Engulu mbuya eyahandikawa na Yohana 12:1-50
12 Ebiro ndatu (6) embere Epasaka ihike, Yesu mwahika e Betania. Eyo yo Lazaro oyo Yesu alubukaya abya ikere.
2 Neryo omo righolo eryo, mubahukira Yesu y’akalyo. Marta yo wabya akahukulirabo. Lazaro iye abya omo ababya bakalya* haghuma na Yesu.
3 Neryo Maria mwimya hakuhi enusu y’elitre* y’amaghuta awakakumba ndeke, aw’enardo iyiyene-yene, kandi aw’obughuli bunene kutsibu. Mutagho oko bisando bya Yesu n’erisangulabyo omo nzwiri siwe. Enyumba yosi muyayitulikira omo kikumbo ky’amaghuta awakakumba ndeke ayo.
4 Nikwa Yuda Iskariote, omughuma w’oko bigha biwe, oyo wabya inyakisigha inyamuhotera, mwabugha ati:
5 “Ekiryaleka amaghuta awakakumba ndeke aya inyataghulibwa esyodinari* 300, n’esyofranga esyo isyaghabirwa abera niki?”
6 Nikwa abugha atya si busana abya atsomene abera, aliwe kusangwa abya mwibi, kandi abya iyukaheka engunza y’esyofranga, kandi inyakiba oko syofranga esikahirawamo.
7 Neryo Yesu mwabugha ati: “Umuleke akole erikinga eri busana n’ekiro ky’eritabwa lyaghe.
8 Kusangwa abera mune nabo ebiro byosi, nikwa ingye simwendibya naghe ebiro byosi.”
9 Abayahudi bangyi mubaminya ngoko Yesu ane eyo. Neryo mubasa, butsira busana na Yesu musa, aliwe kandi busana n’erisyalola oko Lazaro, oyo Yesu alubukaya.
10 Abahereri bakulu mubaya embita y’eriita na Lazaro,
11 kundi Lazaro yo waleka Abayahudi bangyi ibayayo n’erikirirya Yesu.
12 Ekiro ekyakwama, ekikumula kinene ky’abandu ababya ibabiryasa oko kiro kikulu, mubowa ngoko Yesu anemwasa e Yerusalema.
13 Mubatwa ebisanza by’amabondo, bamayahindana naye, kandi mubabya bakabirikira bati: “Tukakusaba umulamaye! Omuyisa ali oko Mwami we Israeli oyukasa omo rina lya Yehova!”*
14 Yesu abere abana ekyana ky’epunda, mwikala kukyo, ngoko kinahandikirwe omo Masako kiti:
15 “Isighubaha, mwali we Sioni. Lebaya! Omwami waghu anemwasa eyo uli inyanikere oko kyana ky’epunda.”
16 Oko nzuko abigha biwe mubataminya enzumwa y’emyatsi eyi. Nikwa Yesu abere ahabwa olukengerwa, mubibuka ngoko emyatsi eyi muyahandikwa omo Masako busana naye, kandi ngoko Yesu mwakolerwa emyatsi eyi.
17 Ekikumula ky’abandu ababya haghuma naye omughulu abirikira Lazaro y’omw’isinda n’erimulubukya, mubabya bakatula emyatsi eyo balangira.
18 N’ekyo nakyo mukyaleka ibayahindana naye kundi mubowa ngoko mwakola ekitiko-tiko eki.
19 Neryo Abafarisayo mubabwirana bati: “Mwanamalangira ngoko twabiritaluka. Mulebaye! Ekihugho kyosi kyabirimukwama.”
20 Omo bandu abasyaramaya oko kiro kikulu, mwabya n’Abagiriki balebe.
21 Neryo mubasa ahali Filipo. Filipo abya Munya Betesaida ye Galilaya. Mubabugha naye bati: “Mukulu, twanzire erilola oko Yesu.”
22 Filipo mwayabwira Andrea. Neryo Adrea na Filipo bamayabwira Yesu.
23 Nikwa Yesu mwasubiryabo ati: “Endambi y’Omughala w’omundu erihabwa olukengerwa yabirihika.
24 Oko kwenene ngababwira, embuto y’engano yamatenditoghera oko kitaka n’erihola, ikasighala nguma; aliwe yamabihola, ikahetaya esyombuto nyingyi.
25 Oyo wanzire engebe* yiwe, akaherayayo; nikwa oyuponire engebe yiwe omo kihugho kino, inyakendibya inyamateyayo busana n’engebe* y’erikota.
26 Oyo wanzire erinikolera, anikwame; n’aho niri, ho oyukanikolera naye akendisyabya. Omundu amabinikolera, Tata waghe inyakendisyamusikya.
