Engulu mbuya eyahandikawa na Yohana 11:1-57
11 Omulume oyukahulawa mo Lazaro mwalwala. Abya we Betania, omuyi ogho Maria na mwali wabo ye Marta babya bikeremo.
2 Ye Maria oyu, yo wuta oko Mukama kw’amaghuta awakakumba ndeke, n’erisangula ebisando by’Omukama omo nzwiri siwe. Ye Lazaro omughala wabo, yo wabya alwere.
3 Neryo abali babo Lazaro mubalayira oko Yesu bati: “Mukama, omwira waghu w’oko mutima alwere.”
4 Aliwe Yesu abere abyowa eki mwabugha ati: “Endwala eyi si y’erikolya oko luholo; aliwe ni y’erileka oMungu inyapipwa, Omughala w’omundu abane olukengerwa busana naye.”
5 Yesu abya anzire Marta, na mwali wabo, na Lazaro.
6 Nikwa omughulu Yesu owa ngoko Lazaro alwere, mwasyabugha eyo abya y’ebindi biro bibiri.
7 Enyuma syaho mwabwira abigha biwe ati: “Tutasyasuba e Yudea.”
8 Abigha biwe mubamubwira bati: “Rabi* mwalindi-lindi Abanya Yudea mubasondire erikughusako amabwe, kandi uti ukasubayo?”
9 Yesu mwabasubirya ati: “Omusibo awite esyosaha 12. Ko bite bitya? Omundu amabilendera omwitungyi syalitwikala oko kindu kyosi-kyosi; kusangwa akabya inyanalangire ekyakakala ky’ekihugho kino.
10 Aliwe omundu amabilendera omo kiro, akatwikala, kusangwa ekyakakala sikiri omw’iye.”
11 Abere abibugha emyatsi eyi, mwasyabugha ati: “Omwira wetu ye Lazaro abirighotsera. Aliwe ngayayo eriyamubukya.”
12 Abigha mubamubwira bati: “Mukama, amabya inyaghotsere, akendyuwana.”
13 Yesu iye abya akabugha ngoko Lazaro abirihola. Aliwe abigha mubalengekania bati Yesu akahula otughotseri tw’obuli kiro
14 Neryo Yesu mwabwirabo burora-rora ati: “Lazaro abirihola,
15 naghe nitsemire busana nenyu kundi sinilueyo; kusangwa obwikirirya bwenyu bukendiwata. Muleke tuye eyo ali.”
16 Neryo Toma oyo wabya akahulwa mo Muhasa mwabwira abigha balikyabo ati: “Muleke netu tuyeyo, tuyahole haghuma naye.”
17 Yesu abere ahikayo, mweya Lazaro inyamabibugha omw’isinda* mw’ebiro bini.
18 E Betania yabya hakuhi ne Yerusalema oko bilometre* nga bisatu.
19 N’Abayahudi bangyi babya ibabiryasa eyiri Marta na Maria bakasyabawako, busana n’oluholo lwa mughala wabo.
20 Marta mwabya abyowa ngoko Yesu anemwasa, mwayahindana naye. Nikwa Maria iye mwasighala eka inyanikere.
21 Neryo Marta mwabwira Yesu ati: “Mukama, ko ulue hano mughala wetu syangaholire.
22 Nikwa na lino ninasi ngoko ekindu kyosi-kyosi ekyo ukendisaba oMungu akendikuhakyo.”
23 Yesu mwamubwira ati: “Mughala wenyu akendilubuka.”
24 Marta mwamusubirya ati: “Ninasi ngoko akendisyalubuka okw’ilubuka ly’omo mughulu owakasa.”*
25 Yesu mwamubwira ati: “Ingye indi erilubuka, n’engebe. Oyukanikiriraya nomo angahola, akendisyasyabyaho.
26 N’obuli mundu oyuliho oyukanikiriraya, syendisyahola n’ahake. Unikirirye eki?”
27 Marta mwasubirya ati: “Inga Mukama nabirikirirya ngoko uli Kristo, Omughala w’oMungu, oyo Amasako ahula ati akendisyasa omo kihugho.”
28 Mwabya abibugha ebinywa ebi, mwaghenda amayabirikira mwali wabo ye Maria. Mwamubwira ati: “Omukangirirya ane hano, anemukubirikira.”
29 Maria mwabya abyowa ebinywa ebyo, mwalw’inyahangana, amaya eyiri Yesu.
30 Yesu abya isyalyahika omo muyi oyo. Abya inyakine aho Marta amweghaya.
31 Abayahudi ababya omo nyumba haghuma na Maria bakamukirania, babere balangira akahuluka luba-luba mubamukwama. Mubalengekania bati akayalirira okw’isinda.
32 Maria abere abihika aho Yesu ali n’erimulolako, mwabugha ati: “Mukama, ko ulue hano, mughala wetu syangaholire.”
33 Yesu abere abilangira Maria inianemulira n’Abayahudi ababya naye ibanemulira, mwakwa obulighe bunene omo mutima wiwe n’eriyibula-bula.
