Omughambuli 4:1-16
4 Kandi munatsuka eritsopolya emyatsi yosi y’eryaghalya abandu eyikakolawa oko kihugho.* Munalangira emisonia y’abakaghalibawa, kandi habya isihali oyo wangakiraniabo. Ababya bakaghalyabo babya n’amaka, habya isihali oyo wangakiraniabo.
2 Kandi munabugha niti abaholire balengire abakiriho.
3 Aliwe oyutewabutwa, ni bugha ambu, oyutewalangira oko myatsi eyikita obulighe eyikakolawa oko kihugho,* ibwa oyo alengire ababirihola n’abaliho.
4 Kandi munalangira ngoko abandu bakayikasa* kutsibu n’erikola omubiiri n’obufundi bunene busana n’erisonda erilabanako. Ekyo nakyo ni bule, ni kwamirira erihunga.
5 Omukiru akapatsika ebyala neryo omubiri wiwe iniatsanda.*
6 Ekighanza kighuma ky’ebyala ky’eriluhuka kilengire ebighanza bibiri by’ebyala by’eritumika kutsibu n’erikwamirira erihunga.
7 Munalengekania n’oko ghundi mwatsi owate n’omughaso owali oko kihugho:*
8 Hali omundu oyuli iyuwene; syawite mwira, syawite mwana, kandi syawite n’omughala wabo. Aliwe syalyataleka erikola kutsibu. Ameso wiwe syalyatughuta obuteke. Aliwe akayibulaya ati, ‘Nindi yukaleka inakola kutsibu? Busanaki siniriyitsemesaya omo bindu ebyuwene?’ Ekyo nakyo ni bule, kandi ni mwatsi owakita obulighe.
9 Ababiri balengire omughuma kundi bakabana ekihembo* ekyuwene busana n’omubiiri wabo owakalire.
10 Kundi omughuma amabitera, oghundi anganamuhangania. Aliwe bikendibya biti oko yukatera isyawite oyo wangamuhangania?
11 Kandi ababiri bamabighotsera haghuma, bakahuha, aliwe omughuma musa iniakendihuha ati?
12 Kandi omundu anganasinga oyuli iyuwene, aliwe ababiri banganayihanda okw’iye. Kandi ekikoba ky’emihungyi isatu sikiritwika luba.
13 Omwana mwera aliwe oyuli n’amenge alengire omwami musyakulu aliwe oyutawite bwenge, oyutawite bwenge obwangamuwatikya erihulikirira ebinywa by’erikunga.
14 Kundi mwalua* omo ngomo atoke eribya mwami, nomo anabutawa mo mwera omo butabali b’oghundi olya.
15 Munayiteghererya abandu bosi abaliho abakabya ibanemughenda-ghenda oko kihugho, kandi munayiteghererya emyatsi nga yikabya yiti oko mulwana oyukasubuka oghundi mutabali, oyukatabala omo mwanya w’oghundi.
16 Nomo bandu abali oko luhande lwiwe ni banene kutsibu, abakendisyasa enyuma sy’aho sibendisyamwanza. Ekyo nakyo ni bule, ni kwamirira erihunga.
Amaelezo awehikwa
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’eryuba.”
^ Kutse “omubiiri owakalire.”
^ Kinywa kwa kinywa, “n’erirya omubiri wiwe.”
^ Kinywa kwa kinywa, “eyikwa w’eryuba.”
^ Kutse “endundi nene.”
^ Alinga kikamaanisaya omwana oyuli n’amenge.
