Yobu 5:1-27
5 “Tabirikira! Hane oyukakwitaba?
Nindi oko babuyirire oyo ukendisyabirikira uti akuwatikaye?
2 Kusangwa erihitana rikita omukiru,N’eritsuro rikita oyutawite amenge.
3 Nabirilangira omukiru akahanda emirihi,Nikwa aho ikere hakatakirawa aho n’aho.
4 Abana biwe sibali omo buholo n’ahake,Kandi bakahinolerawa oko lukyo lw’omuyi, isihali oyo wangalamyabo.
5 Oyukwire enzala akalya ebyo omukiru oyo akaghesa,Nomo byangabya omo mahwa akalusaya by’omo,N’obuteke bw’omukiru n’obw’abana biwe bukahambawa omo kitegho.
6 Kusangwa emyatsi eyikaghalaya siyirilasa omo lututu,N’obulighe sibulilasa erilua omo kitaka.
7 Kusangwa omundu akabutawa busana n’obulighe,Ngoko esyongulukira* sy’omuliro sikaghenda omo kyanya.
8 Nikwa nanganalemba-lemba oMungu,N’eritwala omwatsi waghe eyiri oMungu,
9 Oyukakola emyatsi minene eyite yangaminywa,Emyatsi y’eriswekera eyitawite mighanzo.
10 Akaha ekihugho ky’embula,N’erituma amaghetse omo malima.
11 Akahanganaya abolo n’erisumbirabo endata,Kandi akahanganaya abali omo bulighe babane omulamo.
12 Akaliba-libanaya esyombita sy’abandu b’amayele mabi,Neryo omubiiri w’ebyala byabo iniatalukana.
13 Akahamba ab’amenge omo mayele wabo-wabo,Neryo emipango y’abagherekania iyaliba-libana.
14 Omo musibo bakahindana omo mwirimya,Omw’itungyi bakamata-mata nga ni kiro.
15 Akalamaya oko muyali w’obuno bwabo,Inialamya abera oko byala by’ab’amaka.
16 Neryo ihabya amaha busana n’abandu b’ahisi,Nikwa akahunaya obuno bw’abatatunganene.
17 Lebaya! Omundu oyo oMungu akahabula ali n’obutseme;Neryo isiwaghana erikunga ly’oMutoki w’Ebyosi!
18 Kusangwa akaghalaya, nikwa iniaboha ebironda;Akabanda, nikwa inialamya omo byala biwe.
19 Akendisyakulamya oko malighe 6,Nibya n’obulighe bwe 7 sibwendisyakukola nabi.
20 Omughulu w’enzala akendisyakulamya siwendisyahola,Akendisyakuteya n’oko muyali omughulu w’amalwa.
21 Ukendisyateghibwa oko lulimi olukabugha emyatsi mibi,Kandi siwendisyubaha eritoghotya erikahika.
22 Ukendisyaseka obuhanya n’enzala,Kandi siwendisyasagha esyonyama sy’omoli sy’oko kihugho.
23 Kusangwa amabwe w’omw’irima syendisyakuhutalya,*N’esyonyama sy’omoli sikendisyabya omo buholo naghu.
24 Ukendisyalangira ngoko ehema yaghu yiri buholo,Ukendisyabya walebya ekihangulo kyaghu,Simwendisyabula enyama n’enguma.
25 Ukendisyayira abana bangyi,N’abitsikulu baghu bakendisyabya bangyi ng’ebiti by’omoli.
26 Ukendisyaya omw’isinda ighukinawite akaghala,Ng’emighanda y’engano eyikakuma-kumawa oko kirimo kyayo.
27 Lebaya! Twabirisosotya emyatsi eyi, ni kwenene.
Uhulikirire n’erilighayo.”
