Yobu 21:1-34
21 Yobu mwasubirya ati:
2 “Muhulikirire ndeke ekyo ngabugha;N’eki kibye erikirania eryo mukamba.
3 Muhande omutima ngabugha;Ngendibya nabibugha eribugha, neryo imwangananisekererya.
4 Eriyilakirako lyaghe rilolere oko mundu kwehi?
Bilue iko biri bitya, isinendiluha* erilinda kwehi?
5 Munisamalire, musweke omw’ikukubala;Muhire ebyala by’oko muno wenyu.
6 Ngabya naghanirya kukyo, ngahanga-hangaya,N’omubiri waghe wosi akasuka-sukana.
7 Busanaki ababi bakabyaho,Ibakota n’eribya bateke?*
8 Abana babo bakabya ibane nabo mughulu wosi,Kandi bakalola n’oko bitsikulu babo.
9 Amanyumba wabo ali buholo, sibalibya omo buba,Kandi oMungu syalisuyirabo omo mutso wiwe.
10 Esyonume syabo sy’esyonde sikahakisaya ndeke.
Esyonde syabo sy’obukali sikabuta, sisiritorohaya.
11 Abana babo b’obulwana bakatibita ehihya ng’ekihyo,N’abana babo bakayitsangura-tsangura.
12 Bakiimba ibanemuwata akakeleya* n’enangaN’eritsema oko mulenge w’enyabulere.*
13 Bakalabaya ebiro byabo omo tsemeN’eriya omw’Isinda* mo buholo-holo.*
14 Nikwa bakabwira oMungu w’ekwenene bati, ‘Utuleke!’
Sitwanzire eriminya esyonzira syaghu.
15 Omutoki w’Ebyosi nindi, uti twangamukolera?
Erimuminya likendituletera endundi yahi?’
16 Aliwe ninasi ngokoSibawite obutoki bw’erileka emyatsi ibaghendere ndeke.
Amalengekania* w’omubi ali hali okw’ingye.
17 Ngendo singahi etala y’ababi ikalimibawa?
Ngendo singahi obuhanya bukabahikira?
Ngendo singahi oMungu akabaletera eritoghotibwa omw’ihitana liwe?
18 Bakanabya ng’ebiti ebyumire omo rihunga?
N’eribya ng’omusunga ogho ekihunga kikaghulukaya?
19 Erisuyira eritolere omundu, oMungu akendisyabikiralyo abaghala biwe.
Nikwa oMungu amulihe atoke eriminya ekyo.
20 Ameso wiwe ayilangirire eriheribwa liweKandi iyuwene-wene yunanywe okw’ihitana ry’Omutoki w’Ebyosi.
21 Kusangwa busanaki iniatsomana ebikendisyahikira enyumba yiweEnyuma sy’oluholo lwiweEmighanzo y’emisi yiwe yamabikehibwa?*
22 Hane oyo wangakangirirya oMungu y’amenge,*Naye iy’ukatswera nibya n’ab’endata kutsibu?
23 Omundu mughuma akahola iniakinawite amaka wiwe wosiIsyawite ekyosi-kyosi ekikamukendereraya kandi iniane omo buholo,
24 Ebihinga biwe ibinemuyitulikiramo ebisabuN’amakuha wiwe inianakala-kalire.*
25 Nikwa oghundi mundu akahola omo maghali manene,*Isyalyataghonza oko bindu ebyuwene.
26 Abosi bakendisyaghotsera haghuma omo lututu,N’emihuka ikendisyusula okw’ibo ibo bosi.
27 Mulebaye! Ninasi ndeke-ndeke amalengekenia wenyuN’esyombita esyo mukateghekanaya erinikola nabi.*
28 Kusangwa mukabugha muti, ‘Enyumba y’eseghu-seghu yiri hayi,N’ehema eyo omubi abya ikeremo yiri hayi?’
29 Simwetabulya abaghendi-ghendi kwehi?
Simwetatsopolya ndeke-ndeke ebyo bakayilangirira,*
30 Ngoko omundu mubi akalekawa oko kiro ky’obuhanyaN’eribalibwa oko kiro ky’erihitana?
31 Nindi yukendisyayihambalika okw’iyeAti akamukunga busana n’enzira yiwe,Kandi nindi yukendisyamuliha busana n’ebyo abirikola?
32 Akendisyabya atwalwa ekimbaseke,Eyisinda yiwe ikendisyateghibwa.
33 Akendisyasihirwa ebirongwe by’omutaka w’omo musya,*N’abandu bosi bakamukwamaNg’obutaghanzika bw’abaghenda embere siwe.*
34 Neryo busanaki imwanikirania omw’ikirania eritawite ndundi?
Kusangwa erisubirya ryenyu ni matebo masa-masa!”
Amaelezo awehikwa
^ Kinywa kwa kinywa, “ekirimu kyaghe.”
^ Kinywa kwa kinywa, “eribya n’amaka.”
^ Kutse “akaghoma k’omo byala.”
^ Kutse “erirenga.”
^ Kutse “Esheoli,” ni bugha ambu, eyisinda y’abandu bosi. Ulebaye Amaana w’ebinywa.
^ Kutse “omo katambi kake,” ni bugha ambu, erihola luba kandi butsira maghali.
^ Kutse “erihana; emiteghekerere.”
^ Kutse “yamabitwibwa kabiri.”
^ Kutse “erikangirirya oMungu y’ekyosi-kyosi.”
^ Kinywa kwa kinywa, “omungoso w’amakuha wiwe inianahehere.”
^ Kutse “engebe eyikalihire.”
^ Kutse alinga, “erinikolera butsira bulighe.”
^ Kinywa kwa kinywa, “ebiminyikalo.”
^ Kutse “omusya owakumamo amaghetse.”
^ Kinywa kwa kinywa, “akendisyakura abandu bosi enyuma siwe.”
