Omughambuli 5:1-20
5 Uyilandeko omughulu ukaya oko nyumba y’oMungu w’ekwenene. Kyuwene eriyayo ukayahulikirira kulenga kw’eriyayo busana n’eriyakola obuhere ngoko abakiru bakakola, kundi bakabya isibasi ngoko bakakola muhanda.
2 Isiwabya ukahumayira eribugha, kandi isiwaleka omutima waghu akabugha butsir’ilengekania embere sy’oMungu w’ekwenene, kundi oMungu w’ekwenene ali elubula, aliwe iwe uli oko kihugho. Busana n’ekyo, ubye ukabugha bike.
3 Kundi erilengekania oko myatsi mingyi ryo rikaleka omundu inialota. N’eribugha binene ryo rikaluiramo ebinywa by’obukiru.
4 Wamabiyilagha erikolera oMungu y’omwatsi mulebe, isiwabya n’elindi-lindi, kundi syalitsemera abakiru. Ekyo ulyayilagha erikola, ukolekyo.
5 Kyanya iwaleka eriyilagha erikola omwatsi omo mwanya w’eriyilagha erikolagho, aliwe isiwendikolagho.
6 Isiwaleka obuno bwaghu bukaleka iwakola erilolo, kandi isiwabugha embere sy’omumalaika* uti: “Niryayiteba.” Siwasi ngoko aho wanganaleka oMungu w’ekwenene iniahitana busana n’ebinywa byaghu, neryo iniatsandya ebyo ukakola?
7 Kundi ngoko erilengekenia oko myatsi mingyi rikaleka omundu inialota, kutya n’omughulu omundu akabugha binene, ebinywa biwe bikabya ini bya bule. Aliwe ubahe oMungu w’ekwenene.
8 Wamabilangira omo kiharo kyaghu omukulu akaghalya omwera n’eritendikola ebyuwene n’ebitunganene, isiwasweka. Kundi hane omukulu kumulenga oyukabya inianemumulebya, kandi hakabya ihane abandi bakulu kulenga ababiri abo.
9 Kandi abosi bakaghabirana ebikalua omo kitaka; nibya n’omwami akalya oko bikalua omoli.
10 Oyo wanzire efeza,* syendisyughuta efeza, n’oyo wanzire obuteke syendisyughuta obuteke. Ekyo nakyo ni bule.
11 Ebindu ebyuwene bikabya byabikanyirira, abakalyabyo bakakanyirira. N’omwinyebyo akabana endundi yahi kite iry’en’erisamalirabyo omo meso wiwe?
12 Ehighotseri hy’omughombe hikasiha, nomo angalya bike kutse binene. Aliwe ebindu binene by’omuteke bikaleka iniatabya akayato.
13 Munalangira oko kihugho* k’omwatsi owakita obulighe bunene:* Munalangira obuteke bunene obo mwinyebo ayikuma-kumira busana n’eriyaghalya.
14 Obuteke mubwaherera omo mupango* mulebe owatalukana, ibwa mwayahikira eributa omwana isyakiwite oko kindu.
15 Ngoko omundu akalua omo nda ya mama wiwe iniali ndumbu, kandi akendisyaghenda ndumbu ngoko anasa. Kandi syangaheka ekindu n’ekighuma ky’oko byosi ebyo anubira.
16 Kino nakyo kikita obulighe bunene:* Akendisyaghenda ngoko anasa; neryo hali ndundi yahi oko mundu oyukabya inianemukolera erihunga ryo kutsibu?
17 Kandi obuli kiro akalya omo mwirimya, iniane n’obulighe bunene, inialwere, kandi iniahitene.
18 Omwatsi ogho nalangira ngoko uwene kandi ngoko atolere w’ono: Ngambe omundu inialya, inianywa, n’eritsemera omubiiri wiwe owakalire ogho akakola oko kihugho* omo biro bike by’engebe yiwe eyo oMungu w’ekwenene amuha, kundi ekyo kyo kihembo kiwe.*
19 Kandi omughulu oMungu w’ekwenene akaha omundu y’obuteke, y’ebindu, n’obutoki bw’eritsemerabyo, ngambe omundu oyo inimya ekihembo kiwe n’eritsemera omubiiri wiwe owakalire. Ekyo ni kihembo ky’oMungu.
20 Kundi ebiro by’engebe yiwe bikalaba isyasi, kusangwa oMungu w’ekwenene akusulaya omo mutima wiwe m’obutseme.
Amaelezo awehikwa
^ Kutse “sy’omutumwa.”
^ Ni kindu ky’obughuli ekikalua omo kitaka.
^ Kinywa kwa kinywa, “eyikwa w’eryuba.”
^ Kutse “obuhanya.”
^ Kutse “omwatsi.”
^ Kutse “ni buhanya bunene.”
^ Kinywa kwa kinywa, “eyikwa w’eryuba.”
^ Kutse “erighabo riwe.”
