Ebaruha oko Tito 2:1-15
2 Aliwe iwe, ubye ukabugha ebinywa ebihambene n’amakangirirya awuwene.*
2 Abalume abakulire babye n’olulengo omo mibere yabo, babye n’emibere eyangaleka ibasikibwa, babye n’obwenge obuwene; basike omo bwikirirya, omo lwanzo, n’omwiyiyinia.
3 Kutya, abakali abakulire babye n’emibere eyikakanganaya ngoko bakengire oMungu. Isibabya bakatonga abandi, isibabya bakobe b’edivai, babye bakakangirirya emyatsi eyuwene.
4 Neryo ibakenditoka erihana abakali abakine bambesa bati banze abalume babo, banze abana babo,
5 bati babye n’obwenge obuwene, babye abandu aberire, abakakola emibiiri y’eka wabo, babye abandu abakakola ebibuya, abakowa abalume babo, abandu bakasyabugha muhanda oko kinywa ky’oMungu.
6 Kutya, ubye ukahana abalwana uti babye n’obwenge obuwene.
7 Omughulu ukahanabo, ubye eky’erileberyako ekyuwene omo myatsi yosi. Ukangiriraye emyatsi eyerire* butsira lutseghe-tseghe.
8 Omughulu ukakangiriraya, ukolesaye ebinywa ebyuwene,* ebyo omundu ate angabughako muhanda, kusudi abakaghana ebyo tukabugha bahemuke, sibabane emyatsi mibi y’eritubughako.
9 Abakobe bowe abakama babo omo myatsi yosi. Babye bakayikasa eritsemesyabo, sibabye bakabahirako ehikabala.
10 Sibabye bakiba ebindu by’abakama babo. Aliwe, bakanganaye ngoko ni bandu b’eriyiketerwa kutsibu, kusudi omo myatsi yosi batoke eryuwania amakangirirya w’oMungu, Omusabuli wetu.
11 Kundi olukogho lw’oMungu lwabirikanganibwa, lukendisyaleka abandu b’emihanda yosi ibasabuka.
12 Lukatukangiriraya erighana emyatsi y’eritendikenga oMungu, eritendikwama esyongumbu sy’ekihugho, eribya n’obwenge obuwene, eribya batunganene, n’erimakirira oMungu omo kihugho kino,*
13 itunemulindirira amaha awuwene n’erikanganibwa ry’olukengerwa lw’oMungu mukulu n’olw’Omusabuli wetu, Yesu Kristo,
14 oyo wayiherera busana netu, atoke eritulusya* omo bubi bosi-bosi n’eriyererya abandu abali buteke bwiwe, abali n’omuhwa w’erikola ebyuwene.
15 Sighuleke eribya ukabugha emyatsi eyo n’erihana* n’erikunga butsir’isagha.* Omundu isyakupokaya.
Amaelezo awehikwa
^ Kutse “aw’endundi.”
^ Kutse kandi, “Ukangiriraye n’omutima ow’erire.”
^ Kutse “eby’endundi.”
^ Kutse “omo mughulu ono.” Ulebaye amaana w’ebinywa.
^ Kutse “erituhanulira, eritubohola.”
^ Kutse “n’erisubya mutima.”
^ Kutse “kundi uhamulirwe.”
