Yobu 14:1-22
14 “Omundu oyukabutawa n’omukali,Akabyaho ebiro bike kandi ebiro biwe byoswire m’obulighe.*
2 Akahuluka ng’omusanga neryo inyuma;*Akatibita ng’ekitsutsu n’eribulirana.
3 Inga, wabirimuhandako eriso lyaghu,Kandi ukamuleta* eritonda naghu.
4 Oyo wangalusya omundu oyo werire omo mundu oyuterire nindi?
Sihali oyo wangatoka!
5 Ebiro biwe byamabya ibyabirisohwa,Iwe uwite emighanzo y’emisi yiwe;Wabirimuhiriraho olubibi uti isyalaba kulo.
6 Uleke erimuhandako eriso, aluhuke;Erihika omughulu akabugha ebiro biwe ng’omuhingyi.
7 Kusangwa nibya hali amaha busana n’omuti.
Amabikondwa, akatasyalasa,N’amasasa wagho akalola embere erikula.
8 Emirihi yagho yamakula omo kitakaN’ekisiki kyagho ikyaholera omo kitaka,
9 Oko kikumbo ky’amaghetse akasako amasasa;N’eryasako amatahi ng’omuti muhya-muhya.
10 Nikwa omundu akahola iniayilambika isyakiwite ekyo angakola;Omundu amabihola akabya iniali hayi?
11 Amaghetse akabulirana omo ngetse,N’olusi lukasenda iluma.
12 Kutya omundu akayilambika, syalisyahangana.
Sibendisyabuka erihika omughulu ekyanya kikendisyabulirana,Kutse sibendisyabukibwa omo tughotseri twabo.
13 Kyanguwana wamanyibisa omw’Isinda,*Iwanibisa erihika aho erihitana lyaghu rikendilabira,Iwanyihiriraho endambi neryo iwanyibuka!
14 Omundu amahola, anganatasyabyaho kwehi?
Omo biro byosi by’omubiiri waghe w’erikasirwako ngendisyalindaErihikira aho eriluhukira lyaghe rikendisyasira.
15 Ukendisyabirikira, naghe ngendisyakwitaba.
Ukendisyakandira* omubiiiri w’ebyala byaghu.
16 Nikwa lino ukabera erighanza ebika byaghe byosi;Erilolo lyaghe lisa lyo ukatungerera.
17 Ekibi kyaghe kyabiriboherwa omo ngunza,Kandi ukaboha erilolo lyaghe omo nimba.
18 Ngoko ekitwa kikanatwika n’eripanzikanaKandi ngoko eribwe rikanalusibawa aho waryo,
19 Ngoko amaghetse akasenzegheta amabweKandi ngoko eribwagha lyagho rikasendaya omutaka w’ekihugho,Ko wabiribughaho utya amaha w’omundu oyukahola.
20 Ebiro byosi ukabera erimukinda erihika okw’ibulirana liwe;Ukabindula erilangirika liwe, n’erimuleka aghende.
21 Abana biwe bakabana olukengerwa, nikwa syaliminyakyo;Bakaghonerawa, nikwa syaliminyakyo.
22 Omughulu akine omo mubiri wiwe, mo mughulu akowa obwaghali;Omughulu akiriho mo mughulu akalira.”*
Amaelezo awehikwa
^ Kutse “byoswiremo n’erihangya-hangya.”
^ Kutse alinga, “iniatwibwa.”
^ Kinywa kwa kinywa, “ukanileta.”
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
^ Kutse “ukendisyakwa olukando; ukendisyayitsutsa.”
^ Kutse “enafsi yiwe.”