Nehemia 9:1-38
9 Ekiro kya 24 ky’omwisi oyu, Abaisareli mubahindana. Mubakola amafungo ibanambite esyongyimba sy’esaki* n’eriyighusako olututu.
2 Abaisraeli ghere-ghere mubayisolola oko b’ehandi bosi. Neryo mubahangana bamaghungama amalolo wabo, n’ebibi by’abotata wabo.
3 Neryo mubabya ibanimene aho babya, bamasoma omo mulenge muli ekitabu ky’Emighambo ya Yehova oMungu wabo omo syosaha ng’isatu,* n’omo sindi saha isatu mubaghungama amalolo wabo n’eryunamira Yehova Mungu wabo.
4 Yesua, Bani, Kadmieli, Shebania, Buni, Sherebia, Bani, na Kenani mubimana oko jukwaa y’Abalawi kandi mubalirira Yehova, oMungu wabo omo mulenge muli.
5 N’Abalawi, Yesua, Kadmieli, Bani, Hasabenia, Sherebia, Hodia, Shebania, na Petahia, mubabugha bati: “Muhangane, mupipe Yehova Mungu wenyu Kera na kera.* Iwe Mungu, bahalambe erina lyaghu ly’olukengerwa eriri endata oko miyisa yosi n’eripipwa lyosi.
6 “Iwe musa, iwe Yehova, muwahangyika olubula, inga, obutuku bw’amatuku n’emilondo yosi yabyo, ekihugho n’ebyosi ebiri kukyo, n’esyongetse n’ebyosi ebiri musyo, kandi ukaleka ebyosi ibyabyaho, n’emilondo y’omo lubula ikunama embere syaghu.
7 Uli Yehova, oMungu w’ekwenene oyo wasombola Abramu n’erimulusya e Uri y’Abakaldea n’erimuha erina lya Abrahamu.
8 Muwalangira omutima wiwe isyalileghula okw’iwe, neryo muwakola endaghane haghuma naye ngoko ukendisyamuha ekihugho ky’Abakanana, Abahiti, Abaamori, Abaperizi, Abayebusi, n’Abagirgashi, erihakyo olubuto lwiwe; kandi muwaberereya esyondaghane syaghu kundi utunganene.
9 “Neryo muwalangira amalighe w’abotata-kulu wetu e Misri, kandi muwowa ekiriro kyabo oko Ngetse y’Engula.
10 Neryo muwakolera Farao, n’abaghombe biwe bosi, n’abandu bosi b’omo kihugho kiwe b’ebiminyikalo n’ebitiko-tiko. Kusangwa muwaminya ngoko mubakolera abandu baghu omo righundu kandi muwayikolera erina erikumayire erihika na munabwire.
11 Kandi muwaghaba engetse embere syabo, neryo bamalaba muyo oko kitaka ekyumire; n’ababya bakakwamirirabo muwaghusabo omo mitobero y’engetse ngoko eribwe likanaghusawa omo maghetse awaghungire.
12 Omo musibo, wabya ukasondolabo omo nduyi y’ekitu, n’omo kiro, omo nduyi y’omuliro busana n’erikolerya enzira eyo bangalabamo.
13 Muwandaghalira oko Kitwa kye Sinai n’erikania nabo erilua elubula, kandi muwahabo esyonzwere esitunganene, emighambo y’ekwenene,* ebihano ebyuwene, n’ebyalayiro.
14 Muwaminyisyabo Esabato yaghu eyibuyirire, n’erihabo ebyalayiro, ebihano, n’omughambo, erilabira omughombe waghu Musa.
15 Muwahabo omukati erilua elubula omughulu bakwa enzala, kandi muwaleterabo amaghetse erilua omo ribwe omughulu bakwa enyota, kandi muwabwirabo uti bingire omo kihugho ekyo walapa* uti ukendisyahabo, bimayekyo mo mwandu.
16 “Aliwe ibo, abotata-kulu wetu, mubabyamo erighundu n’erikalya emitima yabo;* neryo mubatakwama ebyalayiro byaghu.
