Yobu 42:1-17
42 Neryo Yobu mwasubirya Yehova ati:
2 “Lino nabiriminya ngoko ukatoka erikola emyatsi yosiKandi ngoko sihali ekiri omo malengekania waghu ekyo ute wangatoka erikola.
3 Muwabugha uti,‘Oyu nindi oyukaliba-libanaya erihana lyaghe butsira bwenge?’
Neryo munabugha, aliwe omo bukiruOko myatsi y’eriswekera kutsibu okw’ingye, emyatsi eyo nitasi.
4 Muwabugha uti, ‘Ngakusaba, unihulikirire, naghe ngendibugha.
Ngendikubulya amabulyo, neryo naghu ukendimbwira.’
5 Amatwi waghe abiryowa engulu yaghu,Nikwa lino ngakulangira omo meso waghe.
6 Busana n’ekyo, namayikubya* b’omo busana n’ebyo nabugha,Kandi namayisubako omo lututu n’omo ribu.”
7 Yehova mwabya abibwira Yobu y’ebinywa ebi, Yehova mwabwira Elifazi Omutemani ati:
“Erihitana lyaghe likaghulumira okw’iwe n’oko bira baghu babiri, kusangwa simwetanibughako eby’ekwenene ng’omughombe waghe Yobu.
8 Neryo mwimaye esyonume 7 sy’esyonde n’esyombangale 7, mughende eyiri omughombe waghe Yobu, muherere obuhere bw’eryokererya busana nenyu. N’omughombe waghe Yobu akendibasabira. Oko kwenene, ngendiligha omusabe wiwe,* neryo sinendibakolera erikwamana n’obukiru bwenyu, kusangwa simwetanibughako eby’ekwenene ng’omughombe waghe Yobu.”
9 Neryo Elifazi Omutemani, Bildadi Omusuhi, na Zofari Omunaamati mubaghenda, bamakola ngoko Yehova analayirabo ati bakole. Na Yehova mwaligha omusabe wa Yobu.
10 Yobu abere abisabira abira biwe, Yehova mwabughaho amaligho wa Yobu n’erisubya obuteke* bwiwe. Yehova mwaha Yobu y’engendo ibiri ebyo abya awite embere.
11 Abaghala babo bosi n’abali babo bosi n’abira biwe bosi ba kera mubasa eyo ali, bamalya akalyo ko haghuma naye omo nyumba yiwe. Mubamuwako n’erimukirania busana n’obuhanya bosi obo Yehova aligha bumuhikire. Obuli mughuma wa kubo mwamuha ekihande kighuma ky’efeza* n’embuka y’ehoro.
12 Neryo Yehova mwatsumula ebiro by’enyuma by’engebe ya Yobu kwilaba eby’erimbere. Neryo Yobu mwabya n’esyombuli 14 000. Esyongamiya 6 000, esyonde 2 000, n’esyopunda sy’obukali 1 000.
13 Kandi mwabya n’abandi baghala 7 n’abandi bali biwe basatu.
14 Mwahula Kanyere* wiwe mo Yemima, na Kabira* mo Keziya, na Kabugho* mo Kerene-hapuki.
15 Omo kihugho kyosi ekyo sihabya abakali babuya ng’abali ba Yobu, kandi baba wabo mwahabo omwandu haghuma n’abaghala babo.
16 Enyuma sy’emyatsi eyi, Yobu mwabyaho omo myaka 140, neryo mwalola oko bana biwe n’oko bitsikulu biwe—ebizazi* bini.
17 Oko nduli, Yobu mwahola, iniamabiyira engebe* nyiri n’eyirimo obutseme.
Amaelezo awehikwa
^ Kutse “namayisubako; namazima.”
^ Kinywa kwa kinywa, “oko kwenene ngendisumba obusu bwiwe.”
^ Kinywa kwa kinywa, “Yehova mwabindula obunyewa bwa Yobu.”
^ Ni kindu ky’obughuli ekikalua omo kitaka.
^ Kutse “omwali wiwe w’erimbere.”
^ Kutse “omwali wiwe w’akabiri.”
^ Kutse “omwali wiwe w’akasatu.”
^ Kutse “esyondengo.”
^ Kinywa kwa kinywa, “inyabirikula n’erighuta ebiro.”
