Omughambuli 2:1-26
2 Neryo munayibwira omo mutima waghe niti: “Asa, uteriyitsemesya n’erilangira ng’ukendiyowa ghuti.” Aliwe ebyosi ebyo nabyo ni bule.
2 Munabugha oko maseka niti, “Ni risire!”
N’okw’iyitsemesya niti, “Riri na mughasoki?”
3 Munayisogha omo mutima waghe erisonda eriminya omundu ng’angayowa ati abinywa edivai. Munakola nitya inine n’amenge waghe; nibya munakola n’emyatsi y’obukiru nitoke eriminya ekyo bandu batolere ibakola omo biro bike ebyo bakinawite oko kihugho.*
4 Munakola emyatsi mikulu-mikuli. Munayihimbira amanyumba, munahera amalima w’emizabibu.
5 Munayikokoterya ehilima n’ehisitu, munahera muhyo mw’emihanda yosi y’emiti eyikasako amatunda.
6 Munayikokoterya n’ebiriba by’amaghetse ebikendibya bikaluamo amaghetse w’eryuta omo ririma eririmo emiti eyikine milere.
7 Munayira oko baghombe b’obulume n’oko baghombe b’obukali, n’abandi baghombe mubabutirwa omwaghe.* Munayira n’oko syonyama nyingyi: Esyonde n’esyombuli, kulenga abosi ababyaho embere syaghe e Yerusalema.
8 Munayikuma-kumira efeza* n’ehoro, ebindu by’obughuli by’abami n’eby’ebiharo.* Kandi munayironderya abimbi b’obulume n’abimbi b’obukali, namayironderya n’ekikaletera abalume b’obutseme bunene, ni bugha ambu, omukali, ehee abakali.*
9 Munabya mukulu, kandi munabya mukulu kulenga abosi ababyaho embere syaghe e Yerusalema. Kandi nabya inikinawite amenge waghe.
10 Munitayighanira ekyosi-kyosi ekyo nabya nanzire.* Munataghanira omutima waghe omwatsi wosi-wosi owakatsemesaya, kundi omutima waghe abya iniatsemire busana n’emibiiri yosi eyikalire, n’ekyo kyo kyabya kihembo* kyaghe ekyo nabana busana n’emibiiri yaghe yosi eyikalire.
11 Aliwe omughulu nalengekanaya oko mibiiri yosi eyo ebyala byaghe byakola n’oko mibiiri yosi eyikalire eyo nanubira, munalangira ngoko obuli kindu ni bule, ni kwamiririra erihunga; sihabya mwatsi wosi-wosi ogho kwenene-kwenene abya n’omughaso* oko kihugho.*
12 Neryo munatsuka eritsopolya amenge, erisire, n’obukiru. (Kundi omundu oyukasubuka omwami angakolaki? Akakola eky’abirikolwa kisa.)
13 Kandi munalangira ngoko amenge ali n’endundi kulenga obukiru, ngoko ekyakakala kiri n’endundi kulenga omwirimya.
14 Ameso w’omundu w’amenge ali omo mutwe wiwe; aliwe omukiru akalendera omo mwirimya. Kandi munafumbula ngoko ababiri bosi bakahikirawa n’ekindu kighuma.
15 Neryo munayibwira omo mutima waghe niti: “Ekikahikira omukiru naghe kikendisyanihikira.” Neryo mungabanaki omw’ibya n’amenge manene? Neryo munayibwira omo mutima waghe niti: “Ekyo nakyo ni bule.”
16 Kundi omundu w’amenge n’omukiru, abosi sibalibukawa oko mughulu muli. Omo biro ebikasa, abosi babiri bakendisyibiriranwa. N’omundu w’amenge akendisyahola ati? Ngoko omukiru akanahola.
17 Neryo munapona engebe, kundi munalangira ngoko ekyosi-kyosi ekikakolawa oko kihugho* kikanihanga-hangaya, kundi ebyosi byabya bule, byabya ng’erikwamirira erihunga.
18 Munapona ebyosi ebyaleka inakola kutsibu oko kihugho,* kundi nangasighirebyo oyo wangasire enyuma syaghe.
19 Nindi yo wasi ng’akendisyabya n’amenge kutse mukiru? Nomo bine bitya, akendisyatabala ebyosi ebyo nabana omw’inuba n’omw’ikolesya amenge manene oko kihugho.* Ekyo nakyo ni bule.
20 Neryo munatsuka eribula amaha omo mutima waghe busana n’emibiiri yosi eyikalire eyo nakola oko kihugho.*
21 Kundi omundu anganakola omubiiri owakalire akasondolwa n’amenge, emyatsi eyo asi, n’obufundi obo ali nabo, aliwe akendisyasighira ebindu biwe by’omundu oyo watanubirabyo. Ekyo nakyo ni bule, kandi kikita obulighe bunene.
22 Kwenene-kwenene, omundu akabana ndundi yahi omo mibiiri yiwe yosi eyikalire n’omo ebikamukuna* erikola omubiiri owakalire oko kihugho?*
23 Kundi omo biro biwe byosi, ebyo akakola bikamuletera obulumi n’erihangya-hangya, nibya n’omo kiro, omutima wiwe syaliluhuka. Ekyo nakyo ni bule.
24 Oko mundu, sihali ekilengire erirya, erinywa, n’eritsemera* omubiiri wiwe owakalire. Munalangira ngoko ekyo kikalua omo byala by’oMungu w’ekwenene,
25 kundi hane oyukalya n’erinywa ndeke kunilenga?
26 OMungu w’ekwenene akaha omundu oyukamutsemesaya y’amenge, akamuminyisaya emyatsi mingyi, kandi akamuha obutseme. Aliwe akaha omubi y’omubiiri w’erisongya-songya n’erikuma-kuma ebindu atoke erihabyo omundu oyukatsemesaya oMungu w’ekwenene. Ekyo nakyo ni bule, ni kwamirira erihunga.
Amaelezo awehikwa
^ Kinywa kwa kinywa, “eyikwa w’olubula.”
^ Kinywa kwa kinywa, “abaghala b’omo nyumba.”
^ Ni kindu ky’obughuli ekikalua omo kitaka.
^ Kutse “ebindu ebyo bami basa bo bakabya nabyo n’ebikabya omo biharo bilebe.”
^ Kutse “omughole, ehee abaghole.”
^ Kinywa kwa kinywa, “ekyo ameso waghe asaba.”
^ Kutse “righabo.”
^ Kutse “w’endundi.”
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’olubula.”
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’eryuba.”
^ Kinywa kwa kinywa, “n’ebyo mutima wiwe akakwamirira.”
^ Kinywa kwa kinywa, “eyikwa w’eryuba.”
^ Kutse “erileka enafsi yiwe iyalangira ekyuwene.”
