Ebaruha oko Tito 1:1-16
1 Ebaruha eno ikalua oko Paulo, omughombe w’oMungu n’omukwenda wa Yesu Kristo erikwamana n’obwikirirya bw’abandu abo oMungu asombola, kandi erikwamana n’eriminya ekwenene yo ndeke-ndeke, eyikakanganaya ngoko twangamakirira oMungu,
2 kandi eyiseghemere amaha w’engebe ya kera na kera eyo oMungu, oyutewangabugha amabehi, alagha erilua kera;
3 aliwe oko mughulu owatolere abiriminyisya ekinywa kiwe erilabira omubiiri w’erihubirya ogho nahabawa erikwamana n’ekyalayiro ky’oMungu, Omusabuli wetu.
4 Ebaruha eno ngahandikirayo Tito, omwana waghe w’ekwenene, erikwamana n’obwikirirya obo tuli nabo.
Olukogho n’obuholo bw’oMungu Tata n’Omusabuli wetu Kristo Yesu bibye haghuma naghu.
5 Munakusigha e Krete utoke erilungula emyatsi eyabya ituwene, kandi utoke erihira abasyakulu omo buli muyi erikwamana n’ebyalayiro byaghe bino:
6 Ritolere omusyakulu w’endeko* isyabyako hinywa-hinywa, iniabya n’omukali mughuma musa, iniabya n’abana abikirirye, abate n’emighendere mitya-mitya,* kandi sibabye abatekenga.
7 Kundi omusyakulu w’endeko ni mwimaniri w’enyumba y’oMungu, siritolere akabyako hinywa-hinywa, siritolere akabyamo erighundu, siritolere akabya mundu oyukahitana luba-luba, siritolere akabya mutamiri, siritolere akabya mutsururu,* kutse akabya n’omururu w’erirondya esyofranga n’ebindu busana n’endundi yiwe iyuwene-wene.
8 Aliwe, ritolere iniabya oyukakokaya abagheni, oyo wanzire ekibuya, oyuli n’obwenge obuwene, oyutunganene, omutaleghula, oyo wasi eriyikakirya,
9 oyukakwama ndeke-ndeke ekinywa ky’ekwenene omughulu akakangiriraya,* atoke erisikya abandu bo mutima* erilabira amakangirirya awuwene,* kandi atoke erihayira abakabugha muhanda oko makangirirya ayo.
10 Kundi hali abandu bangyi abatekwama emighambo abakabugha ebinywa bitya-bitya, ababehi. Abangyi ba kubo bakabugha bati ritolere eribanibwa.
11 Ritolere erikinga obuno bw’abandu abo, kundi bakabulunganaya ebihanda omw’ikangirirya emyatsi eyo batatolere erikangirirya, kandi bakakola batya busana n’endundi yabo.
12 Omughuma wa kubo, omuminyereri wabo-wabo, mwabugha ati: “Abanya Krete ni babehi mughulu wosi, ni nyama sy’omoli esikahutalaya, ni baghata, abanzire erirya binene.”
13 Omwatsi oyo ni w’ekwenene. Busana n’ekyo, ubye ukahayirabo batoke eribya n’obwikirirya obuwatire.
14 Isiwahulikirira esyohadisi sy’Abayahudi, n’ebyalayiro by’abandu abakaleka erikwama ekwenene.
15 Ebindu byosi by’erire oko bandu aberire. Aliwe, oko bandu abaterire n’abate n’obwikirirya, sihali ekindu eky’erire, kundi amalengekania wabo n’obunya-mutima* bwabo si byerire.
16 Bakabugha embere sy’abandu bati basi oMungu, aliwe ebyo bakakola sibirikanganaya ngoko bamwasi, kundi bakita esyonye kandi sibalyowa, kandi sibatolere n’ahake erikola obuli mwatsi owuwene.
Amaelezo awehikwa
^ Kinywa kwa kinywa, “Hamabya omulume.”
^ Kutse “abakayitwa ng’esyonyama sy’omoli.”
^ Kutse “oyukahunza abandi.”
^ Kutse “n’obufundi bw’erikangirirya.”
^ Kutse “erihana abandu.”
^ Kutse “aw’endundi.”
^ Kutse “ezamiri.”
