Olwimbo lwa Solomona 2:1-17
2 “Niri ng’eriwa buyira ery’esafroni,Erikalasa omw’ibanda, oko musike w’engetse.
Niri ng’eriwa ry’elise* ery’omo misya.”
2 “Ng’eriwa ry’elise* omo kati-kati k’amahwa,Omwanze waghe kw’ali atya omo kati-kati k’abambesa.”
3 “Ng’omuti w’amatunda w’epome omo musitu,Omwanze waghe kw’ali atya omo kati-kati k’abalwana.
Ngakandira eriikala omo kitsutsu kiwe,Eribya haghuma n’omwanze waghe riri ng’erirya eritunda erisihire.
4 Mwaningirya omo nyumba eyirimo efete,*N’olwanzo lwiwe lwabya ng’ebendera eyikapiperera oko mutwe waghe.
5 Mumbe esyogato sy’emizabibu;N’esyopome, nitoke eritsema n’eribya n’akaghala,Kusangwa olwanzo lukambolaya!
6 Ebyala biwe by’amalembe bine oko ngoto yaghe,Kandi anemunikumbatira omo byala biwe by’amali.
7 Ngabalapisaya, inywe bambesa be YerusalemaOmo syongabi, n’omo syongabi sy’obukali sy’omoli, niti:
Isimwasonda erinibukyamo olwanzo kutse eritsotsyalo, omutima waghe isyalyanza.
8 Namowa omulenge w’omwanze waghe!
Yolya, anemwasira erya!
Anemweruka ebitwa, n’eritwa ebika oko hitwa.
9 Omwanze waghe ali ng’eyisuku, ali ng’ekyana ky’engabi.
Yolya, animene enyuma oko luhimbo lwetu,Anemukengemererya omo madirisaAnemulebererya omo hiyingilo hy’amadirisa.
10 Omwanze waghe anemukania naghe,Anemunibwira ati:
‘Hangana, mwanze waghe,Iwe mubuya waghe, asa tughende.
11 Omughulu w’embeho* abirilaba.
Omughulu w’embula abirilaba.
12 Omusanga abiryusula omoli,Omughulu w’erisanzabulya emiti ahikire,N’omulenge w’akalikuku anemwowibwa omo kihugho kyetu.
13 Esyotini sy’erimbere-mbere syabiryera;Emizabibu yabiryasako omusanga,N’ekikumbo kyagho kyabiriyitsatsanga.
Hangana, mwanze waghe!
Asa tughende haghuma, iwe mubuya waghe.
14 Iwe kalikuku kaghe, akali omo mughenyo w’eribwe,Akayibisire omo ngwangwa.Nanzire erikulolako n’eryowa omulenge waghu,Kundi omulenge waghu asihire,N’obusu bwaghu buwene kutsibu.’”
15 “Mutuhambire esyoboha,Ebyana by’esyoboha ebikatsandaya emizabibu,Kusangwa emizabibu yetu y’abiryasako omusanga.”
16 “Omwanze waghe, ni waghe;Naghe, niri wiwe.
Anemulisirya omo mawa w’elise.*
17 Embere akahunga kabuhirireN’embere ekitsutsu kibulirane,Usubule luba, mwanze wagheWase ukatibita ng’eyisuku kutse ekyana ky’engabi oko bitwa ebitughabire.*
Amaelezo awehikwa
^ Kutse “ebirangaranga.”
^ Kutse “ebirangaranga.”
^ Kinywa kwa kinywa, “enyumba eriyirimo edivai.”
^ Kutse “omughulu w’embula.”
^ Kutse “ebirangaranga.”
^ Kutse “ebitwa bye Beteri.”