34 Mwabugha ati: “Mumwamutere hayi?” Mubamusubirya bati: “Mukama, asa ulebaye.”
35 Yesu mwatoghongya emisonia.
36 Abayahudi mubatsuka eribugha bati: “Alue amwanzire kutsibu basi!”
37 Aliwe abaghuma ba kubo mubabugha bati: “Omulume oyu mwalibula ameso w’endimetime. Syangakakirye oluholo isilwahikira Lazaro kwehi?”
38 Neryo Yesu abere abitasyakwa obulighe bunene omo mutima, mwasa eyiri eyisinda. Eyisinda eyo yabya mwangalu, n’oko bwingiriro bwayo kwabya ikunatekire eribwe.
39 Yesu mwabugha ati: “Mulusayeho eribwe.” Marta, omwali wabo mulume oyo wabya aholire mwamubwira ati: “Mukama, lino alimukumba kusangwa hamabikya ebiro bini.
40 Yesu mwamubwira ati: “Munditakubwira niti, wamabikirirya ighukendilangira olukengerwa lw’oMungu?”
41 Neryo mubalusyaho eribwe. Yesu mwasamalira elubula n’eribugha ati: “Tata ngakusima kundi wabiryowa erisaba ryaghe.
42 Kwenene ninasi ngoko ukanyowa ebiro byosi; aliwe ngabibugha busana n’abandu abanitimbireko batoke erikirirya ngoko niwe wanituma.”
43 Abere abibugha ebinywa ebi, mwabirikira omo mulenge muli ati: “Lazaro, huluka!”
44 Omulume oyo wabya aholire mwahuluka ebisando n’ebyala biwe ibinaboherweko esyongyimba, n’obusu bwiwe ibunaboherweko olukimba. Yesu mwabwirabo ati: “Mumusengule aghende.”
45 Neryo abangyi b’oko Bayahudi abasyawa oko Maria, kandi abalangira ekyo Yesu akola mubikirirya Yesu.
46 Aliwe abalebe ba kubo mubaya eyiri Abafarisayo bamayabwirabo ekyo Yesu alyakola.
47 Neryo Abahereri bakulu mubahindania Esanhedrini* yosi yo haghuma. Mubabugha bati: “Tuyire tuti kusangwa omulume oyu akakola ebitiko-tiko bingyi?
48 Twamabimuleka tutya, abosi ibakendimwikirirya; n’Abaroma ibakendisyasa ibatulusyako omwanya* wetu n’ekihanda kyetu.”
49 Nikwa omughuma wa kubo ye Kayafa, oyo wabya muhereri mukulu oko mwaka oyo, mwabwirabo ati: “Simwasiki n’ahake,
50 kandi simwetalangira ngoko ni ky’endundi busana nenyu omundu mughuma amabihola busana n’abandu, omo mwanya w’ekihanda kyosi eriheribwa?”
51 Ebyo si byabya binywa biwe-biwe, nikwa kundi yo wabya muhereri mukulu oko mwaka oyo, mwabugha obuminyereri ngoko litolere Yesu inyaholera ekihanda ky’Abayahudi.
52 Kandi butsira busana n’ekihanda ekyo kisa, aliwe n’erihindania mo kikuto kighuma, abana b’oMungu abapanzalikene.
53 Neryo eritsuka ekiro ekyo, mubabya bakamuyira embita y’erimwita.
54 Eritsuka ekiro ekyo, Yesu mwatabya akalendera burora-rora omo kati-kati k’Abayahudi. Aliwe mwaluaho amaya omo kiharo ekiri hakuhi n’embwarara omo muyi owakahulawa mo Efraimu. Iye haghuma n’abigha mubikala eyo.
55 Neryo Epasaka y’Abayahudi yabya iyikisigha iyahika; n’abandu bangyi erilua omo biharo by’endambi-ndambi mubahetukira e Yerusalema embere Epasaka ihike, eriyayerya erikwamana n’emitsye yabo.
56 Mubasondya-sondya Yesu, kandi mubabya bakabulania ibanimene omo hekalu bati: “Mukalengekanaya mutiki! Anemwendilw’inyabula erihika oko Kiro Kikulu?”
57 Nikwa abahereri bakulu n’Abafarisayo babya ibabiribugha bati, omundu amabiminya oho Yesu ali, inyatulagho batoke erimuhamba.
Amaelezo awehikwa
^ Kutse “Mukangirirya.”
^ Kutse “eyisinda y’eryibuka.”
^ Kinywa kwa kinywa, “esyostadia nga 15.” Ulebaye endomeko B14.
^ Kinywa kwa kinywa, “ekiro ky’enduli.”
^ Ulebaye amaana w’ebinywa.
^ Kutse “ehekalu.”
