Yobu 19:1-29
19 Yobu mwasubirya ati:
2 “Mukendisyalola embere erihitania enafsi* yaghe erihika mughulu wahi,N’erinihinolera omo binywa?
3 Eno ni ngendo ye 10 imunemunitsweba-tsweba;*Simulikwa esisoni erinikolera omo bukatsu mutya.
4 Kandi namabya inabirikola ekosa,Eyo ni kosa yaghe.
5 Kandi mwamabihatikana eriyihalamba okw’ingye,N’eribugha muti ninatolere erihikirwa n’ebyo ngalabamo,
6 Neryo muminye ngoko oMungu yo wabiriniherya,Kandi yo wabirinihamba omo butimba bwiwe obo akahighamo.
7 Mulebaye! Ngabera erilaka niti ‘Obutsumbu-tsumbu!’
Aliwe siniribana ekisubiryo;Ngabera erilaka ngasaba obuwatikya, aliwe sihali bulingirirania.
8 Abiriliba enzira yaghe omo luhimbo lw’amabwe, sinangatoka erilaba;Abiriswika esyonzira syaghe omo mwirimya.
9 Abirinilusyako olukengerwa lwagheKandi abirilusya embita oko mutwe waghe.
10 Abirinihimbula oko mbande syosi erihika okw’ihwererera lyaghe;Akakula amaha waghe ng’omuti.
11 Erihitana liwe likanighulumirako,Kandi akanilangira mo nzighu yiwe.
12 Abasuda biwe bakahindana haghuma n’erinibambira,Kandi bakatimbaya ekambi oko hema yaghe.
13 Abirihighira abaghala betu bo hali okw’ingye,N’abanyasi babirinisigha.
14 Abira baghe ba hakuhi* babirighenda,N’abo nabya nyasi ndeke babirinibirirwa.
15 Abagheni abali omo nyumba yaghe n’abaghombe baghe b’obukaliBakanyighanza ng’ow’ehandi;Niri w’ehandi omo meso wabo.
16 Ngabirikira omughombe waghe, aliwe iniatitaba;Ngamulemba-lemba omo buno bwaghe niti anikwire obulighe.
17 Omuka waghe abiribya nye oko mukali waghe,Kandi niri kikumbo ekituwene oko baghala betu.*
18 Nibya n’abana balere bakanipona;Ngabya nahangana, ibanisekererya.
19 Abira baghe bosi ba hakuhi bakanikwa esyonye,N’abo nabya nyanzire babirinibindukira.
20 Amakuha waghe akamakirira oko ngoba yaghe n’oko minyoku yaghe,Kandi ngabala n’engobi y’ameno* waghe.
21 Bira baghe, munikwire obulighe, munikwire obulighe,Kusangwa ebyala by’oMungu ibibyene-byene byabirinitulako.
22 Busanaki mukabera erinyendererya ngoko oMungu akanyendereraya,Erilwa naghe butsira eryumbya?*
23 Ebinywa byaghe nga binalyatahandikawa,Ko bilue ibyanganatahandikwa omo kitabu!
24 Nga binalyatagheghawa oko lukuka kera na kera,Ibyaghewa omo kalamu k’ekyuma n’ak’erisasi!*
25 Kusangwa ninasi ndeke-ndeke ngoko omulamya* waghe aneho;Akendisyasa enyuma, iniahangana oko kihugho.*
26 Engoba yaghe ikendisyabya yabitsandibwa yitya,Inikine omo mubiri waghe, ngendisyalangira oMungu,
27 Oyo ngendisyayilangirira ingyuwene-wene,Oyo ameso waghe ano akendisyayilangirira, butsira aw’oghundi mundu.
Nikwa emwisi waghe ngayowa inilitoherwe!*
28 Kusangwa mukabugha muti, ‘Twamamwendererya tuti kwe?’
Kusangwa n’ingye nitsukireko olubanza.
29 Nenyu mubahe omuyali,Kusangwa omuyali akaletera erisuyira oko malolo;Litolere imwaminya ngoko hali omutsweri.”
Amaelezo awehikwa
^ Kutse “erinihitania.”
^ Kutse “erinitsumanga.”
^ Kutse “abatunga.”
^ Kinywa kwa kinywa, “abaghala b’enda yaghe,” ni bugha ambu, enda eyanibuta (enda ya mama waghe).
^ Kutse “ngabalira oko kasali.”
^ Kinywa kwa kinywa, “simweghambawa (simwehumawa) omubiri waghe.
^ Kutse “e plomb.”
^ Kutse “omutongolya.”
^ Kinywa kwa kinywa, “endata (eyighulu) oko lututu.”
^ Kutse “esyombiko syaghe sisikikola emwisi waghe.”
