Yobu 36:1-33
-
Elihu amahalamba obukulu bw’oMungu obutebwangayiteghereribwa (1-33)
36 Elihu mwatomekako ati:
2 “Utasyamba akatambi ngakania oko myatsi,Kusangwa nikinawite ebinywa by’eribugha busana n’oMungu.
3 Ngendikania ndeke-ndeke oko byosi ebyo nyasi,Kandi oyo wanihangyika yo ngendimira ko ni mutunganene.
4 Oko kwenene ebinywa byaghe si by’amabehi;Oyuhika-hikene omo menge ane hano embere syaghu.
5 Oko kwenene, oMungu ni w’amakaKandi syalilekeranaya omundu n’omughuma;Obutoki bwiwe bw’eriyiteghererya* emyatsi ni bunene.
6 Syalileka ababi bakalola embere eribyaho,Nikwa akaha abakanuba b’eritunganene.
7 Syalilusaya ameso wiwe oko batunganene;Akasingayabo haghuma n’abami,* neryo ibahamibwa kera na kera.
8 Nikwa bamabibohwa omo minyororo*N’erihambwa omo bikoba by’amaghali,
9 Akabisulirabo ebyo balyakola,Ebibi ebiryaluira omo miyiheko yabo.
10 Akahundula amatwi wabo batoke eryowa erihabulwaN’erihanabo ati babinduke baleke ebibi.
11 Bamabimowa n’erimukolera,Ibakendisyabugha ebiro byabo omo mbolere,N’emyaka yabo iyikendisyabya eyikatsemesaya.
12 Nikwa bamatendyowa, ibakendisyahera omo muyali*N’erihola butsira amenge.
13 Abatekenga oMungu* omo mutima wabo bakabika ekinigha.
Sibalilaka bati abawatikaye nibya n’omughulu akabohabo.
14 Bakahola* ibakine balere,Omw’ibyaho lyabo lyosi,Bakalabaya* engebe yabo haghuma n’abambalaka b’obulume b’omo hekalu.
15 Nikwa oMungu* akalamaya ab’obulighe omo bulighe bwabo;Akahundula okutu kwabo omughulu bakanuba.
16 Akakulamaya ighukisiya iwingira omo bulighe*Iniakuleta omo mwanya munene, owatemo ebikakuhamba-hamba,Na busana n’erikukirania emesa yaghu ikendisyabyako akalyo akuwene kutsibu.
17 Neryo ukendisyatsemera eritswera erikendisyahikira ababi,Omughulu eritswera rikendisyaluaN’omughulu eritunganene rikendisyasikibwa,
18 Nikwa uyiteghaye erihitana lyaghu isilyakukolaya okw’ibya mutsibu,*Kandi isiwaleka ekyutuliro* kinene kikakukitya oko nzira.
19 Erilaka lyaghu ukasaba obuwatikyaKutse eriyikasa lyaghu ryosi-ryosi lyanganakulamya oko buligho?
20 Isiwakandira ekiro,Omughulu abandu bakabulirana aho balue.
21 Uyiteghaye ukasyabinduka eriyakola ekibi,Ukasyasombola ekyo omo mwanya w’amaligho.
22 Lebaya! OMungu ali endata busana n’amaka wiwe;Hane oghundi mukangirirya oyuli ngaye?
23 Nindi yo wangamubwira* ekyo angakolaKutse erimubwira ati, ‘Ekyo ulyakola sikyuwene’?
24 Isiwibirirawa eripipa omubiiri wiwe,Ogho abalume babiriimba.
25 Abandu bosi babirilangiragho,Omundu oyukahola akalangiriragho hali.
26 Inga, oMungu ni mukulu kwilaba ngoko tukalengekanaya;Emighanzo y’emyaka yiwe siyangowika.*
27 Akakuma-kuma amatondi w’amaghetse;Akamatanira omo bitu biwe neryo iniabya mbula;
28 Neryo ebitu bikutula amaghetse ayo;Ibyutika mo mbula oko bandu.
29 Hane oyo wangaminya eriyisanza ry’ebitu,Emilumo eyikalua omo hema* yiwe?
30 Langira ngoko akasanza kuyo kw’akarabyo* kiweN’eriswika emitobero* y’engetse.
31 Erilabira ebi, akaha* abandu ebyo balaghireko;Akabaha akalyo omo bungyi.
32 Akaswika akarabyo omo byala biwe,Akasondolako aho anzire ikayiswirya.
33 Omulumo wiwe akatula omwatsi wiwe,Nibya n’esyonyama sikatulagho oyukasa nga nindi.*
Amaelezo awehikwa
^ Kinywa kwa kinywa, “omutima.”
^ Kutse alinga, “akasingaya abami.”
^ Kutse “amahulula.”
^ Kutse “ekyamano ky’amalwa (omusoha).”
^ Kutse “abakayisamambula.”
^ Kutse “esyonafsi syabo sikahola.”
^ Kutse alinga, “bakabughira engebe yabo.”
^ Kinywa kwa kinywa, “Iye.”
^ Kutse “oko mukeketyo w’obulighe.”
^ Kutse “eribanda oko byala omo kaghonero.”
^ Kutse “akanyaka.”
^ Kutse alinga, “yo wangamukubungula; yo wangamutondesya.”
^ Kutse “siyangayiteghereribwa.”
^ Kinwya kwa kinywa, “akabalalayi.”
^ Kinwa kwa kinywa, “ekyakakala.”
^ Kinywa kwa kinywa, “ahatsukire engetse.”
^ Kutse alinga, “akalwira oko.”
^ Kutse alinga, “nga niki kyo kikasa.”
