Ruta 1:1-22
1 Neryo omughulu abatsweri babya bakatswera,* enzala muyabya omo kihugho. Neryo omulume mughuma we Betlehemu ye Yuda mwayikala omo malima* we Moabu, iye n’omukali wiwe, n’abaghala biwe babiri; mwabya mubunga w’eyo.
2 Erina ry’omulume oyo lyabya Elimeleki,* n’ery’omukali wiwe lyabya Naomi.* N’amena w’abana biwe babiri abya Maloni* na Kilioni.* Babya Baefrata abe Betlehemu ye Yuda. Mubahika omo kihugho kye Moabu, bamikalayo.
3 Habere habilaba biro bilebe, Elimeleki omwira wa Naomi mwahola. Naomi mwasighala n’abaghala biwe babiri.
4 Enyuma w’aho, abalwana abo mubatahya abakali Bamoabu. Erina ry’omukali mughuma ryaba Oripa n’ery’oghundi lyabya Ruta. Mubikala eyo nga myaka 10.
5 Abalwana babiri abo, ye Maloni na Kilioni nabo mubahola. Neryo Naomi mwaholerwa n’iba wiwe, n’abana biwe babiri.
6 Neryo, iye n’abalyana biwe babiri, mubahongoka bakalua omo kihugho kye Moabu; kusangwa iniane e Moabu, mwowa ngoko Yehova abiryibuka abandu biwe, abiribaha akalyo.*
7 Iye n’abalyana biwe babiri, mubahongoka erilua eyo bikere. Ibane omo nzira bakasuba omo kihugho kye Yuda,
8 Naomi mwabwira abalyana biwe babiri ati: “Musubule, obuli mundu asube eyiri mama wiwe. Yehova abakanganaye olwanzo oluteleghula olo mwabirinikangania, n’erikanganialo abalume ababirihola.
9 Ngabasunzira niti Yehova abahe engebe eyuwene* omo manyumba w’abalume benyu.” Neryo Naomi mwahabo ebizu,* nabo mubalira kutsibu.
10 Mubamuhatikana bati: “Iyehe, aliwe tukasubula naghu. Tukaghenda naghu eyiri abandu baghu.”
11 Aliwe Naomi mwasubiryabo ati: “Musubule bali baghe. Busanaki mukanza erighenda naghe? Nanganatasyabuta abana abakendisyabya bira benyu kwehi?
12 Bali baghe, musubule, kusangwa nabiribya mukekulu, sinangatasyatahibwa. Nibya nomo nangabya n’amaha w’eritasyatahibwa munabwire n’eributa abana b’obulume,
13 imunemwendisyalinda abana abo erihika aho bakendisyakulira? Imunemwendighana eritahibwa mukalindabo? Iyehe, bali baghe namabakwira obulighe bunene, kusangwa ebyala bya Yehova byabirinyaghalya.”
14 Neryo kandi mubalira kutsibu. Enyuma sy’aho, Oripa mwaha mabyala wiwe y’ebizu* neryo amasubula. Aliwe ye Ruta mwamakirira oko mabyala wiwe.
15 Neryo Naomi mwabugha ati: “Lebaya mulikyenyu, naye omukwakali amabisuba eyiri abandu biwe, n’emiungu yiwe. Naghu usubule na mulikyenyu.”
16 Aliwe Ruta mwabugha ati: “Isiwanihatikana uti nikusighe, uti nileke erikukwama. Kusangwa eyo ukaya, naghe yo ngendighenda, n’aho ukendighotsera, naghe ho ngendighotsera; n’abandu baghu bakendisyabya bandu baghe, n’oMungu waghu akendisyabya Mungu waghe.
17 Aho ukendisyaholera, naghe ho ngendisyaholera n’eritabwaho. Yehova inianisuyira kutsibu* namabikusigha. Oluholo lusa lo lukendisyanighabula okw’iwe.
18 Naomi abere alangira ngoko Ruta abirihatikana erimukwama, mwamuleka.
19 Abosi babiri mubalolya olughendo lw’embere erihika e Betlehemu. Erihika ryabo muryabuya-buya omuyi. Abakali mubabya bakabugha bati: “Oyu ni na Naomi kwe?”
20 Naomi* mwabya akasubirya abakali abo ati: “Isimwanibirikira mo Naomi, munibirikire mo Mara;* kusangwa Omutoki w’Ebyosi abirinikalihirya engebe.
21 Nalua eno iniwite bingyi nikwa Yehova abirinisubulya byala bisa. Busanaki imwanibirikira mo Naomi, na Yehova iyulyalwa naghe, n’Omutoki w’Ebyosi iyulyanyaghalaya?”
22 Naomi kw’asubula atya akalua omo kihugho kye Moabu na mwalyana wiwe ye Ruta Omumoabu. Mubahika e Betlehemu okw’itsuka ry’erighesa ry’ekisusu.
Amaelezo awehikwa
^ Kutse “omughulu babya bakatabala.”
^ Kutse “ebiharo.”
^ Likamaanisaya “oMungu waghe ni Mwami.”
^ Likamaanisaya “Obubuya bwaghe.”
^ Alinga liluire omo kimywa kye Kiebrania, ekikamaanisaya “Eryoloba; erilwala.”
^ Likamaanisaya “Oyukataluka; Oyuli oko nduli.”
^ Kinywa kwa kinywa, “omukati.”
^ Kinywa kwa kinywa, “ah’eriluhukira.”
^ Kutse “mwabalyatsirira.”
^ Kutse “mwalyatsirira.”
^ Kinywa kwa kinywa, “Yehova inianikolera atya kwilaba aho.”
^ Likamaanisaya “Obubuya bwaghe.”
^ Likamaanisaya “Ekikalihire.”
