Omughambuli 11:1-10
11 Ghusa omukati waghu w’oko maghetse, kundi hakendisyabya habilaba ebiro binene, iwatasyasungagho.
2 Uhe abandu 7 kutse nibya abandu 8, kundi siwasi obuhanya obukendisyahika oko kihugho.
3 Ebitu byamusulamo amaghetse, ibikendiwisya embula nene y’oko kihugho; kandi omuti amabiterera oko luhande lw’eyikwa kutse oko luhande lw’endata, iniakendisighala aho alyatererera.
4 Oyukasamalira erihunga syendisyahera, n’oyukasamalira ebitu syendisyasoloma.
5 Ngoko siwasi ekirimu nga kikakola kiti omo makuha w’omwana oyuli omo nda* y’omukule, kutya siwasi eby’oMungu w’ekwenene akola, oyukakola ebyosi.
6 Uhere embuto yaghu y’omo tututu, kandi isiwaleka ebyala byaghu bikaluhuka erihika omw’igholo; kundi siwasi embuto yahi nga yo yikendisyalasa, siwasi nga yeyi kutse erya, kutse esibiri syosi.
7 Ekyakakala kisihire, kandi kyuwene ameso erilangira eryuba.
8 Kundi omundu amabibugha emyaka mingyi, atsemereyo eyosi, aliwe isibirirawa ngoko ebiro by’omwirimya byanganabya bingyi. Ekyosi ekikendisyabya ni bule.
9 Mulwana, utseme ighukine mulwana, n’omutima waghu atseme omo biro by’obulwana bwaghu. Ukwame esyonzira sy’omutima waghu kandi uye ehosi-hosi eyo ameso waghu akakutwala; aliwe uminye ngoko oMungu w’ekwenene akendisyakutswera busana n’emyatsi yosi eyo.
10 Neryo ulusaye omo mutima waghu mw’emyatsi eyikaleta esyombanza, kandi uhighule omubiri* waghu oko myatsi eyikahutalaya. Kundi obulwana n’omughulu oghuwene nga w’engebe ni bule.
Amaelezo awehikwa
^ Kinywa kwa kinywa, “oyuli omo makuha awali omo nda.”
^ Kinywa kwa kinywa, “omunyoku.”
