Yobu 31:1-40
31 “Nabirikola endaghane n’ameso waghe.
Neryo nangatoka niti erisamalira omubikira* omo ngumbu nyibi?
2 Namabikola ekyo, oMungu oyuli endata iniakendimba erighabo lyahi,Omutoki w’Ebyosi oyuli endata iniakendiniliha ati?
3 Amaligho syalindirire omukola-nabi kwehiN’obuhanya sibulindirire abakakola ebibi?
4 Syalilangira esyonzira syaghe kwehiN’erighanza ebika byaghe byosi?
5 Ninenatalendera omo mabehi?*
Ekisando kyaghe kinekyatanguha eriyateba?
6 OMungu anipime omo bilo by’ekwenene;Neryo akendilangira ngoko niluyirirene.
7 Ebisando byaghe byamabihera oko nziraKutse omutima waghe amabya iniabirikwama ebyo ameso waghe akalangiraKutse ebyala byaghe byamabya ibyabiritsanda,
8 Ebyo ngabiba, oghundi abye akalyabyo,N’ebyo ngahera bikulawe.*
9 Omutima waghe amabya iniabiriyitsutsa omukaliNeryo inalindirira oko lukyo lwa mulikyetu,
10 Omukali waghe abye akaswera oghundi mulume,N’abandi balume baghotsere naye.*
11 Kusangwa ekyo ikikendibya mwatsi owakita esisoni,Ekibi ekitolere erisuyirwa n’abatsweri.
12 Ikikendibya ng’omuliro owakaheraya n’eritoghotya,*Inyalya n’emirihi y’emimeya yaghe yosi.
13 Namabya imunaghana erikoleraAbaghombe baghe b’obukali kutse ab’obulume b’eritunganeneOmughulu babya bakayilungumula* okw’ingye,
14 Ingendisyayira niti omughulu oMungu akendisyanitswera?*
Ingendisyamusubirya nitiki omughulu akendisyanitondesya?
15 Oyo wanihangyika omo nda, naye yutahangyikabo kwehi?
Oyo watubumba embere tubutawe* si mughuma?
16 Namabya imunaghana eriha abera ekyo balaghirekoKutse eriita ameso w’omukwa-kali* w’obulighe;
17 Namabya imunalya akalyo kaghe k’ingyuweneButsira eriha kuko kw’esyongubi;
18 (Kusangwa eritsuka omo bulwana bwagheEngubi* muyakula haghuma naghe nga niri baba wayo,Kandi eritsuka omo bwana* nabya musondoli w’omukwa-kali.*)
19 Namabya imunalangira omundu iniali okw’iheraBusana n’eribula esyongyimbaKutse omwera oyutawite eky’eriyiswika;
20 Amabya* imwatanitsumulaIninemuyihuhya omo lukimba lw’obweya bw’esyombuli syaghe;
21 Namabya imunalinga engume yaghe busana n’engubiOmughulu yabya ikalagha oko buwatikya bwaghe oko lukyo lw’omuyi;*
22 Namabya imunakola nitya,Ebyala byaghe bitoghokale oko kitigho kyaghe,N’okuboko* kwaghe kutwikire oko ngokola.*
23 Kusangwa ingubaha obuhanya obukalua oko Mungu,Kandi isinangimana embere sy’olukengerwa lwiwe.
24 Namabya imunahira eriyiketera lyaghe omo horoKutse namabya imunabwira ehoro eyerire niti, ‘Iwe buteya bwaghe!’
25 Namabya imunayisyandira omo buteke bwaghe bungyiBusana n’ebindu bingyi ebyo natunda;
26 Namabya imunalangira eryuba* rikakoleryaKutse omughenda akaghenda omw’ikangabasania lyagho;
27 N’omutima waghe amabya imwatsotsibwa bubiso-biso,N’obuno bwaghe bwamabya imubwaha ebyala byaghe by’ebizu* busana n’eriramyabyo;
