Ruta 2:1-23
2 Neryo Naomi abya awite omutunga wa mwira wiwe oyo wabya muteke kutsibu. Erina riwe ryabya Boazi. Abya w’omo kitunga kya Elimeleki.
2 Ruta Omumoabu mwabugha na Naomi ati: “Uleke niye omo malima niyabote-bote oko misighalira y’amakundi w’engano omo ririma ry’oyukendinikangania olukogho.” Neryo Naomi mwabugha ati: “Ghenda mwali waghe.”
3 Neryo Ruta mwaghenda, amatsuka eribota-bota omw’irima enyuma w’abakaghesa. Isyasi, kwesi mwahika omo ririma lya Boazi oyo wabya w’ekitunga kya Elimeleki.
4 Neryo Boazi mwahika akalua e Betlehemu. Mwabugha n’abakaghesa ati: “Yehova abye nenyu.” Nabo mubamusubirya bati: “Yehova akutsumule.”
5 Neryo Boazi mwabulya omulwana oyo wabya akimanira abaghesi ati: “Omukali olya ni w’omo kihanda kyandi?”
6 Omulwana mwamusubirya ati: “Ni mukali Mumoabu, asa na Naomi bakalua e Moabu.
7 Mwakanibulaya ati, ‘Nanganabota-bota n’erikuma-kuma oko makundi agho abaghesi bakasigha enyuma?’ Erilua omo tututu, n’erihika na lino syalyunamukala. Mwakasala unamukala omughulu alyaluhuka omo katambi kake buyira.”
8 Neryo Boazi mwabugha na Ruta ati: “Mwali waghe, hulikirira. Isiwayabota-botera omo rindi ririma, kandi isiwalua hano uti ukaya ahandi. Ubye hakuhi n’abambesa baghe.
9 Ameso waghu abye oko ririma eryo bakaghesa. Naghu ubye ukakwamabo. Nabiribwira abalwana niti isibakutulako.* Wamabikwa enyota, iwaya ahali amalegha w’amaghetse, iwanywa oko maghetse agho abalwana babiriteha.”
10 Abere abyowa ebinywa ebyo, mwakukama neryo amunama n’eribugha ati: “Namatoka niti eribana olukogho omo meso waghu, n’eribya iwamanitsomana ingye w’ehandi?”
11 Boazi mwamusubirya ati: “Nabiryowa engulu y’ebyosi ebyo wakolera mabyala waghu, enyuma sy’oluholo lwa mwira waghu; kandi ngoko muwasigha baba waghu na mama waghu n’ekihugho ky’abatunga baghu n’eryasa omo kihugho ky’abandu abo wabya isiwasi.
12 Yehova akuhembe oko ekyo wabirikola; kandi Yehova oMungu wa Israeli akulihe ndeke-ndeke* kundi wabiryasa erirondya obusayiro omo bipupa biwe.”
13 Ruta mwasubirya ati: “Mukama waghe, nibane olukogho omo meso waghu, kusangwa wamanikirania n’eribwira omughombe waghu y’ebinywa ebikamusikaya mutima,* nomo nite mughuma w’oko baghombe baghu.”
14 Oko ndambi y’erirya, Boazi mwabugha na Ruta ati: “Wase hano, ulye oko mukati. Ukoleraye omukati waghu omo divai eyipakere.”* Neryo mwikala ahisi hakuhi n’abaghesi. Boazi mwamuha engano eyikalangire. Ruta mwalya, amughuta; kandi nibya mwasakya.
15 Omughulu Ruta ahangana akayabota-bota, Boazi mwabwira abalwana biwe ati: “Mumuleke abote-bote nibya n’omo makundi awatwire,* kandi isimwamukola nabi.
16 Kandi mumulusiraye n’awandi makundi omo mighanda, musighegho enyuma akendibota-botagho. Isimwabugha ekyosi-kyosi muti mukamukakiraya.”
17 Neryo mwabota-bota erihika omw’igholo. Omughulu ahumba ekisusu ekyo abota-bota, mukyabya hakuhi efa* nguma.
18 Neryo mwaheka ebyo abota-bota ebyo amasuba omo muyi. Mabyala wiwe mwalangira ebyo alyabota-bota. Neryo Ruta mwahulukya akalyo ako alyasakaya abyughuta, amahako mabyala wiwe.
19 Mabyala wiwe mwamubulya ati: “Kwe ulyabota-botera hayi munabwire? Mukahingira hayi? Bibuya bisa-bisa oko oyulyakukanganaya olukogho.” Neryo Ruta mwabwira mabyala wiwe y’eririma eryo alyabota-boteramo. Mwabugha ati: “Eririma eryo niluemo munabwire, omulume omwenyelyo, yo Boazi.”
20 Neryo Naomi mwabwira mwalyana wiwe ati: “Yehova atsumule omundu oyo, oyo wabirikangania olwanzo lwiwe oluteleghula oko baliho n’oko baholi.” Kandi Naomi mwatomekako ati: “Omulume oyo ni mutunga wetu. Ni mughuma w’oko batongolya* betu.”
21 Neryo Ruta Omumoabu mwabugha ati: “Kandi mwakanibwira ati, ‘Ubye ukabya hakuhi n’abalwana n’abambesa baghe erihika aho bakendisyabughira erighesa eririma lyaghe lyosi.’”
22 Naomi mwabwira mwalyana wiwe ye Ruta ati: “Mwali waghe, kyowene eribya ukaghenda n’abambesa biwe omo mwanya w’eriyakolerwa muhanda omo rindi ririma.”
23 Neryo mwabya akasiba n’abambesa ba Boazi akabota-bota erihika okw’ihwa ry’erighesa ekisusu n’oko nduli y’erighesa engano. Ebiro byosi ebyo, abya inianikere na mabyala wiwe.
Amaelezo awehikwa
^ Kutse “isibakukenderaya.”
^ Kutse “akuhembe ndeke-ndeke.”
^ Kinywa kwa kinywa, “erikania n’omutima wa.”
^ Kutse “evinegre.” Abaghesi b’omo Israeli ya kera ibabeghere erikolya omukati omo divai eyipakere bakalya.
^ Kutse “emighanda.”
^ Hakuhi litre 22. Ulebaye Endomeko B14.
^ Kutse “omughuma w’oko batunga betu oyuwite ehamuli y’eritutongolya (eritukombola).”
