Engulu mbuya eyahandikawa na Yohana 1:1-51
1 Oko nzuko, habya Kinywa na Kinywa abya haghuma n’oMungu kandi Kinywa abya mungu.
2 Oyu, abya haghuma n’oMungu erilua oko nzuko.
3 Ebindu byosi mubyabyaho erilabira iye kandi sihali ekindu n’ekighuma ekyahika eribyaho butsira erilabira iye.
Ekyabiribyaho
4 erilabira iye yabya ngebe. N’engebe yabya kyakakala ky’abandu.
5 N’ekyakakala kinemukolerya omo mwirimya; nikwa omwirimya syalitatoka erilimyakyo.
6 OMungu mwatuma omundu; erina liwe iyo Yohana.
7 Omulume oyu mwasa eribya mwimiri. Mwasa eritula omwatsi w’ekyakakala, abandu b’emihanda yosi batoke erikirirya erilabira iye.
8 Yohana yutabya ekyakakala ekyo, nikwa atumawa eritula omwatsi w’ekyakakala.
9 Ekyakakala ky’ekwenene ekikakoleraya emihanda yosi y’abandu kyabya ikikisigha ikyahika omo kihugho.
10 Abya* omo kihugho, n’ekihugho mukyahangyikwa erilabira iye; nikwa ekihugho mukitamuminya.
11 Mwahika omo kihugho ky’ewabo, nikwa abandu b’ewabo mubatamuligha.
12 Nikwa abosi abamukokaya n’erimwikirirya,* mwabaha akanya* k’eribya bana b’oMungu.
13 Kandi mubatabutwa n’abandu* kutse busana n’erisonda ly’omubiri kutse busana n’erisonda ly’omundu, aliwe busana n’erisonda ly’oMungu.
14 Neryo Kinywa mwabya mundu. Mwikala haghuma netu. Mwabya n’olukengerwa; olukengerwa oluli ng’olo omughala ekyusa akabya nalo erilua oko tata; kandi abya n’olukogho lunene lw’oMungu n’ekwenene.
15 (Yohana mwatula omwatsi wiwe. Mwabirikira ati: “Oyu y’oyo nahula niti, ‘Oyukasa enyuma syaghe abirinitanga embere, kusangwa atulaho embere nibutawe.’”)
16 Kandi kundi abya oswire n’olukogho lunene n’ekwenene, motwabana olukogho lunene kutsibu.
17 Kusangwa oMungu mwaha abandu b’Emighambo erilabira Musa, nikwa olukogho n’ekwenene mubyasa erilabira Yesu Kristo.
18 Sihali omundu oyo wabirilangira oMungu ekiro n’ekighuma; ekyusa, omungu oyuli hakuhi-kuhi* na Tata yo wabirimuminyikalya.
19 Eyi ye myatsi eyo Yohana abugha* omughulu Abayahudi batuma abahereri n’Abalawi erilua e Yerusalema erisyamubulya bati: “Uli ndi?”
20 Mwalw’inyasubirya butsira eritika-tika ati: “Iyehe, s’ingye Kristo.”
21 Neryo mubamubulya bati: “Neryo kwesi uli ndi? Uli Eliya?” Mwasubirya ati: “Iyehe, singye.” “Uli muminyereri?” Kandi mwasubirya ati: “Iyehe!”
22 Neryo mubamubulya bati: “Uli ndi? Utubwire, tutoke eriyasubirya abalyatutuma. Neryo uyasi mo ndi?”
23 Mwabugha ati: “Niri mulenge w’omundu oyukabirikira omo mbwarara ati, ‘Muwanaye enzira ya Yehova,’* ngoko omuminyereri Isaya anabugha.”
24 Abandu abo Abafarisayo bo batumabo.
25 Mubamubulya bati: “Wamabya isighuli Kristo, isighuli Eliya, kutse isighuli Muminyereri, neryo ukabatisaya busanaki?”
26 Yohana mwabasubirya ati: “Ingye ngabatisaya omo maghetse. Omo kati-kati kenyu munimene omundu oyo mutasi,
27 oyukasa enyuma syaghe. Sinitolere erikundula ekamba y’ebiryato biwe.”
28 Emyatsi eyi yakoleka e Betania eyisirya we Yordani, eyo Yohana abya akabatisirya.
29 Engyakya, Yohana mwalangira Yesu akasa eyo ali. Neryo mwabugha ati: “Lebaya, Ekyana ky’Embuli ky’oMungu oyukalusaya erilolo ry’ekihugho.
