Ruta 3:1-18
3 Neryo Naomi mabyala wiwe mwamubwira ati: “Mwali waghe sinangakusonderya enyumba* aho wangayowa buholo kwehi?
2 Boazi ni mutunga wetu, n’abambesa abo ulue ukasiba nabo ni bambesa biwe. Munabwire omw’igholo-gholo akendighulukya ekisusu omo kihumbiro.
3 Neryo unabe, uhakabe n’oko maghuta awakakumba ndeke, wambale* undaghalire eyiri ekihumbiro. Omulume oyo akendibya abirya n’erinywa, imo wayikangania okw’iye.
4 Akendibya ayaghotsera iwalebya aho amayaghotsera. Neryo ukendighenda iwasukula ebisando biwe n’erighotseraho. Akendikubwira eky’erikola.”
5 Ruta mwasubirya ati: “Ebyosi ebyo wamambwira, ngendikolabyo.”
6 Neryo mwaghenda amandaghalira eyiri ekihumbiro. Mwakola ebyosi ebyo mabyala wiwe amuhana.
7 Na Boazi mwalya n’erinywa n’eritsema omo mutima. Neryo mwayaghotsera hakuhi n’ekilundo ky’ekisusu. Enyuma sy’aho, Ruta mwasa bolo-bolo amasukula ebisando bya Boazi n’erighotseraho.
8 Omo kati k’ekiro, Boazi mwatsuka erititimana. Neryo mwayibindula amalangira omukali inyanaghotsere oko bisando biwe.
9 Mwamubulya ati: “Uli ndi?” Naye mwasubirya ati: “Ni Ruta omughombe waghu. Ukurire olukimba lwaghu* oko mughombe waghu, kundi uli mutongolya.”
10 Neryo Boazi mwabugha ati: “Mwali waghe, Yehova akutsumule. Lino wabirikangania olwanzo lwaghu oluteleghula kulenga erimbere. Kundi sulitakwama abalwana nomo bangabya bera kutse bateke.
11 Neryo lino mwali waghe, isighubaha. Ngendikukolera obuli kindu ekyo ukasaba, kusangwa obuli mundu omo muyi* anasi ngoko uli mukali oyuwene.
12 Kwenene nomo nine mutongolya, ibwa hane oghundi mutongolya omutunga wa hakuhi kunilenga.
13 Usighale hano omo kiro kino, neryo amanza erikutongolya omungyakya, ikyuwene! Akutongolaye. Aliwe amatendyanza erikutongolya, oko kwenene ngoko Yehova aneho, in’ingye ngendikutongolya. Ughotsere hano erihika omo tututu.”
14 Neryo mwaghotsera ahali ebisando biwe erihika omo tututu. Neryo mwabuka ehirimya ihikineyo, isihali omundu oyo wangamuminyerera. Boazi mwabugha ati: “Aliwe, ngambe abandu isibaminya ngoko omukali mwakahika omo kihumbiro.”
15 Kandi mwabugha ati: “Ulete erikoti eryo wambite, usanzuleryo.” Neryo Ruta mwasanzularyo. Boazi mwutamo ehilengyi* 6 hy’ekisusu, amamuhekyahyo. Enyuma sy’aho Boazi mwaya omo muyi.
16 Ruta mwasuba eyiri mabyala wiwe. Mabyala wiwe mwamubulya ati: “Mwali waghe, emyatsi muyikaghenda yiti?”* Ruta mwamubwira ebyosi ebyo omulume oyo alyamukolera.
17 Kandi Ruta mwasyamubwira ati: “Mwakamba ehilengyi 6 ehi, hy’ekisusu n’erimbwira ati, ‘Isiwasuba eyiri mabyala waghu byala bisa.’”
18 Neryo Naomi mwamusubirya ati: “Mwali waghe wikale hano erihika aho ukendiminyira emyatsi nga yikendibya yiti. Kundi munabwire omulume oyo syendikala ahisi ate asoha omwatsi oyo.”
Amaelezo awehikwa
^ Kinywa kwa kinywa, “ah’eriluhukira.”
^ Kutse “wambale esyongyimba syaghu sy’eryambalira oko sindi.”
^ Kutse “omusike w’olukimba lwaghu.”
^ Kinywa kwa kinywa, “olukyo lwosi lw’abandu baghe.”
^ Alinga ehilengyi 6 hy’esea kutse nga litre 44. Ulebaye Endomeko B14.
^ Kinywa kwa kinywa, “Ulindi?”
