Yobu 1:1-22
1 Omo kihugho kye Uzi mwabya omulume oyo wabya akahulawa mo Yobu.* Abya mulume oyutunganene kandi oyuluyirirene;* iniakakenga oMungu n’erisagha ekibi.
2 Abya n’abana b’obulume 7 n’abana b’obukali basatu.
3 Abya atungire esyombuli 7 000, esyongamia 3 000, esyonde 1 000, n’esyopunda* 500, kandi abya n’abaghombe bangyi kutsibu. Neryo mwabya mukulu omo kati-kati k’abandu bosi b’ekihugho ky’eyo eryuba likasira.
4 Abaghala biwe bosi ibakakola efete obuli mundu ewiwe oko kiro* kiwe. Ibakabirikira abali babo basatu base banywe n’erirya haghuma nabo.
5 Abosi ibakabya babibugha erikola esyofete, Yobu iniakabirikirabo busana n’eryeryabo. Neryo iniakabuka omo tututu iniaherera obuhere bw’eryokererya busana n’obuli mughuma wa kubo. Kusangwa Yobu iniakabugha ati: “Abaghala baghe banganabya imubakahalaya n’eritsuma oMungu omo mutima wabo.” Yobu kw’abya akakola atya.
6 Neryo ekiro mukyahika omughulu abaghala b’oMungu* w’ekwenene bingira erihangana embere sya Yehova. Sitani naye mwingira omo kati-kati kabo.
7 Neryo Yehova mwabulya Sitani ati: “Ukalua hayi?” Sitani mwasubirya Yehova ati: “Ngalua eritimba-timba omo kihugho n’erilaba-laba mukyo.”
8 Neryo Yehova mwabulya Sitani ati: “Mughukanalola* oko mughombe waghe ye Yobu? Oko kihugho sikuli omundu oyuli nga ye. Ni mulume oyutunganene kandi oyuluyirirene,* akubaha oMungu kandi akasagha ekibi.”
9 Neryo Sitani mwasubirya Yehova ati: “Yobu akakengera oMungu yo busa kwe?”
10 Wabirimutimbyako oluba* lw’obuteya, iye n’ekihanda* kiwe n’oko byosi ebyo awite. Wabiritsumula omubiiri w’ebyala biwe, n’omutungo wiwe abirikanyirira omo kihugho.
11 Nikwa eribindula emyatsi, ukakaye ebyala byaghu, umulusayeko ebyosi ebyo awite, ulangire kwenene-kwenene nga syendikutsuma embere sy’obusu bwaghu.”
12 Neryo Yehova mwasubirya Sitani ati: “Lebaya! Ebyosi ebyo awite biri omo byala byaghu.* Ekighuma kisa isiwahira ebyala byaghu oko mubiri wiwe!” Neryo Sitani mwaghenda, amalua embere* sya Yehova.
13 Neryo kiro kighuma, abaghala biwe n’abali biwe ibanemulya n’erinywa edivai omo nyumba y’omughala wabo mukulu,
14 omukwenda mwasa eyiri Yobu n’erimubwira ati: “Esyonde silue isinemulima n’esyopunda isinemulira hakuhi nasyo,
15 neryo Abasabea mubakayighusa musyo n’eritwalasyo, kandi mubakita abaghombe omo muyali. Ingye musa n’ingye niryabala erisyakubwira.”
16 Iniakinabugha, oghundi mwasa. Mwabugha ati: “Omuliro w’oMungu* mwakawa erilua elubula amaghulumira ahali esyombuli n’ahali abaghombe. Mwakatimaya ebyosi! Ingye musa n’ingye niryabala erisyakubwira.”
17 Iniakinabugha, oghundi mwasa. Mwabugha ati: “Abakaldayo mubakayiyira mo milondo isatu neryo bamahunga esyongamiya n’eritwalasyo, kandi mubakita abaghombe omo muyali. Ingye musa n’ingye niryabala erisyakubwira.”
18 Iniakinabugha, oghundi naye mwasa n’eribugha ati: “Abaghala baghu n’abali baghu balue ibanemulya n’erinywa edivai omo nyumba y’omughala wabo mukulu.
19 Omw’itsumbukania, ekihunga kinene mukikalua omo mbwarara. Mukikayiswiraya oko syongonde* ini sy’enyumba, yamaterera oko bana, nabo babirihola. Ingye musa n’ingye niryabala erisyakubwira”
20 Neryo Yobu mwahangana amatula olukimba lwiwe n’erisisa esyonzwiri sy’oko mutwe wiwe; neryo mwawa oko kitaka amatulama,
21 n’eribugha ati:
“Munalua omo nda ya mama waghe iniri ndumbu,Kandi ngendisyasubula iniri ndumbu.
Yehova abirimba, kandi Yehova abirinisaghula.
Erina rya Yehova rilole embere eripipwa.”
22 Omo byosi ebi, Yobu mwatakola erilolo kutse erihandikirirya oMungu ati akolire nabi.*
Amaelezo awehikwa
^ Alinga likamaanisaya “ekindu ekyo bakakwa obusu.”
^ Kutse “omundu oyuteko olubanza kandi oyutunganene.”
^ Kinywa kwa kinywa, “esyopunda sy’obukali.”
^ Kutse “oko nyumba y’obuli mundu ekiro kiwe kikahika.”
^ Akasimo k’Ekiebrania akakakolesibawa eryahula abaghala b’oMungu, abamalaika.
^ Kinywa kwa kinywa, “mughukanahira omutima waghu oko.”
^ Kutse “omundu oyuteko olubanza kandi oyutunganene.”
^ Kutse “ekikunda.”
^ Kutse “enyumba.”
^ Kutse “omo butoki bwaghu.”
^ Kinywa kwa kinywa, “embere sy’obusu bwa.”
^ Kutse alinga, “akarabyo; obupalyo.”
^ Kutse “esyosonda; coins.”
^ Kutse “eryahulirya oMungu y’omwatsi wosi-wosi owatuwene.”