17 Mubaghana eryowa kandi mubatibuka emyatsi eyikaswekaya eyo wakola omo kati-kati kabo, aliwe mubakalya emitima yabo,* kandi mubasombola omundu oyo wangabasondola batoke erisuba omo bukobe bwabo e Misri. Nikwa uli Mungu oyukabya inianayiteghekire erighanyira,* oyukayihira omo mwanya w’abandi,* n’erikwira abandu b’obulighe, oyuty’anguha erihitana, n’oyo woswire n’olwanzo oluteleghula,* kandi mughutalekeraniabo.
18 Omughulu bayikolera esanamu* y’ekyuma ey’ekyana ky’ende, mubabya bakabugha bati: “OMungu waghu y’oyu oyo wakulusaya omo kihugho kye Misri.” Kandi mubakola emyatsi mingyi y’obutakenga.
19 Nomo banakola batya, busana n’obughanyiri bwaghu bunene, mughutalekeraniabo omo mbwarara. Enduyi y’ekitu muyitalua endata wabo omo musibo busana n’eribasondola omo nzira yabo. N’omo kiro, enduyi y’omuliro muyitaleka erikolerya enzira eyo bangalabamo.
20 Kandi muwahabo ekirimu kyaghu kibuya busana n’eribaha amenge, kandi mughutalusya amana oko muno wabo, kandi muwahabo amaghetse omughulu bakwa enyota.
21 Muwahabo akalyo omo mbwarara omo myaka 40. Mubatabula kindu. Esyongyimba syabo musitakula n’ebisando byabo mubitabimba-bimba.
22 “Muwahabo amami n’ebihanda. Muwabaghabirabyo mo maghabo-maghabo. Neryo mubimya ekihugho kya Sihoni, ni bugha ambu, ekihugho ky’omwami we Heshboni n’ekihugho kya Ogi omwami we Bashani.
23 Kandi muwayira abana babo mo bangyi ng’esyongununu sy’omo kyanya. Neryo muwaletabo omo kihugho ekyo walagha abotata-kulu wabo, bingire mukyo, n’erimyakyo mo mwandu.
24 Neryo abana babo mubingira omo kihugho ekyo, bamimyakyo mo mwandu. Kandi muwakinda Abakanana embere syabo, ababya ndulani sy’omo kihugho ekyo. Muwahirabo omo byala byabo, abami babo, n’abandu b’omo kihugho ekyo, bakolebo ngoko banzire.
25 Kandi mubahamba emiyi yabo eyikongotere n’ekitaka kyabo ekirimo omubogha;* kandi mubasighalya amanyumba awalimo emihanda yosi y’ebindu ebyuwene, ebitehero ebyabya ibyabiritakulwa, amalima w’emizabibu, amalima w’emizeituni, n’emiti mingyi y’amatunda. Neryo mubalya, bamughuta bamaneneha. Mubayisalaghanda omo bubuya bwaghu bunene.
26 “Nomo bine bitya, mubabya batowa, bamayisamambula okw’iwe n’eribindukirya Emighambo yaghu y’emighongo.* Mubita abaminyereri baghu ababya bakakungabo bati bakasubayabo okw’iwe. Kandi mubakola emyatsi mingyi y’obutakenga.
27 Busana n’ekyo, muwahirabo omo byala by’esyonzighu syabo, abanubayabo butumbya. Aliwe omughulu w’amaligho wabo, ibakakulakira, naghu iwahulikirirabo ighune omo lubula; na busana n’obughanyiri bwaghu bunene, ighukahabo abalamya b’erilusyabo omo byala by’esyonzighu syabo.
28 “Aliwe ibakabya babihumula hake, ibalw’ibasyakola ebituwene embere syaghu. Neryo ighukasighabo omo byala by’esyonzighu syabo, abatabala kubo.* Neryo ibakasubula, ibakulakira bati ubawatikaye, naghu ighukowa ighune elubula. Neryo muwasabulabo ngendo nyingyi busana n’obughanyiri bwaghu bunene.
