Yobu 15:1-35
15 Elifazi Omutemani mwasubirya ati:
2 “Omundu w’amenge anganasubirya omo binywa ebikayiwako* kwehi;Kutse anganusulya omo ribunda liwe mw’erihunga ry’eyo eryuba likasira?
3 Erikunga omo binywa buyira siriwite ndundi,N’erikania lisa siriwite mughaso.
4 Kusangwa ukapokaya eryubaha oMungu,Kandi ukakehaya eritsomana oMungu.
5 Kusangwa ekibi kyaghu kyo kikakubughisaya ebyo ukabugha,*Kandi ukasombola ebinywa by’obutebya.
6 Obuno bwaghu bo bunemukuhandikirirya, butsira ingye;Eminywa yaghu iyiyene-yene ikatulagho ngoko uli w’amakosa.
7 Iwe na mundu w’erimbere oyo watsuka eributwa kwehi,Kutse n’iwe watsuka eributwa embere sy’ehitwa?
8 Ukanahulikirira emikania y’oMungu ey’ekumbo* kwehi,Kutse n’iwe musa oyuwite amenge?
9 Wasi byahi ebyo tutasi?
Ni kyahi ekyo wabiriminya ekyo tute twataminya?
10 Omo kati-kati ketu hali ab’esyombwi n’abasyakulu,Abalume bakulu n’oko baba waghu.
11 Erikirania ly’oMungu sirikutosire,Kutse ebinywa ebihe-here ebyo ukabwirawa?
12 Busanaki omutima waghu akakutwala hali,Kandi busanaki obuhitane bukaka omo meso waghu?
13 Kusangwa ukabindula ekirimu kyaghu erihitana oko Mungu iyuwene-wene,Kandi ukaligha ebinywa ebiri ng’ebi erilua omo buno bwaghu.
14 Omundu oyukahola niki atoke eribya oyo werire,Kutse owosi-wosi oyukabutawa n’omukali atoke eribya mutunganene?
15 Lebaya! Syayiketere n’ababuyirire biwe,Nibya n’ekyanya sikyerire omo meso wiwe.
16 Neryo ibwa byangabya biti oko mundu oyukita nye kandi oyutsandire,Omundu oyukanywa ebibi ng’amaghetse!
17 Unihulikirire; ngendikubwira!
Ngendikania ebyo nabirilolako,
18 Emyatsi eyo abandu b’amenge babiribugha,Emyatsi eyo abo baba wabo babwirabo,Nabo sibetahunirayo.
19 Ibo basa bo bahabawa ekihugho,Isihali n’omubunga n’omughuma oyo walaba omo kati-kati kabo.
20 Omundu mubi akabya omo maghali omo biro biwe byosi,Emyaka yosi eyabiriteghekanibwa busana n’omunubya.
21 Amatwi wiwe akowa emilenge y’eryubahya;Omo mughulu w’obuholo, abanyeyi bakamubambira.
22 Syalibya n’obwikirirya ng’anemwendibala oko mwirimya;Abiribikirwa omuyali.
23 Akaghanga-ghanga akasonda akalyo*—ibwa kali hayi?
Anasi ndeke ngoko ekiro ky’omwirimya kiri hakuhi.
24 Amaligho n’obulumi bikamubahisaya mughulu wosi;Bikamukinda ng’omwami oyuyiteghekenie ndeke erilwa.
25 Kusangwa akasumba ebyala biwe erilwa n’oMungu iyuwene-weneN’erisonda eriyisamambula* oko Mutoki w’Ebyosi;
26 Omo righundu, akanguha eriyikya okw’iye,Iniane n’engabo yiwe nene eyiwatire;*
27 Obusu bwiwe ni bisabu bisa-bisa,N’embindi yiwe yabiriyinenehera omo bisabu;
28 Ikere omo miyi eyikendisyaheribwa,Omo manyumba awatendisyikalamo mundu,Awakendisyabya bilundo by’amabwe.
29 Syendisyabya muteke, n’obuteke bwiwe sibwendisyakanyaKutse ebindu biwe sibyendisyakanyirira omo kihugho.
30 Syendisyabala oko mwirimya;Ekirimi kikendisyumya erisasa* riwe,Kandi akendisyahwaho omw’ibuhirira ly’omukaOwakalua omo buno bw’oMungu.*
31 Syatolere erikita n’eriyiketera emyatsi eyitawite mughaso,Kusangwa ekyo akendisyalusyamo sikyendisyabya na mughaso;
32 Kikendisyakoleka embere w’ekiro kiwe,N’emitahi yiwe siyendisyuwana n’ahake.
33 Akendisyabya ng’omuliki w’omuzabibuOwakalaghalaya emizabibu yagho eyite yera,Kandi ng’omuti w’omuzeituni owakalaghalaya omusanga wagho.
34 Kusangwa endeko y’abatekenga oMungu* ni nyighumba,N’omuliro akendisyahisya amahema w’ekyutuliro.
35 Bakaheka obuhanya mo bukule ibabuta ekibi,N’enda yabo ikabuta obutebya.”
Amaelezo awehikwa
^ Kutse “amenge awali ng’erihunga.”
^ Kutse “ekibi kyaghu kyo kikabegheraya obuno bwaghu.”
^ Kutse “ey’esiri.”
^ Kinywa kwa kinywa, “omukati.”
^ Kutse “erisonda eryikala oko.”
^ Kinywa kwa kinywa, “ehikuku-hikuku ehiwatire hy’oko ngabo yiwe.”
^ Ni bugha ambu, amaha wosi-wosi w’eritasyuwana.
^ Kinywa kwa kinywa, “wiwe.”
^ Kutse “abakayisamambula.”
