Nehemia 8:1-18
8 Abandu bosi mubayihindania haghuma omo kibugha ky’abandu bosi ekyabya embere sy’Olukyo lw’Amagetse. Neryo mubabwira Ezra omuhandiki bati alete ekitabu ky’Emighambo ya Musa eyo Yehova alayira Abaisraeli.
2 Neryo oko kiro ky’erimbere ky’omwisi we 7, Ezra omuhereri mwaleta ekitabu ky’Emighambo embere sy’endeko y’abalume, abakali, n’abosi abanganatoka eryowa n’eriminya.
3 Mwasomakyo omo mulenge muli eritsuka omo tututu erihika omw’itungyi, omo kibugha ky’abandu bosi ekyabya embere sy’Olukyo lw’Amaghetse. Mwasomerakyo abalume, abakali, n’abosi ababya ibanganatoka eriyiteghererya ebyo bakowa. N’abandu mubategha amatwi ekitabu ky’Emighambo kikasomwa.
4 Ezra omuhandiki abya imene oko jukwaa y’emiti eyahimbawa busana n’omwatsi oyo; n’oko luhande lwiwe lw’amali habya himene Matitia, Shema, Anaya, Uria, Hilkia, na Maaseya. N’oko lw’amalembe habya Pedaya, Mishaeli, Malkia, Hashumu, Hashbadana, Zekaria, na Mesulamu.
5 Ezra mwasanzula ekitabu omo meso w’abandu bosi, kusangwa abya endata oko bandu bosi. Abere asanzulakyo, abandu bosi mubahangana.
6 Neryo Ezra mwapipa Yehova oMungu w’ekwenene, Omukulu; n’abandu bosi mubasubirya bati, “Amina!* Amina!” Kandi mubasumba ebyala byabo. Neryo mubunama bamaramya Yehova ibanatulamire oko kitaka.
7 Na Yesua, Bani, Sherebia, Yamini, Akubu, Shebetai, Hodia, Maaseya, Kelita, Azaria, Yozabadi, Hamani, Na Pelaya, ababya Balawi, babya bakowisya abandu b’Emighambo, abandu ibanimene.
8 Mubalola embere erisoma omo mulenge muli ekitabu, Emighambo y’oMungu w’ekwenene, erikania kukyo ko ndeke-ndeke n’eryowisyakyo. Litya mubawatikya abandu eryowa ebyabya bikasomwa.*
9 Na Nehemia oyo wabya muguvernere,* Ezra, omuhereri kandi omuhandiki, n’Abalawi ababya bakakangirirya abandu, mubabwira abandu bosi bati: “Ekiro eki kibuyirire oko Yehova Mungu wenyu, isimwasusumana kutse erilira.” Kusangwa abandu bosi babya ibanemulira bakowa ebinywa by’Emighambo.
10 Mwabwirabo ati: “Mughende mulye ebido-bido,* munywe ebisihire, abatawite oko kalyo mutumirebo oko kalyo, kusangwa oko Mukama wetu, ekiro kino kibuyirire; isimwabya n’obulighe, kusangwa obutseme bwa Yehova ni kaghala kenyu.”*
11 N’Abalawi babya bakatulerya abandu bosi bati: “Muhune! Kusangwa ekiro kino kibuyirire; neryo isimwabya omo bulighe.”
12 Neryo abandu bosi mubaghenda, bamalya n’erinywa, bamatumira abandi b’amaghabo w’akalyo, n’eriyayitsemesya kutsibu, kusangwa babya ibabiryowa ebinywa ebyo baminyisibawa.
13 Neryo oko kiro ky’akabiri, abahereri n’Abalawi, abakulu b’ebitunga by’abotata-kulu b’abandu bosi, mubahindana ahali Ezra omuhandiki, eritasyowa ndeke ebinywa by’Emighambo.
14 Neryo mubabana omo Mighambo ebyo Yehova alayira Musa ngoko omo kiro kikulu ky’omwisi we 7, Abaisraeli litolere ibikala omo bibanda.*
15 Kandi ngoko litolere ibatulaghania n’eritulagho omo miyi yabo yosi n’omo Yerusalema yosi bati: “Mughende omo bitwa, mulete emitahi eyiriko ebiti, emitahi y’emiti y’emizeituni, ey’emiti y’amaghuta, ey’emikandasi, n’ey’emiti y’obukindo,* n’eyindi mitahi y’eyindi miti eyiriko ebiti bingyi busana n’erihimba ebibanda ngoko kinahandikirwe.”
16 Neryo abandu mubaghenda bamaletabyo, bamayihimbira ebibanda, obuli mundu oko lutwe lw’enyumba yiwe, n’omo matala wabo, n’omo butala bw’enyumba y’oMungu w’ekwenene omo kibugha ky’abandu bosi ky’Olukyo lw’Amaghetse n’omo kibugha ky’abandu bosi ky’Olukyo lwa Efraimu.
17 Neryo abandu bosi b’endeko abalua omo bunyewa mubahimba ebibanda n’erikala mubyo, kusangwa eritsuka oko biro bya Yosua mughala wa Nuni erihika oko kiro ekyo, Abaisraeli babya isibalibatakola ekiro kikulu ekyo kyo batya, neryo muhabya obutseme bunene kutsibu.
18 Kandi obuli kiro ihakabya erisoma ekitabu ky’Emighambo y’oMungu w’ekwenene eritsuka oko kiro ky’erimbere erihika oko kiro ky’omwiso. Mubakola ekiro kikulu ekyo omo biro 7. N’oko kiro kye 8, mubakola omuhindano munene owabuyirire erikwamana n’Emighambo.
Amaelezo awehikwa
^ Kutse “ko binabye bitya.”
^ Kutse “mubowisya ebyabya omo busomi obo.”
^ Kutse “Omutirshata.” Ekinywa ky’olukengerwa kye Persia ekikakolesibwa erikania oko muguvernere oyukatabala oko ngabiro.
^ Kinywa kwa kinywa, “ebinunire.”
^ Kutse “ni hakongotere henyu.”
^ Kutse “ehibalalayi.”
^ Kutse “emiti y’etende.”
