Omughambuli 7:1-29
7 Erina eryuwene* rilengire amaghuta awuwene, n’ekiro ky’erihola kilengire ekiro ky’eributwa.
2 Kyuwene eriya omo nyumba eyirimo ekiriro kulenga kw’eriya omo nyumba eyirimo efete, kundi oyo w’omwiso owakahikira obuli mundu, n’abaliho isibibirirawa omwatsi oyo.
3 Obulighe bulengire amaseka, kundi obulighe* bukaleka omutima inyuwana.
4 Omutima w’abandu b’amenge ali omo nyumba eyirimo ekiriro, aliwe omutima w’abakiru ali omo nyumba eyirimo obutseme.*
5 Kyuwene iwahulikirira ebinywa by’erikunga by’omundu w’amenge kulenga kw’erihulikirira olwimbo lw’abakiru.
6 Kundi amaseka w’omukiru ali ng’erihutangika ry’amahwa awakakira eyikwa w’enyungu; ekyo nakyo ni bule.
7 Aliwe eryaghalibwa ryanganaleka omundu w’amenge iniabya musire, n’ekyutuliro kikatsandaya omutima.
8 Omwiso w’omwatsi uwene kulenga omwanzo wagho. Kyuwene erihanda omutima kulenga kw’eribya n’emiyiheko.
9 Isiwabya ukahitana luba-luba,* kundi erihitana luba-luba rikere omo kikuba ky’abakiru.*
10 Isiwabugha uti: “Busanaki ebiro bya kera byabya byuwene kulenga ebiro bya lino?” Kundi amenge wateleka iwabulya ghutya.
11 Eribya n’amenge n’omwandu ni mwatsi oghuwene kandi ali n’endundi oko bandu abakalangira ekyakakala ky’omw’itungyi.*
12 Kundi amenge akateghaya omundu ngoko esyofranga sikateghaya omundu, aliwe eriminya emyatsi mingyi riri n’endundi eno: Amenge akateghaya engebe y’oyuwitegho.
13 Usamalire ebyo oMungu akola, kundi nindi yo wangalungula ekyo ahengemaya?
14 Omo kiro ekyuwene, ukanganaye olukogho, n’omo kiro ky’obuhanya, uminye ngoko oMungu yo wahangyika ekiro ekyuwene n’ekiro ky’obuhanya, kusudi abandu isibaminya* ndeke-ndeke ebikendisyabahikira omo biro ebikasa.
15 Omo ngebe yaghe eyitawite mughaso, munalola oko myatsi yosi, eritsuka oko mutunganene oyukatoghotera omo ritunganene erihika oko mubi oyukabugha biro binene nomo akabya inianemukola ebibi.
16 Isiwabya mutunganene kwilaba kateho, kandi isiwabya n’amenge kwilaba kateho. Busanaki ukayiletera obuhanya?
17 Isiwabya mubi kwilaba kateho, kandi isiwabya mukiru. Wanzire erihola endambi yaghu isiyeyahika?
18 Kyuwene erihamba erihano ry’erimbere butsir’ilwika ery’akabiri; kundi oyukubaha oMungu akendikwama awosi awabiri.
19 Amenge akaleka omundu w’amenge iniabya n’amaka kulenga abalume 10 b’amaka abali omo muyi.
20 Kundi oko kihugho sikuli omundu oyutunganene oyukakola ebyuwene bisa-bisa isyangakola erilolo.
21 Kandi isiwabika omo mutima mw’ebinywa byosi ebyo bandu bakabugha; wamabibikabyo omo mutima, iwanganowa omughombe waghu akakubughako muhanda.*
22 Kundi unasi ndeke-ndeke omo mutima waghu ngoko naghu wabiribugha oko bandi ko muhanda.
23 Ebyosi ebyo munayiteghereryabyo n’amenge, kandi munabugha niti: “Ngendibya n’amenge.” Aliwe munataluka kugho.
24 Ekyabiribya sikyangahikwako, kandi kirimo mutobero munene. Nindi yo wangowakyo?
25 Munayisogha omo mutima waghe eriminya emyatsi mingyi, erisondya amenge, n’erisondya ekikaleka emyatsi iyabya ngoko yiri, kandi nitoke eriminya obubi obuli omo bukiru n’obukiru obuli omo risire.
26 Neryo munafumbula omwatsi ono: Ekindu ekikalihire kulenga oluholo y’omukali oyuli ng’obutimba bw’erihighamo, oyo mutima wiwe ali ng’obutimba bw’erisohamo esyosamaki, n’oyo ebyala biwe biri ng’eminyororo y’omo ngomo. Omukali oyo syangahamba omundu oyukasagha oMungu w’ekwenene, aliwe omukali oyo akahamba oyukakola amalolo.
27 Omuhindania ati: “Kino kyo nafumbula: Munatsopolya omwatsi mo mughuma-mughuma nitoke eribana enzumwa.
28 Aliwe ekyo nabya ngarondya mundasungakyo. Oko bandu 1 000 munasungamo omulume mughuma oyutunganene, aliwe mundasungamo omukali n’omughuma oyutunganene.
29 Ekyo nasunga kisa kya kino: OMungu w’ekwenene mwabumba abandu ibanuwene, aliwe ibo babiriyihiriraho emipango yabo-yabo.”
Amaelezo awehikwa
^ Kutse “Eriminywa ndeke.”
^ Kinywa kwa kinywa, “obulighe b’obusu.”
^ Kutse “eyirimo eriyitsemesya.”
^ Kinywa kwa kinywa, “Isiwahumayira omo kirimu kyaghu erihitana.”
^ Kutse alinga, “ryo rikakanganaya ngoko omundu ni mukiru.”
^ Ni bugha ambu, abaliho.
^ Kutse “isibafumbula.”
^ kinywa kwa kinywa “akakutakira.”