30 Oyu yo nahula niti: ‘Oyukasa enyuma syaghe abirinitanga embere, kusangwa atulaho embere nibutawe.’
31 Naghe nabya isinimwasi; nikwa munasa eribatisya omo maghetse, omundu oyo atoke eriminyikala oko Israeli.”
32 Kandi Yohana mwabugha ebyo alangira ati: “Munalangira ekirimu kikandaghala elubula; ikiri ng’akalikuku, n’erimubyako.
33 Nibya naghe nabya isinimwasi. Nikwa oyo wanyituma eribatisya omo maghetse mwanibwira ati: ‘Oyo ukendilangira ekirimu kikandaghalirako n’eribyako, oyo yukabatisaya omo kirimu kibuyirire.’
34 Naghe nabirilangirakyo. Kandi nabiritulagho ngoko oyu ni Mughala w’oMungu.”
35 Kandi engyakya, Yohana abya inyanimene n’abigha biwe babiri.
36 Neryo omughulu alangira Yesu inianemughenda, mwabugha ati: “Mulebaye Ekyana ky’Embuli ky’oMungu!”
37 Abigha babiri abo mubabya babyowa akabugha atya, mubakwama Yesu.
38 Neryo Yesu mwabinduka. Abere abilangira ibanamukwamire, mwabulyabo ati: “Mukasondaki?” Mubamubwira bati: “Rabi (eribindula liti, “Mukangirirya”), wikere hayi?”
39 Mwababwira ati: “Mwase muminyeho.” Neryo mubaghenda haghuma naye, bamaminya aho ikere. Neryo mubasighala naye ekiro ekyo. Yabya nga saa kumi.*
40 Oko bigha babiri abowa ebinywa bya Yohana n’erikwama Yesu, habya Andrea mughala wabo Simoni Petro.
41 Andrea mwatsuka eyiri mughala wabo ye Simoni n’erimubwira ati: “Twabiribana Masiya” (eribindula liti, “Kristo”).
42 Neryo Andrea mwamutwala eyiri Yesu. Yesu mwabya abimutungerera mwabugha ati: “Uli Simoni mughala wa Yohana; ukendyahulwa mo Kefa” (ni bugha ambu “Petro”).
43 Engyakya, Yesu mwasonda eriya e Galilaya. Mwahindana na Filipo n’erimubwira ati: “Ungwame.”
44 Filipo abya w’omo muyi we Betesaida, ewabo Andrea na Petro.
45 Filipo mwasungana na Natanaeli. Mwamubwira ati: “Twabirisunga oyukanibweko omo Mighambo ya Musa n’Amakangirirya w’Abaminyereri: Ye Yesu we Nazareti, mughala wa Yozefu.”
46 Nikwa Natanaeli mwamubulya ati: “E Nazareti yanganalua ekindu kibuya kwehi?” Filipo mwamubwira ati: “Asa, ulebaye.”
47 Yesu mwalangira Natanaeli akasa eyo ali. Mwamubughako ati: “Lebaya, oko kwenene oyu ni Muisraeli oyutemo amatebo.”
48 Natanaeli mwabulya Yesu ati: “Kwe wamaniminya uti?” Yesu mwamusubirya ati: “Embere Filipo akubirikire, mungakulangira ighunikere omo ndina y’omuti w’omutini.”
49 Natanaeli mwasubirya ati: “Rabi,* uli Mughala w’oMungu. Uli Mwami we Israeli.”
50 Yesu mwamusubirya ati: “Wamikirirya kundi namakubwira niti mungakulangira omo ndina y’omuti w’omutini? Ukendilangira emyatsi minene-minene okw’eyi.”
51 Yesu mwatasyamubwira ati: “Oko kwenene ngababwira, mukendisyalangira olubula ilunakingukere n’abamalaika b’oMungu ibanemuhetukira n’erindaghalira eyiri Omughala w’omundu.”
Amaelezo awehikwa
^ Ni bugha ambu, “Kinywa.”
^ Kutse “erikirirya omo rina liwe.”
^ Kutse “ehamuli.”
^ Kutse “n’omusasi.”
^ Kutse “oyuli oko kikuba kya Tata.”
^ Kinywa kwa kinywa, “obwimiri obo Yohana ateka.”
^ Ulebaye endomeko A5.
^ Kutse 16:00.
^ Kutse “Mukangirirya.”
