Ebaruha oko Yakobo 4:1-17
4 Amalwa n’eritendihulikirirana ebiri omo kati-kati kenyu bikasira hayi? Simwasi ngoko bikasira omo syongumbu sy’omubiri esikabya isinemulwira omw’inywe?*
2 Mukanza eribya n’ekindu kilebe, aliwe simulibanakyo. Mukabya imunemwita n’eriyitsutsa ebindu by’abene, aliwe isimwangabanabyo. Simulihulikirirana kandi mukabya imunemulwa. Simuwite oko kindu kundi simulisaba.
3 Nibya n’omughulu mukasaba simulibanabyo, kundi simulisaba n’omutima owuwene. Mukasaba busana n’eriberererya esyongumbu syenyu sy’omubiri.
4 Inywe basingiri,* simwasi ngoko eribya mwira w’ekihugho nibya nzighu y’oMungu? Neryo oyo wanzire eribya mwira w’ekihugho akayiyiramo nzighu y’oMungu.
5 Kutse mukalengekanaya muti Amasako akateba omughulu akabugha ati: “Omutima* owali omw’inywe akabya inianemuyitsutsa kutsibu ebindu mbiriri-mbiriri”?
6 Aliwe, olukogho olo oMungu akatukanganaya ni lunene kutsibu. Neryo Amasako akabugha ati: “OMungu akalwa n’abakayiheka, aliwe akakanganaya olukogho lwiwe abandu abakayikehaya.”
7 Neryo, muyikehaye embere* sy’oMungu, aliwe mulwe na Diabolo, neryo akendibasagha.
8 Museghere hakuhi n’oMungu, naye akendiseghera hakuhi nenyu. Mweraye ebyala byenyu, inywe bakoli b’amalolo, kandi mweraye emitima yenyu, inywe mukatika-tika.
9 Mususumane, mukwe obulighe n’erilira. Amaseka wenyu abye kiriro, n’obutseme bwenyu bubye bulighe.
10 Muyikehaye embere sya Yehova,* neryo akendisyabahira omo mwanya w’endata.
11 Baghala betu, muleke eribughanako muhanda. Oyukabugha muhanda oko mulikyabo kutse oyukatswera omulikyabo akabya iniakabugha muhanda oko mighambo, kandi akabya iniamatswera emighambo. Neryo wamatswera emighambo, ni bugha ambu, isighulikwamayo, aliwe ighuli mutsweri.
12 Hali omundu mughuma musa Oyukahiraho Emighambo kandi iye yo Mutsweri. Iye yo wangatoka erisabula n’eritoghotya. Aliwe iwe, ulindi eritswera mulikyenyu?
13 Neryo muhulikirire, inywe mukabugha muti: “Munabwire kutse omungya tukendisyaghenda omo muyi mulebe, tukendisyabughayo omwaka mughuma, tukendisyakolerayo ekomerse, neryo itwabana esyofranga,”
14 aliwe isimwasi amaisa wenyu ng’akendisyabya ati omungya. Muli ng’oluhohe olukahuluka omo katambi kake n’erilw’ilwabulirana.
15 Omo mwanya w’ekyo, ritolere imwabya mukabugha muti: “Yehova* amanza, itukendisyabyaho n’erikola kino kutse kirya.”
16 Aliwe, mukayihalamba n’eriyiheka kutsibu. Eriyihalamba eryo siryuwene.
17 Neryo omundu amabya inianasi ekyuwene, aliwe iniatakolakyo, aho iniamakola erilolo.
Amaelezo awehikwa
^ Kinywa kwa kinywa, “omo bitsuko by’oko mubiri wenyu.”
^ Kutse “abandu abakaleghula.” Kinywa kwa kinywa, “abakali basingiri.”
^ Kutse “Ekirimu.”
^ Kutse “muyihire omo byala by’oMungu, mwowe ebyo oMungu akababwira.”
^ Ulebaye endomeko A5.
^ Ulebaye endomeko A5.
