Ebaruha oko Yakobo 3:1-18
3 Baghala betu, siritolere abangyi b’omw’inywe bakabya bakangirirya, kundi tukendisyatswerwa luhanya-hanya.
2 Kundi itwe bosi tukatwikala kangyi-kangyi. Omundu amatenditwikala* omo binywa, iniahika-hikene, kandi inianganatoka n’erikakirya omubiri wiwe wosi.
3 Twamahira esyokamba omo buno bw’esyosabayiri* sitoke eritwowa, tukasondola n’omubiri wasyo wosi.
4 Kutya mulebaye n’amato: Nomo akabya manene-manene kandi nomo akakunawa n’erihunga rinene, omundu oyukaghendayagho akaghendayagho omo ngahya,* n’eritwalagho eyo anzire.
5 Kutya, olulimi nalo ni kandu kake k’oko mubiri, aliwe kakayihalamba kutsibu. Mulebaye ngoko ehiriro hike hikanatimaya omusitu munene.
6 Olulimi ni muliro. Omo bitsuko by’oko mubiri wetu, olulimi lukasosekanaya ekihugho ky’emyatsi eyitatunganene, kundi lukatsandaya omubiri wosi n’eritsandya engebe yosi y’omundu.* N’omuliro owali kulo akalua omo Gehena.*
7 Kundi obuli muhanda w’enyama y’omoli, w’enyunyu, w’enyama eyikakululuka, n’enyama y’omo ngetse anganatungwa. Nibya abandu babiritungagho.
8 Aliwe, sihali oyo wangatunga olulimi. Lutsandire kandi rikalire erileghalo. Luswiremo esumu eyikita.
9 Tukapipa mulo mo Yehova,* Tata, kandi tukatakira mulo mw’abandu abahangyikawa omo kisosekanio ky’oMungu.
10 Obuno bughumerera bukatsumula, kandi ibwatakira.
Baghala betu, siritolere emyatsi ikabya yitya.
11 Engununuko ngumerera siyiriluamo amaghetse awasihire n’amaghetse awakalihire, ko bite bitya?
12 Baghala betu, omuti w’etini syangahetako emizeituni; n’omuti w’emizabibu syangahetako esyotini; ko bite bitya? Engununuko y’amaghetse awalimo munyu siyangaluamo amaghetse awasihire.
13 Nindi yuwite amenge n’ehakili omo kati-kati kenyu? Akanganaye ekyo omw’iyighendya ndeke, omw’ikola emyatsi omo bolo, obukalua omo menge.
14 Aliwe, omo mitima yenyu mwamabya imuli eritsuro rinene n’omwagha,* isimwayihalamba, kundi aho imukayiteba.
15 Amenge ayo syalilua endata, aliwe ni w’oko kihugho, ni w’esyonyama, aw’esyombinga.
16 Kundi ahali eritsuro n’omwagha,* emyatsi ikabya putsu-putsu kandi hakabya obubi bosi.
17 Aliwe, amenge awakalua endata kw’ali atya: Eky’erimbere, erire, kandi akakwamirira obuholo, syalimakirira amalengekania wagho,* akowa luba, akaghanyira kutsibu, n’erikola ebyuwene. Syalimo akasololo, syalimo obulimba-limba.*
18 Emyatsi eyitunganene ikaherawa omo buholo busana* n’endundi y’abakahiraho obuholo.
Amaelezo awehikwa
^ Kutse “amatendikola amakosa.”
^ Kutse “esyofarasi, esyoshevale.”
^ Ni kindu ekiri ng’omuko ekyo bakaghendayamo obwato.
^ Kutse “n’eryakya engebe y’omundu.” Kinywa kwa kinywa, “ekiringo ky’eributwa ky’enzuko.”
^ Ulebaye amaana w’ebinywa.
^ Ulebaye endomeko A5.
^ Kutse kandi, “n’eriyilabirirya.”
^ Kutse kandi, “n’eriyilabirirya.”
^ Kutse “syalilabayaho kateho, syalimo erighundu, syalighemera oko luhande lughuma, alimo olulengo.”
^ Kutse “obunafiki.”
^ Kutse kandi, “erilabira.”
