Ebaruha oko Yakobo 2:1-26
2 Baghala betu, mwanganabugha muti mwikirirye Omukama wetu w’olukengerwa Yesu Kristo imunemo akasololo?
2 Kundi omundu amasa oko muhindano wenyu inianambite esyopeta* sy’ehoro n’olukimba oluwene nga, n’omwera naye iniasa n’olukimba olutunda-tundire,
3 mukasikaya kutsibu oyumbite olukimba oluwene nga n’erimubwira muti, “Iwe, asa wikale ahuwene hano,” aliwe omwera imwamubwira muti, “Iwe, wimane,” kutse imwamubwira muti, “Iwe ikala halya hakuhi n’ekitumbi kyaghe ky’ebisando?”
4 Mwamabikola mutya, aho isimwetabya n’akasololo omo kati-kati kenyu? Kandi isimwetabya batsweri abakasoha emyatsi yo muhanda?
5 Baghala betu banzwa, muhulikirire omwatsi ono: Simwasi ngoko oMungu mwasombola abandu abo ekihugho kikalangiramo bera, batoke eribya bateke omo bwikirirya n’erisyahabwa omwandu w’Obwami obo oMungu abirilagha abandu abamwanzire?
6 Aliwe inywe, mukaghonera abera. Simwasi ngoko abateke bo bakabaghalaya n’eribatwala oko syotribinali?
7 Bo batetsuma erina eryuwene eryo mwahabawa?
8 Neryo mwamasikya ndeke-ndeke omughambo mukulu ow’omwami owali omo risako rino erikabugha riti, “Wanze mulikyaghu ngoko uyanzire,” aho imukakola ndeke.
9 Aliwe, mutitaleka akasololo, aho imukakola erilolo, n’emighambo iyikabatsweramo bakola-nabi.
10 Kundi omundu amabya iniakasikaya Emighambo yosi, aliwe iniataluka oko mughambo mughuma musa, aho iniamataluka oko Mighambo yosi.
11 Kundi oyo wabugha ati, “Isiwakola obusingiri,” yo wanabugha ati, “Isiwita.” Neryo wamabya isighulikola obusingiri aliwe iwita, aho isiwetasikya emighambo.
12 Mubye mukabugha n’eriyighendya ng’abandu abakendisyatswerwa erikwamana n’emighambo y’abandu abali bwiranda.*
13 Kundi oyuteghanyira syendisyaghanyirwa omughulu akendisyatswerwa. Erighanyira rikolobaya olubanza.
14 Baghala betu, kiri n’omughaso wahi omundu amabibugha ati ali n’obwikirirya, aliwe isyalikola emyatsi eyikakanganaya ngoko ali n’obwikirirya? Mukalengekanaya muti obwikirirya obuli ng’obo bwanganaleka iniasabuka?
15 Omughala kutse mwali wenyu amabya akabula eky’eryambala n’eky’erirya obuli kiro,
16 neryo omughuma w’okw’inywe iniamubwira ati, “Ughende buholo, wote oko muliro n’erirya ndeke,” aliwe iniatamuha ekyo alaghireko, aho iniamakolaki?
17 Kutya, omundu amabya n’obwikirirya busa, aliwe isyalikola emyatsi eyikakanganaya ngoko ali n’obwikirirya, obwikirirya obo ibuholire.
18 Aliwe, omundu mulebe anganabugha ati, “Iwe uli n’obwikirirya, aliwe ingye ngakola emyatsi eyikakanganaya ngoko niri n’obwikirirya. Nikanganaye ngoko wikirirye risa, aliwe ingye ngendikukangania ngoko nikirirye erilabira ebyo ngakola.”
19 Wikirirye ngoko hali oMungu mughuma, ko bite bitya? Ekyo kyuwene, aliwe esyombinga nasyo sikirirye kandi sikatitimana.
20 Iwe mukiru, wanzire itwakukangania ngoko ni bule omundu amabya n’obwikirirya, aliwe isyalikola emyatsi eyikakanganaya ngoko ali n’obwikirirya?
21 Siwasi ngoko baba wetu Abrahamu mwaghanzwamo mutunganene abikola ekindu kilebe, ni bugha ambu, abiherera omughala wiwe, ye Isaka, oko kiherero?
22 Wamalangira ngoko obwikirirya bwiwe mubwalangirika omo ebyo akola, kandi ebyo akola byo byaleka obwikirirya bwiwe ibwahika-hikana.
23 N’erisako rino muryabererera, erikabugha riti: “Abrahamu mwikirirya ebyo Yehova* abugha, n’ekyo mukyaleka inialangirwamo mutunganene,” neryo mwahulwamo mwira wa Yehova.*
24 Mwamalangira ngoko omundu akaghanzawamo mutunganene busana n’emyatsi eyo akakola, si busana n’obwikirirya busa.
25 Kutya, simwasi ngoko Rahabu, omumbalaka, naye mwaghanzwamo mutunganene busana n’ebyo akola, ni bugha ambu, erikokya ndeke abandu abatumawa n’eribabwira ati balabe omo yindi nzira?
26 Oko kwenene, ngoko omubiri owatemo muka* aholire, kutya omundu amabya n’obwikirirya aliwe isyalikola emyatsi eyikakanganaya ngoko ali n’obwikirirya, obwikirirya bwiwe ibuholire.
Amaelezo awehikwa
^ Kutse “embuka.”
^ Kinywa kwa kinywa, “n’emighambo y’obwiranda.”
^ Ulebaye endomeko A5.
^ Ulebaye endomeko A5.
^ Kutse “ekirimu.”
