Ebaruha oko Tito 3:1-15
3 Ubye ukabibukya uti babye bakasikya n’erikenga abatabali n’abakulu,* n’eribya tayari erikola obuli mwatsi owuwene.
2 Sibabye bakabugha muhanda oko mundu n’omughuma, sibabye bandu abakaleta amalwa, sibabye bakamakirira amalengekania wabo,* aliwe babye bolo embere sy’abandu bosi.
3 Kundi netu kera, twabya bakiru, isitulyowa, itwabirihera oko nzira, twabya bakobe b’esyongumbu mbiriri-mbiriri, n’abakobe b’emyatsi y’eriyitsemesya. Twabya tukakola ebibi, kandi twabyamo eritsuro, twabya bandu abakita esyonye, ituponire abandi.
4 Aliwe, omughulu olukogho lw’oMungu, Omusabuli wetu, lwakanganibawa, n’omughulu akanganaya ngoko anzire abandu
5 (butsira busana n’emyatsi eyitunganene eyo twakola, aliwe busana n’obughanyiri bwiwe), mwatusabula omw’itwerya tutoke eribya n’engebe, kandi omw’ituyiramo bahya-bahya erilabira ekirimu kiwe kibuyirire.
6 Mwatuha ekirimu ekyo butsira bukuku erilabira Yesu Kristo, Omusabuli wetu,
7 kusudi, twabighanzwamo batunganene busana n’olukogho lwiwe, tutoke erisyalya omwandu w’engebe ya kera na kera erikwamana n’amaha wetu.
8 Ebinywa ebi ni by’ekwenene, kandi nanzire iwabya ukahira omuwato oko myatsi eyi, ababirikirirya oMungu batoke eriyitsinga erikola emyatsi eyuwene. Emyatsi eyi yuwene kandi ni y’endundi oko bandu.
9 Aliwe, isiwabya ukayingirya omo buhaka bw’obukiru kutse erisondya-sondya emyatsi y’ebizazi,* amalwa n’erikuba obuhaka busana n’Emighambo, kundi emyatsi yosi eyo si y’endundi, kandi siyirihimba.
10 Nikwa omundu oyukatsukisaya akasomo, umughane wabimukunga engendo y’erimbere n’ey’akabiri,
11 kundi omundu oyo abirihera oko nzira, abirikola erilolo, abiritswerwa busana n’ebyo akakola.
12 Ngendibya nabikutumira Artema kutse Tikiko, naghu uyikase erinieya e Nikopoli, kundi omughulu w’embeho akendisyanyihwera eyo. Ko nabiriyisogha nitya.
13 Uyikase eriwatikya Zena, oyo wasi Emighambo yo kutsibu, na Apolo. Isibabula kindu omo lughendo lwabo.
14 Aliwe, abandu betu nabo bighe eribya bakakola emyatsi eyuwene, batoke eriwatikya omughulu obuwatikya bwamalawako luba-luba, bakasyabya bandu abatekola ebyuwene.*
15 Abosi abali haghuma naghe bamakutumira obuholo. Uramukaye abosi abatwanzire, kandi abali n’obwikirirya.
Olukogho lubye haghuma nenyu, inywe bosi.
Amaelezo awehikwa
^ Kinywa kwa kinywa, “amatabali n’obukulu.”
^ Kutse “abakalabayaho kateho, b’erighundu, abakaghemera oko luhande lughuma, abate b’olulengo.”
^ Kutse “y’esyondengo.”
^ Kinywa kwa kinywa, “abatehetaya amatunda.”
