Ruta 4:1-22
4 Neryo Boazi mwaya oko lukyo lw’omuyi amikalaho. Neryo omutongolya oyo Boazi ahula mwalabaho. Boazi mwabugha ati: “Tahyee, asa hano wikale.” Neryo mwakita amikala.
2 Neryo Boazi mwimya abasyakulu 10 oko basyakulu b’omo muyi n’eribugha ati: “Mwikale hano.” Neryo mubikala.
3 Boazi mwabugha n’omutongolya oyo ati: “Naomi oyo wabirisubula akalua e Moabu akasonda erighulya eririma* erya mughala wetu ye Elimeleki.
4 Neryo mungalangira ikitolere inakubwira omwatsi oyo n’erikubwira niti ughule eririma eryo embere sy’abikalani b’omo muyi; n’abasyakulu b’abandu baghe, ibanalangire. Wamabya ighukendikombolaryo,* ukomboleryo. Aliwe wamabya isiwendikombolaryo umbwire, neryo inaminya; kundi n’iwe uwite ehamuli y’erikombolaryo, naghe nikusubukire.” Omulume oyo mwasubirya ati: “Ngendikombolaryo.”*
5 Neryo Boazi mwasubirya ati: “Ekiro ukendisyaghula eririma eryo oko Naomi, litolere iwaghularyo n’oko Ruta Omumoabu omukali w’omuholi, erina ry’oyo wahola risube omo mwandu wiwe.”
6 Omutongolya oyo abere abyowa ebyo bwabugha ati: “Sinendikombolaryo,* ngasyatsandya omwandu waghe. Uyikombolereryo omo hamuli yaghe y’erikombola. Kusangwa sinangatoka erikombolaryo.”
7 Omo Israeli ya kera erihira ekikumo oko mwatsi w’erikombola* n’erihingania ebindu, ibakakwama omutsye ono: Omundu iniakalusaya ekiryato kiwe n’erihakyo mulikyabo. Ko babya bakakola batya erikangania ngoko babirilighirana oko mwatsi* omo Israeli.
8 Neryo omughulu omutongolya oyo abwira Boazi ati, “Uyighulireryo,” mwalusya ekiryato kiwe.
9 Neryo Boazi mwabwira abasyakulu n’abandu bosi ati: “Munabwire muli bimiri* ngoko namabighula oko Naomi kw’ebyosi ebyabya bya Elimeleki, n’ebyosi ebyabya bya Kilioni na Maloni.
10 Kandi namaghula na Ruta Omumoabu, omukali wa Maloni. Amabibya mukali waghe nitoke erisubya erina ry’omuholi oko mwandu wiwe, erina ry’omuholi likasyabulirana omo kati-kati k’abaghala babo n’omo muyi w’ewabo. Muli bimiri munabwire.”
11 Neryo abandu bosi ababya omo lukyo lw’omuyi, haghuma n’abasyakulu mubabugha bati: “Tuli bimiri.* Yehova ayire omukali oyukingira omo nyumba yaghu nga Rakeli, kandi nga Lea, ababiri abahimba enyumba ya Israeli. Ukumayire e Efrati, n’eriyira erina* eryuwene e Betlehemu.
12 Enyumba yaghu ibye ng’eya Perezi oyo Tamari abutira Yuda, omo lubuto olo Yehova akendikuha erilabira omumbesa oyu.”
13 Neryo Boazi mwaherukya Ruta, amabya mukali wiwe. Mwamwimya. Na Yehova mwawatikya Ruta amaheka obukule. Mwabuta omwana w’obulume.
14 Neryo abakali mubabwira Naomi bati: “Yehova apipawe, syetakusigha butsira mutongolya munabwire. Erina liwe ritughalanibawe omo Israeli!
15 Abirisubya* engebe yaghu* kandi akendikuwatikya omo bukekulu bwaghu. Kusangwa omwalyana waghu oyukwanzire kandi oyo okw’iwe alengire abaghala 7, abirimubuta.”
16 Neryo Naomi mwimya omwana oyo amamuhira oko kikuba kiwe amamusulubirira.*
17 Neryo abakali abahimbani biwe mubamuha erina. Mubabugha bati: “Naomi abiributirwa omughala.” Neryo mubamwahula mo Obedi. Obedi yo tata wa Yese, baba wa Daudi.
18 Ekizazi* kya Perezi ko kikwama-kwamene kitya. Perezi mwabuta Hezroni.
19 Hezroni mwabuta Ramu; Ramu mwabuta Aminadabu;
20 Aminadabu mwabuta Nashoni; Nashoni mwabuta Salmoni;
21 Salmoni mwabuta Boazi; Boazi mwabuta Obedi;
22 Obedi mwabuta Yese na Yese mwabuta Daudi.
Amaelezo awehikwa
^ Kutse “ekibanza.”
^ Kutse “ighukenditongolyaryo.”
^ Kutse “eritongolya.”
^ Kutse “sinenditongolyaryo.”
^ Kutse “eritongolya.”
^ Kutse “endaghano.”
^ Kutse “batemwe.”
^ Kutse “batemwe.”
^ Kinywa kwa kinywa, “erina erighendya omurango.”
^ Ni bugha ambu, “omwitsikulu wa Naomi.”
^ Kutse “abiribya musubya w’engebe.”
^ Kutse “mwabya mulemberi wiwe.”
^ Kutse “esyondengo.”
