Engulu mbuya eyahandikawa na Yohana 10:1-42
10 “Kwenene-kwenene ngababwira, omundu oyutelaba omo lukyo akingira omo butsunga bw’esyombuli aliwe inyalaba omo yindi nzira, oyo ini mwibi kandi ni munyeyi.*
2 Oyukalaba omo lukyo, oyo yo mulisya w’esyombuli.
3 Omuteya w’olukyo akamukingulira, n’esyombuli sikowa omulenge wiwe. Akabirikira esyombuli siwe sy’omo mena wasyo n’erihulukiryasyo ehihya.
4 Akabya abihulukirya esyombuli siwe syosi sy’ehihya, akaghenda embere wasyo. Nasyo sikamukwama kusangwa isinasi omulenge wiwe.
5 Sisyangakwama omugheni* n’ahake, aliwe sikamusagha,* kusangwa sisyasi emilenge y’abagheni.”*
6 Yesu mwabwirabo omwatsi w’erisosekania oyu, aliwe mubatowa enzumwa y’ebyo abya akabwirabo.
7 Kandi Yesu mwasyabugha nabo ati: “Kwenene-kwenene ngababwira, ingye lukyo lw’esyombuli.
8 Abosi ababiryasa n’eribugha bati ibo ningye, ni bibi, kandi ni banyeyi; nikwa esyombuli musitowabo.
9 Ingye lukyo. Oyukingirira omw’ingye, akendisyalamibwa, akendisyabya akingira n’erihuluka n’eribana eby’erirya.
10 Ebyo omwibi akasira rye n’eriiba, eriita, n’eriherya. Ingye nabiryasa esyombuli sitoke eribana engebe, sitoke eribanayo kundu.*
11 Ingye mulisya mubuya; omulisya mubuya, akaherera engebe* yiwe busana n’esyombuli.
12 Omuhingyi oyute mulisya w’esyombuli kandi oyute mwenyesyo, akabya alangira embwa y’omoli ikasa, akasigha esyombuli n’eritibita—neryo embwa y’omoli ikabakula kusyo n’eripanza-panzasyo—
13 kusangwa ni muhingyi, neryo syalitsomana esyombuli.
14 Ingye mulisya mubuya, ninasi esyombuli syaghe, n’esyombuli syaghe sinanyasi,
15 ngoko Tata waghe ananyasi, naghe ninasi Tata; kandi ngaherera engebe* yaghe busana n’esyombuli.
16 “Kandi nyinawite oko sindi mbuli esite sy’omo butsunga obu; nasyo litolere inaletasyo, sikendisyowa omulenge waghe, isyabya kihangulo kighuma n’eribya n’omulisya mughuma.
17 Tata akanyanza busana n’omwatsi ono, kusangwa ngaherera engebe yaghe, nitoke erisyabanayo kandi.
18 Sihali oyukanisaghulayo, nikwa ngahererayo omwanza lyaghe. Niwite ehamuli y’erihererayo kandi niwite ehamuli y’erisyabanayo kandi. Tata waghe yo wanihana atya.”
19 Kandi muhabya erighabana omo kati-kati k’Abayahudi busana n’ebinywa ebi.
20 Abangyi ba kubo mubabya bakabugha bati: “Aliko embinga kandi omutwe wiwe abiritsanda. Mukamuhulikirira busanaki?”
21 Abandi mubabugha bati: “Oyuliko embinga syangabugha ebinywa ebiri ng’ebi. Embinga yanganatoka erilibula ameso w’esyondimetime kwe?”
22 Oko ndambi eyo, e Yerusalema muyabya ekiro kikulu ky’eryibuka eriherera ehekalu oko Mungu. Abya mughulu w’eritsuku,
23 na Yesu abya inyanemulendera omo hekalu omo baraza ya Solomona.
24 Neryo Abayahudi mubamutimbako, bamamubulya bati: “Ukendisyatusigha omo ghange-ghange erihika mughulu wahi kwehi? Wamabya iniwe Kristo, utubwire burora-rora.”
25 Yesu mwasubiryabo ati: “Nabiribabwira, nikwa simwetikirirya. Emibiiri eyo ngakola omo rina lya Tata waghe, ikatulagho* busana naghe.
26 Nikwa simulikiriraya kusangwa simuli mbuli syaghe.
27 Esyombuli syaghe, sikahulikirira omulenge waghe, ninasisyo kandi sikanikwama.
28 Ngahasyo engebe y’erikota. Sisyendisyaheribwa n’ahake, kandi sihali oyukendisyapurasyo omo byala byaghe.
29 Esyombuli esyo Tata waghe abirimba, silengire eyindi myatsi yosi, kandi sihali oyo wangapurasyo omo byala bya Tata.
30 Ingye na Tata, tuli mughuma.”
31 Kandi Abayahudi mubatola amabwe bati bakamughusa w’oko.
32 Yesu mwasubiryabo ati: “Nabiribakangya emibiiri mingyi mibuya eyikalua oko Tata waghe. Oko mibiiri eyo, owahi w’akaleka imwanyighusako amabwe?”
33 Abayahudi mubamusubirya bati: “Situlikughusako amabwe busana n’erikola omubiiri mubuya, nikwa busana n’eritsuma oMungu; kusangwa iwe mundu, ukayiyira mo Mungu.”
34 Yesu mwasubiryabo ati: “Sikihandikirwe omo Mighambo yenyu kiti, ‘Munabugha niti: “Muli miungu”’?
35 Amabya imwanahula abo ekinywa ky’oMungu kikatswera mo “miungu,”—kandi amasako syangabindulwa—
36 neryo ingye oyo oMungu ahighula busana n’erimukolera n’erituma oko kihugho mukabugha muti, ‘Wamatsuma oMungu,’ kusangwa namabugha niti, ‘Niri Mughala w’oMungu’?
37 Namabya isindikola emibiiri ya Tata waghe, isimwanikiriraya.
38 Aliwe namabya ininemukolayo, nomo mutanikirirye, mwikiriraye emibiiri eyo; mutoke eriminya n’erilola embere eriminya ngoko Tata ali omo bughuma naghe kandi ngoko naghe nyiri omo bughuma na Tata.”
39 Kandi mubasonda erimuhamba, nikwa mwasunukala kubo.
40 Kandi mwaya oko ghundi musirya we Yordani eyo Yohana abya akabatisirya erimbere; mwikalayo.
41 Neryo abandu bangyi mubasa eyo ali n’eribugha bati: “Yohana mwatakola ekitiko-tiko n’ekighuma, nikwa emyatsi yosi eyo abugha oko mulume oyu yabya y’ekwenene.”
42 Neryo eyo, abandu bangyi mubamwikirirya.
Amaelezo awehikwa
^ Kutse “omubandi.”
^ Kinywa kwa kinywa, “ow’ehandi.”
^ Kutse “sikatibita.”
^ Kinywa kinywa, “ab’ehandi.”
^ Kutse “eribana engebe nyiri, eyitswaghire.”
^ Kutse “obuyingo.”
^ Kutse “obuyingo.”
^ Kinywa kwa kinywa, “ikateka obwimiri.”
