Nehemia 6:1-19
6 Neryo Sanbalati, Tobia, Geshemu Omuarabu, n’esindi nzighu syetu babere babinabwirwa ngoko nabiritasyahimba oluhimbo, ngoko simukiri omwanya (nomo oko mughulu oyo nabya isinirinahira emilango y’omo syongyo),
2 Sanbalati na Geshemu mubalw’ibanilaghirako bati: “Wase tuhireho endambi y’erihindana omo hiyi hy’Omusya w’Obwerere bwe Ono.” Nikwa babya omo mbita y’eriniyira nabi.
3 Neryo munatuma kubo kw’abakwenda niti: “Omubiiri ogho ngakola ni munene sinangatoka erindaghalira eyo. Kusangwa namabindaghalira eyo muli, omubiiri iniakendimana.”
4 Mubanitumako omulaghe mughumerera oyo ngendo ini, naghe munabya ngasubiryabo ekisubiryo kighumerera oko buli mulaghe.
5 Neryo Sanbalati mwanitumako omughombe wiwe. Abya n’omulaghe mughumerera oyo engendo y’akatano, abya n’ebaruha omo byala biwe eyitabohire.
6 Ebaruha eyo yabya ikabugha yitya: “Kinemwowibwa omo kati-kati k’ebihanda, na Geshemu ko anemubugha atya, ngoko iwe n’Abayahudi munemuteghekania eriyisamambula; kyo kikaleka imwahimba oluhimbo, kandi esyongulu esi sikakanganaya ngoko ukendibya mwami wabo.
7 Kandi wabirisombola abaminyereri eritulaghania omwatsi waghu e Yerusalema, bati, ‘Hali omwami e Yuda!’ Emyatsi eyi ikendibwirwa omwami. Neryo wase tukanaye oko mwatsi oyu ko haghuma.”
8 Nikwa munamusubirya niti: “Emyatsi eyo ukabugha, sihali n’omughuma owabirikolwa; ukayipika-pikirayo omo mutima waghu.”*
9 Kusangwa abosi babya bakasonda eritubahisya bati: “Ebyala byabo bikendyoloba ibaleka omubiiri, neryo omubiiri syendikolwa.” Neryo ngasaba niti usikaye ebyala byaghe.
10 Neryo munaghenda omo nyumba ya Shemaya mughala wa Delaya, mughala wa Mehetabali, omughulu abya isyangatoka eriluamo. Mwabugha ati: “Tuhireho endambi y’erihindana omo nyumba y’oMungu w’ekwenene, omo hekalu, neryo tukendikinga esyonyuyi sy’ehekalu kusangwa bakasyakwita. Bakendyasa erikwita omo kiro.”
11 Nikwa munabugha niti: “Omulume nga ngye, anganatibita? Omulume nga ngye, anganingira omo hekalu iniabyaho? Sinendingiramo.”
12 Neryo munaminya ngoko oMungu mwatitamutuma, nikwa ngoko Tobia na Sanbalati bo balyamuliha* anibwire obuminyereri obu akaniteba.
13 Bamuliha* anyubahisaye n’erileka nihalaye, n’ekyo kyangalekire ibanitsandyako erina batoke erinihemula.
14 Mungu waghe wibuke Tobia na Sanbalati n’ebyo bakakola ebi, kandi wibuke Noadia, omuminyereri w’obukali, n’abandi baminyereri ababya bakasondekania mughulu wosi erinyubahisya.
15 Neryo oluhimbo mulwahwa oko kiro kye 25 ky’omukera we Eluli* omo biro 52.
16 Esyonzighu syetu syabere syabinowa omwatsi oyo, n’ebihanda ebitutimbireko byabere byabilangiragho, mubahemuka kutsibu,* kandi mubaminya ngoko omubiiri oyu akolawa omo buwatikya bw’oMungu wetu.
17 Omo biro ebyo, abakulu b’Abayahudi ibakatumira Tobia y’esyobaruha nyingyi, na Tobia iniakasubirayabo.
18 Abandu bangyi e Yuda mubalahirya ngoko bakendibya oko luhande lwiwe kusangwa abya mukwe wa Shekania mughala wa Ara; na mughala wiwe ye Yehohanani abya iniabiritahya mwali wa Mesulamu mughala wa Berekia.
19 Kandi ibakabya iko banemunibwira emyatsi mibuya okw’iye, neryo ibamubwira ebyo nyiryabugha. Neryo Tobia iniakabya akanitumira esyobaruha sy’erinyubahisya.
Amaelezo awehikwa
^ Kutse “omo bulengekania bwaghu.”
^ Kutse “balyamukondesaya.”
^ Kutse “bamukondesaya.”
^ Ulebaye Endomeko B15.
^ Kinywa kwa kinywa, “mubawa kutsibu omo meso wabo.”
