Omughambuli 8:1-17
8 Nindi yuli ng’omundu w’amenge? Nindi yo wasi erisoha olubanza?* Amenge w’omundu akaleka obusu bwiwe ibwakya, kandi akaleka obusu bwiwe obuhinire ibwabya n’obutseme.
2 Niti: “Ukwame ebyo mwami akabugha busana n’ebyo wayilagha embere sy’oMungu.
3 Isiwalua embere siwe ho luba-luba. Isiwimira omwatsi mubi; kundi anganakola ekyosi-kyosi ekyo anzire,
4 kundi ekinywa ky’omwami kiri n’akaghala; nindi yo wangamubwira ati, ‘Ukayira ghuti?’”
5 Oyukakwama omughambo syendisyahutala, n’omutima w’amenge akendisyaminya omughulu owatolere w’erikola mo mwatsi kandi ngoko angakolwa.
6 Obuli mwatsi anawite endambi y’erikola w’omo kandi hane ngoko akakolawa, kundi esyombanza sy’abandu ni sinene kutsibu.
7 Kundi sihali oyo wasi ebikendisyabya, nindi yo wangabwira omundu ngoko emyatsi ikendisyabya?
8 Ngoko sihali omundu oyo wangatoka eritabala ekirimu kutse erikakirya ekirimu,* kutya sihali omundu oyo wangatoka erikakirya ekiro ky’oluholo. Ngoko omusuda syangahamulirwa erilua omo malwa, kutya obubi sibwendisyabalya* oyubeghere erikolabo.
9 Munalangira ebyosi ebi, n’omutima waghe mwatsopolya ebyosi ebikakolawa oko kihugho,* omo mughulu wosi ogho mundu akatabala oghundi mundu busana n’erimwaghalya.
10 Kandi munalangira ababi bakatabwa, ababya ibabeghere eringira n’erilua ahabuyirire, aliwe mubalw’ibibiriranwa omo muyi ogho babya bakakoleramo batya. Ekyo nakyo ni bule.
11 Kundi abakakola emyatsi mibi sibetahabwa amalipizi wo luba, ekyo kyo kikaleka omutima w’abandu iniatasagha erikola ebibi.
12 Nomo mubi angakola ebibi byo ngendo 100 kandi iniabugha mughulu muli, ninasi ngoko emyatsi ikendisyaghendera ndeke abakubaha oMungu w’ekwenene, kundi bakamubaha.
13 Aliwe emyatsi siyendisyaghendera ndeke omubi, kandi syendisyakanyia ebiro biwe ebiri ng’ekitsutsu, kundi syabahire oMungu.
14 Hane omwatsi mulebe owakakolawa oko kihugho: Hane abatunganene abakakolerawa nga balyakola ekibi, ihabya n’ababi abakakolerawa nga balyakola ebitunganene. Munabugha niti ekyo nakyo ni bule.
15 Neryo munabwira abandu niti kyuwene omundu eriyitsemesya, kundi oko kihugho* sikuli ekindu ekyuwene kulenga kw’erirya, erinywa, n’eriyitsemesya. Ekyo kyo mundu atolere iniabya akakola omughulu akatumika kutsibu omo biro by’engebe yiwe, ebyo oMungu w’ekwenene akamuha oko kihugho.*
16 Munayisogha omo mutima waghe eribya n’amenge n’erilangira ebyosi ebikabya oko kihugho, nibya isindiyato omw’itungyi n’omo kiro.*
17 Neryo munatsopolya ebyosi ebyo Mungu w’ekwenene akola, kandi munafumbula ngoko ebikalaba oko kihugho, abandu sibangatoka eryowabyo ndeke. N’omo bangayikasa bati, sibangatoka eryowabyo ndeke. Nomo bangabugha bati banawite amenge awangabawatikya eriminyabyo, sibangowabyo ndeke.
Amaelezo awehikwa
^ Kutse “erikumbula omwatsi?”
^ Kutse “omuka; erihunga.”
^ Kutse alinga, “obubi bw’abandu sibwangabasabula.”
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’eryuba.”
^ Kinywa kwa kinywa, “eyikwa w’eryuba.”
^ Kutse alinga, “abandu isibaliyato omw’itungyi nomo kiro.”
