Yobu 10:1-22
10 “Ngakwa engebe yaghe y’esyonye.*
Ngendiyilungumula ngayilakirako.
Ngendibugha omo bukalihe bw’amaghali* waghe!
2 Ngendibwira oMungu niti: ‘Isiwabugha uti nyiriko olubanza.
Umbwire ekikaleka iwalwa naghe nga niki.
3 Eryaghalya rikanakuletera endundi,Eripona omubiiri w’ebyala byaghuIghunemutsumula emipango y’ababi?
4 Uwite ameso w’omubiri,Kutse ukalangira ng’omundu oyukahola kwehi?
5 Ebiro byaghu bine ng’eby’abandu abakahola,Kutse emyaka yaghu yine ng’ey’omundu,
6 Ekyangaleka iwasondya ebibi byagheN’eribera erisondekania erilolo ryaghe?
7 Unasi ko sindiko lubanza;Kandi sihali oyo wanganilusya omo byala byaghu.
8 Ebyala byaghu ibibyene-byene mubyanyibumba n’erinyihangyika,Nikwa lino wanzire erinibughaho.
9 Kisi, wibuke ngoko wanyibumba omw’ibumba,Nikwa lino ukanisubaya omo lututu.
10 Mughutanyutula ng’amasabu kwehiN’erinyikamatya ng’amasabu awakamatire?*
11 Muwanyambalya omubiri n’engoba,Kandi muwanyiluka omo makuha n’emisisa.
12 Wabiriniha engebe n’olwanzo oluteleghula;*Wabiriteya ekirimu* kyaghe omw’itsomana lyaghu.
13 Nikwa omo bubiso-biso muwapangire erikola emyatsi eyi.*
Ninasi ngoko emyatsi eyi ikalua okw’iwe.
14 Namakola erilolo, ighukendinilangira,Kandi isiwendinibughako olubanza lw’ebibi byaghe.
15 Namabya iniriko olubanza, bulighe okw’ingye!
Kandi nomo nangabya isiniriko lubanza, sinangasumba omutwe waghe,Kusangwa nyoswire n’esisoni n’amaghali.
16 Namasumba omutwe waghe, ukanihigha ng’endale.*
Kandi ukatasyakanganaya amaka waghu erilwa naghe.
17 Ukaleta abimiri bahya-bahya bakanihandikiriraN’erikanyirirya erihitana lyaghu okw’ingye,Amaligho akanyihikira awandi oko wandi.
18 Neryo ekyaleka iwanilusya omo nda niki?
Ngambe nahola isihalihabya eriso erikanilolako.
19 Nangabere nga sindinatabyaho;Nangaluire omo nda n’erilw’inatwalwa omw’isinda.’
20 Ebiro byaghe si bike? Anileke;Aleke erinitungerera nitaluhuka hake*
21 Embere nyighende—kandi sinendisyasubula—
Omo kihugho ky’omwirimya w’enyahinda,*
22 Omo kihugho ky’omwirimya owakalire,Ekihugho ky’ekitsutsu kinene n’ekiri kitya-kitya,Eyo nibya, n’ekyakakala kiri ng’omwirimya munene.”
Amaelezo awehikwa
^ Kutse “enafsi yaghe ikakwa esyonye.”
^ Kutse “omo bukalihe bw’omutima waghe.”
^ Kutse “efromaje.”
^ Kutse “olwanzo olutyusa.”
^ Kutse “omuka; engebe.”
^ Kinywa kwa kinywa, “emyatsi eyi wabiribisayo omo mutima waghu.”
^ Kutse “esimba.”
^ Kutse “nitatsanga hake.”
^ Kutse “ekitsutsu ky’omwirimya n’oluholo.”