28 Eryo ini rilolo eritolere erisuyirwa n’abatsweri,Kundi aho nangabere inamaghana oMungu w’ekwenene oyuli endata.
29 Ninenatatsema enzighu yaghe ikaheribwaKutse eriyisyandira akahikirwa n’obuhanya?
30 Mundaligha obuno bwaghe bukakola eriloloOmw’isaba erilabira erilapa niti obuyingo* bwiwe buhweho.
31 Abalume b’omo hema yaghe sibetabugha bati,‘Nindi yo wangasunga owosi-wosi oyutitughuta akalyo* kiwe?’
32 Isihali ow’ehandi* oyo wabya akaghotsera ehihya;Ingakokaya oyuli omo lughendo.*
33 Ninenatasonda eribisa ebibi byaghe, ng’abandi bandu,Omw’ibisa ekibi kyaghe omo mufuko w’olukimba lwaghe?
34 Ninenatubaha ebyo abandu bakendibugha,Kutse ninenatubaha erighonerwa n’ebindi bihanda,Neryo inahuna n’erisagha erihuluka?
35 Ngahanalyatabya oyukanihulikirira!
Niryendihira ekikumo oko ebyo nabiribugha.*
Omutoki w’Ebyosi anzubiraye!
Oyukanitsongera ng’analyatahandika ebyo akanibughako omo kitabu!
36 Niryendihekakyo oko kitigho kyaghe,N’eritimbyakyo oko mutwe waghe ng’embita.
37 Niryenditonda embere sy’oMungu ngamubwira obuli kika ekyo natwa;Niryendyasa embere siwe butsiryubaha, ng’omunya-mwami.
38 Ekitaka kyaghe-kyaghe kyamabiyilungumula okw’ingyeN’ehighende hyakyo hyosi ihikendilira;
39 Namabya imunalya omukene wakyo butsir’iliha,Kutse namabya imunaleka abenyekyo* ibabula amaha;
40 Namabya imunakola ekyo, amahwa anilasire omo mwanya w’enganoN’ebiti ebikakumba muhanda omo mwanya w’ekisusu.”
Ebinywa bya Yobu byamatwirya hano.
Amaelezo awehikwa
^ Kutse “omumbesa.”
^ Kutse alinga, “haghuma n’abandu abatebugha ekwenene.”
^ Kutse “olubuto lwaghe lukulawe.”
^ Kinywa kwa kinywa, “bamukukameko.”
^ Kinywa kwa kinywa, “erirya (eritomera) erihika okw’itoghotya.”
^ Kutse “omughulu babya n’olubanza.”
^ Kinywa kwa kinywa, “omughulu akendisyahangana.”
^ Kinywa kwa kinywa, “oyo watubumba omo nda.”
^ Kinywa kwa kinywa, “erileka ameso w’omukwa-kali iniahumbera.”
^ Kinywa kwa kinywa, “iye.”
^ KInywa kwa kinywa, “erilua omo nda ya mama waghe.”
^ Kinywa kwa kinywa, “iye.”
^ Kinywa kwa kinywa, “esyondungu siwe.”
^ Kutse alinga, “omughulu nabya n’obuwatikya oko lukyo lw’omuyi.”
^ Kutse “amakuha w’oko bitigho.”
^ Kutse “okuboko kwaghe kutwikire oko ngunyiro yako; kutwikire oko likuha lyako ly’endata.”
^ Kinywa kwa kinywa, “ekyakakala.”
^ Kutse “bwamabya imubwalyatsirira.”
^ Kutse “enafsi.”
^ Kinywa kwa kinwya, “enyama.”
^ Kutse “omubunga.”
^ Kinywa kwa kinywa, “ingakingulira oyuli omo lughendo y’esyongyo syaghe.”
^ Kutse “esinyatire yaghe y’eyi.”
^ Kutse “esyonafsi sy’abenyekyo.”