27 Lino omutima waghe amapuka-puka, nibughe nitiki kwehi? Tata unilamaye oko ndambi eno y’amaghali. Nomo bine, endambi eyi yo yaleka inasa oko kihugho.
28 Tata, uhe erina lyaghu ry’olukengerwa.” Neryo omulenge mwalua elubula ati: “Nabiriharyo olukengerwa kandi ngendihalyo olukengerwa.”
29 Abandu ababya bimeneho mubowa omulenge oyo. Neryo mubabugha bati obutuku bwamaluma. N’abandi bati: “Omumalaika amabugha naye.”
30 Yesu mwasubirya ati: “Omulenge oyu amowibwa butsira busana naghe, nikwa busana nenyu.
31 Lino ekihugho kino kikenditswerwa; omutabali w’ekihugho kino akendighuswa ehihya.
32 Naghe namabisumbirwa endata erilua oko kihugho, ingendisyakurira emihanda yosi y’abandu okw’ingye.”
33 Abugha atya erikangania ng’akisigha inyahola oluholo lwa muhanda wahi.
34 Neryo abandu mubamusubirya bati: “Emighambo ibughire yiti Kristo akabyaho kera na kera. Busanaki ukabugha uti litolere Omughala w’omundu inyasumbirwa endata? Omughala w’omundu oyo nindi?”
35 Neryo Yesu mwabwirabo ati: “Ekyakakala kikine nenyu omo katambi kake. Mulendere imukinawite ekyakakala, omwirimya akasyabatabala. Oyukalendera omo mwirimya syaliminya eyo akaya.
36 Omughulu muwite ekyakakala, mwikiriraye ekyakakala, mutoke eribya bana b’ekyakakala.”
Yesu mwabya abibugha emyatsi eyi, mwaluaho amayibisa kubo.
37 Nomo Yesu anakola ebitiko-tiko bingyi embere syabo, mubatamwikirirya,
38 ebinywa by’omuminyereri Isaya bino bitoke eribererera: “Yehova,* nindi yo wabirikirirya omwatsi ogho twabugha? Kandi nindi yo Yehova* abiribisulira amaka* wiwe?”
39 Mubatikirirya kusangwa kandi Isaya mwabugha ati:
40 “Abiriliba ameso wabo n’erikalya emitima yabo sibalangire omo meso wabo n’eriminya omo mitima yabo n’eribinduka nitoke eribalamya.”
41 Isaya mwabugha emyatsi eyi kusangwa mwalangira olukengerwa lwiwe n’erimukaniako.
42 Nikwa abatabali bangyi b’Abayahudi mubamwikirirya, aliwe isibalikanganaya ngoko bamwikirirye busana n’Abafarisayo, ibakasagha erihiwa omo sinagogi,*
43 kusangwa ibakanza eripipwa n’abandu nibya kwilaba erisimwa n’oMungu.
44 Neryo Yesu mwabugha omo mulenge muli ati: “Oyukanikiriraya akabya isyetanikirirya ingye musa aliwe inyamikirirya n’oyo wanituma,
45 n’oyukanyilolako akabya inyamalola n’oko oyo wanituma.
46 Nabiryasa eribya ng’ekyakakala omo kihugho, obuli mundu oyukanikiriraya syasighale omo mwirimya.
47 Nikwa omundu amabyowa ebinywa byaghe aliwe inyatakwamabyo, sindimutswera; kusangwa mundasa erisyatswera ekihugho nikwa erisabulakyo.
48 Oyukanyighana n’erighana eryangirira ebinywa byaghe, anawite oyukamutswera. Ekinywa ekyo nabiribugha kyo kikendisyamutswera oko kiro ky’enduli.
49 Kusangwa sinditabugha ebyo nayikangirira, aliwe Tata oyo wanituma iyuwenene-wene abirimbwira* eby’eribugha n’eby’erikania.
50 Kandi ninasi ngoko erihana liwe ni ngebe y’erikota. Neryo ebyosi ebyo ngabugha, ngabughabyo ngoko Tata anambwira.”
Amaelezo awehikwa
^ Kutse “ababya oko mesa.”
^ Kinywa kwa kinywa, “eratili.” Ulebaye endomeko B14.
^ Ulebaye endomeko B14.
^ Ulebaye endomeko A5.
^ Kutse “obuyingo.”
^ Kutse “obuyingo.”
^ Ulebaye endomeko A5.
^ Ulebaye endomeko A5.
^ Kinywa kwa kinywa, “okuboko.”
^ Ulebaye amaana w’ebinywa.
^ Kinywa kwa kinywa, “abirinyihana.”
