse “erisaba endundi nene.”
^ Kutse “e pursa 1.” Ni bugha ambu, obuli mwisi.
^ Kinywa kwa kinywa, “munakunguta ekikuba kyaghe.”
^ Kutse “ko binabye bitya.”
^ Eshekeli nguma ini grama 11.4. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “oko syofranga syaghe.”
^ Kutse “unyibuke busana n’ebibuya.”
