Omughambuli 12:1-14
12 Neryo wibuke Omuhangyiki waghu Mukulu ighukine mulwana, embere ebiro by’obuhanya bihike, n’embere emyaka yihike omughulu ukendisyabugha uti: “Sinikitsemera engebe;”
2 embere eryuba n’ekyakakala, n’omughenda n’esyongununu, bibyemo omwirimya, n’embere ebitu bisubule embula yabiwa.*
3 Ekiro ekyo abateya b’enyumba bakendisyatitimana, ekiro ekyo abalume b’amaka bakendisyakondoma, ekiro ekyo abakali bakendisyaleka eriswa kundi ibabiribya bake, ekiro ekyo abaghole abakalebereraya omo madirisa bakendisyalangira iyabiribya mwirimya;
4 omughulu emilango eyisamalirene n’endaki ikendisyabya iyabirikingwa, omughulu efuyo y’oluso ikendisyakeha, omughulu omundu akahangana busana n’omulenge w’akanyunyu, kandi omughulu abambesa bosi abakimba bakalekula.
5 Kandi omundu akasagha emyanya y’endata, kandi akakwa obuba omughulu ali omo ndaki. N’omuti w’elozi* akasako omusanga, n’omusyenene iniaghenda bolo-bolo, n’eritunda ry’ekapre iryatulika. Kundi omundu akaya omo nyumba yiwe y’ebiro bingyi, n’abaliri ibalaba-laba omo ndaki.
6 Wibuke Omuhangyiki waghu Mukulu embere ekikoba ky’efeza* kitwike, embere ekibakuli ky’ehoro kitulike, embere erilegha eriri oko ngununuko ritulangike, n’embere ekiringo ekikawatikaya omundu eriteha amaghetse awali omo kyuna ky’amaghetse kitwike.
7 Neryo olututu lukasuba oko kitaka, aho lwabya embere, n’ekirimu kikasuba oko Mungu w’ekwenene oyo wahakyo abandu.
8 Omuhindania ati: “Ebyosi ni bule! Ebyosi ni bule.”
9 Omuhindania mwabya n’amenge, kandi mwataleka erikangirirya abandu b’emyatsi eyo asi. Mwabya akalengekania kutsibu n’erikwesa-kwesa emyatsi atoke erikuma-kuma* emisyo mingyi.
10 Omuhindania mwayikasa erisunga ebinywa ebisihire, kandi mwayikasa erihandika ebinywa by’ekwenene ebitemo makosa.
11 Ebinywa by’abandu b’amenge biri ng’esyofimbo sy’eribingamo esyonde, n’ebinywa byabo ebisombwere biri ng’emisumari eyabirikongomererwa ndeke-ndeke. Bikalua oko mulisya mughuma.
12 Mughala waghe, eritomeka oko ebyo, ngakuhana niti: Erihandika ebitabu siryendisyahwa, n’eriyiholya mubyo rikaluhaya kutsibu.
13 Omo byosi ebyabiryowibwa, enzumwa ngulu y’eno: Ubahe oMungu w’ekwenene n’erisikya emighambo yiwe, kundi ekyo kisa kyo mundu atolere iniakola.
14 Kundi oMungu w’ekwenene akendisyatswera obuli mwatsi, erihirako obuli mwatsi owabiseme, atoke eriminya ng’uwene kutse nga syuwene.
Amaelezo awehikwa
^ Kutse alinga, “n’embula.”
^ Kutse “w’eamande.”
^ Ni kindu ky’obughuli ekikalua omo kitaka.
^ Kutse “eritonda.”
