Yobu 2:1-13
2 Enyuma sy’aho, ekiro mukyahika omughulu abaghala b’oMungu* w’ekwenene bingira erihangana embere sya Yehova. Sitani naye mwingira omo kati-kati kabo erihangana embere sya Yehova.
2 Neryo Yehova mwabulya Sitani ati: “Ukalua hayi?” Sitani mwasubirya Yehova ati: “Ngalua eritimba-timba omo kihugho n’erilaba-laba mukyo.”
3 Neryo Yehova mwabulya Sitani ati: “Mughukanalangira* omughombe waghe ye Yobu? Oko kihugho sikuli omundu oyuli nga ye. Ni mulume oyutunganene kandi oyuluyirirene,* akubaha oMungu kandi akasagha ekibi. Akinamakirire kutsibu eriluyirirana liwe, nomo unemusondya erinitsotsya nimutoghotaye* isihali ekikaleka.”
4 Nikwa Sitani mwasubirya Yehova ati: “Engobi busana n’engobi. Omundu akendisyateka obuli kindu kyosi ekyo awite busana n’engebe* yiwe.
5 Nikwa eribindula emyatsi, ukakaye ebyala byaghu, utule oko rikuha riwe, n’eritula oko mubiri wiwe, ulangire kwenene-kwenene nga syendikutsuma embere sy’obusu bwaghu.”
6 Neryo Yehova mwasubirya Sitani ati: “Lebaya! Ali omo byala byaghu!* Ekighuma kisa isiwatula oko ngebe* yiwe!”
7 Neryo Sitani mwaghenda, amalua embere* sya Yehova. Mwaghusa oko Yobu kw’ebimata* ebikaluma kutsibu, eritsuka oko bulyatiro bw’ebisando biwe erihika oko kahuli-huli k’omutwe wiwe.
8 Yobu mwimya ekihasa* amabya akayihala mukyo, kandi mwikala omw’ibu.
9 Oko nduli, omukali wiwe mwamubwira ati: “Ukinamakirira kutsibu eriluyirirana lyaghu? Utakire oMungu, uhole!”
10 Aliwe mwamusubirya ati: “Ukabugha ng’omughuma w’oko bakali bakiru. Litolere itwangirira oko Mungu w’ekwenene kw’ebibuya bisa-bisa itwaghana eryangirira ebituwene kwehi?” Omo byosi ebi Yobu mwatahalya omo minywa yiwe.
11 Abira* basatu ba Yobu mubowa oko maligho wosi awabirimuhikira. Neryo obuli mughuma wa kubo mwasa erilua ewiwe—Elifazi Omutemani, Bildadi Omusuhi, na Zofari Omunaamati. Mubalaghana erihindana haghuma n’erighenda eriyawa oko Yobu n’erimukirania.
12 Babere babimulangira ibakine ekyaswa, mubatamuminyerera. Neryo mubatsuka erilira kutsibu n’eritulanga esyongyimba syabo. Kandi mubaghusa olututu l’omo kyanya n’oko mitwe yabo.
13 Neryo mubikala ahisi haghuma naye omo biro 7 omo musibo n’omo kiro. Sihali oyo wamubwira ekinywa n’ekighuma, kusangwa mubalangira ngoko obwaghali bwiwe ni bunene kutsibu.
Amaelezo awehikwa
^ Akasimo k’Ekiebrania akakakolesibawa eryahula abaghala b’oMungu, abamalaika.
^ Kinywa kwa kinywa, “mukanahira omutima oko.”
^ Kutse “omundu oyuteko olubanza, n’oyutunganene.”
^ Kinywa kwa kinywa, “nimumere.”
^ Kutse “enafsi.”
^ Kutse “omo butoki bwaghu.”
^ Kutse “enafsi.”
^ Kinywa kwa kinywa, “embere sy’obusu bwa.”
^ Kutse “ebironda ebikalire kutsibu.”
^ Kutse “oluyo.”
^ Kutse “abaminyene naye.”