29 Nomo wanabya ukakungabo uti basube oko Mighambo yaghu, mubabyamo erighundu kandi bamaghana erikwama ebyalayiro byaghu, kandi mubahalya oko mahamulo waghu agho omundu amabikwama, iniakendibyaho. Nikwa omo butowa, mubabinduka n’erikalya ebikya byabo, kandi mubaghana eryowa.
30 Muwahanda omutima busana nabo omo myaka mingyi, kandi muwabya ukakungabo omo kirimu kyaghu erilabira abaminyereri baghu. Nikwa mubaghana eryowa. Neryo muwahirabo omo byala by’ebihanda by’ebihugho.
31 Kandi omo bughanyiri bwaghu bunene, mughutahwerekereryabo kutse erisighaniabo, kusangwa uli Mungu oyukakwira abandu b’obulighe* kandi uli mughanyiri.
32 “Neryo lino Mungu wetu, Mungu mukulu, ow’amaka, kandi oyutolere eryubahwa, oyo wabiriberererya endaghane yiwe n’erikangania olwanzo oluteleghula, isiwalangira amaligho wosi agho twabirilabamo mo mwatsi muke; abami betu, abanyamwami betu, abahereri betu, abaminyereri betu, abotata-kulu wetu, n’abandu baghu bosi eritsuka oko biro by’abami be Asiria erihika munabwire.
33 Omo byosi ebyabirituhikira, wabirikangania ngoko utunganene, kusangwa muwakola omo butaleghula; aliwe n’itwe twabirikola nabi.
34 Abami betu, abanyamwami betu, abahereri betu, n’abotata-kulu wetu, mubatakwama Emighambo yaghu kutse erisikya ebyalayiro byaghu kutse mubatakwama amahano* waghu ukakungabo.
35 Nibya n’omughulu babya omo bwami bwabo n’eriyisalaghanda omo bubuya bwaghu bunene obo wakanganayabo, n’omughulu babya omo kihugho kinene kandi eky’omubogha* ekyo wahabo, mubatakukolera kandi mubatabinduka erileka emikolere yabo mibi.
36 Neryo itwe ba bano munabwire tuli bakobe, abakobe omo kihugho ekyo waha abotata-kulu wetu, erirya amatunda wakyo n’obubuya bwakyo.
37 Omukene wakyo ni w’abami abo wabirituhirako eritutabala busana n’amalolo wetu; bakatutabalako* n’eritabala oko bihangulo byetu ngoko banzire; neryo tuli ahabi.
38 “Neryo busana n’ebyosi ebi, tukahandika endaghane eyisikire, n’abanya mwami betu, Abalawi betu, n’abahereri betu, bakahirako ekikumo.”
Amaelezo awehikwa
^ Kutse “esyopiri; esyongyimba sy’ekiriro.”
^ Kinywa kwa kinywa, “ekitswe kighuma ky’oko bini ky’omusibo.”
^ Kutse “erilua kera na kera erihika kera na kera.”
^ Kutse “emighambo y’eriyiketerwa.”
^ Kinywa kwa kinywa, “muwasumba ebyala byaghu.”
^ Kinywa kwa kinywa, “mubakalya ebikya byabo.”
^ Kutse “olukogho.”
^ Kutse “obubuya bw’olwanzo.”
^ Kutse “oMungu w’emikolere y’obughanyiri.”
^ Kinywa kwa kinywa, “mubakalya ebikya byabo.”
^ Kutse “esanamu y’erinunia.”
^ Kutse “ekinokire.”
^ Kinywa kwa kinywa, “mubaghusa Emighambo yaghu enyuma syabo.”
^ Kutse “abakondomayabo.”
^ Kutse “olukogho.”
^ Kutse “erikunga.”
^ Kutse “ekinokire.”
^ Kinywa kwa kinywa, “bakatabala oko mibiri yetu.”
