Engulu mbuya eyahandikawa na Yohana 13:1-38
13 Embere Epasaka yihike, Yesu abya inyabiriminya ngoko endambi yiwe y’erilua omo kihugho n’erisuba ewa Tata yabirihika. Kandi kusangwa abya inyabiryanza abiwe ababya omo kihugho, mwanzabo erihika oko nduli.
2 Babya ibanemulya akalyo k’erigholo-gholo, na Diabolo abya inyabirihira erihotera Yesu ry’omo mutima wa Yuda Iskariote, omughala wa Simoni.
3 Yesu abya inyabiriminya ngoko Tata abirihira emyatsi yosi y’omo byala biwe; kandi abya inyabiriminya ngoko alua ew’oMungu, kandi ngoko akendisuba ew’oMungu.
4 Mwahangana erilua aho babya bakalira akalyo k’erigholo-gholo, amalusya esindi ngyimba siwe. Mwimya esume, amahangayo omo mbindi yiwe.
5 Mwuta amaghetse w’omo beseni* amatsuka erinabya abigha biwe b’oko bisando, n’erisangulabyo omo sume eyo abya ahangire omo mbindi yiwe.
6 Neryo Yesu mwahika oko Simoni Petro. Petro mwamubulya ati: “Mukama, uti ukanabaya ebisando byaghe?”
7 Yesu mwamusubirya ati: “Lino siwasi ekyo ngakola nga niki; nikwa ukendisyaminyakyo enyuma sy’emyatsi eyi.”
8 Petro mwasubirya Yesu ati: “Siwangatanyinabya oko bisando n’ahake!” Na Yesu mwamubwira ati: “Namatendikunabya isiwangasangira haghuma naghe.”
9 Simoni Petro mwamubwira ati: “Isiwanabaya ebisando byaghe bisa, nikwa unabaye n’ebyala byaghe n’omutwe.”
10 Yesu mwamubwira ati: “Oyo wabirinaba oko mubiri akabya inyerire iye wosi. Ekyo akalaghako kisa rye n’erinaba oko bisando. Nenyu munerire aliwe butsira inywe bosi.”
11 Kusangwa abya inyanasi oyunemumuhotera. Ekyo kyo kyaleka inyabugha ati: “Munerire aliwe butsira inywe bosi.”
12 Abere abinabyabo oko bisando, n’eritasyambala esindi ngyimba siwe, mwasuba oko mesa. Neryo mwabulyabo ati: “Mwanamaminya ekyamaleka inabakolera nitya?
13 Mukanyahula mo ‘Mukangirirya’ kandi ‘Mukama,’ aho mukabya isimwetayiteba, kundi ko bine bitya.
14 Neryo ingye Mukama kandi Mukangirirya, namabya imungabanabaya oko bisando, nenyu litolere imwabya mukanabania oko bisando.
15 Kusangwa namabibatulira olughobe, nenyu mubye mukakola ngoko niryabakolera.
16 Kwenene-kwenene ngababwira, omughombe syalengire omukama wiwe; n’oyulyatumawa syalengire oyulyamutuma.
17 Mwamabiminya emyatsi eyi, muli b’obutseme mwamabikolayo.
18 Sindibahula inywe bosi, nyinasi obo nabirisombola. Aliwe eki ni busana n’eriberererya erisako erikabugha riti: ‘Omundu oyo wabya akalya oko kalyo kaghe, abirinibindukira.’*
19 Eritsuka lino, ngababwira embere emyatsi eyi yibye, neryo omughulu ikendibya imwatoka erikirirya ngoko erisako eri n’ingye rikahula.
20 Kwenene-kwenene ngababwira, oyukakokaya oyo ngatuma, naghe akabya inyamanikokya. N’oyukanikokaya, akabya inyamakokya oyo wanituma.”
21 Yesu mwabya abibugha emyatsi eyi, mwakwa obulighe bunene omo mutima. Neryo mwatulagho ati: “Kwenene-kwenene ngababwira, omughuma w’okw’inywe akendinihotera.”
22 Abigha mubasamalirana ibabiribula ng’akahula ndi.
23 Omughuma w’oko bigha oyo Yesu abya anzire kutsibu, abya inyanaghemere oko meza hakuhi na Yesu.*
24 Neryo Simoni Petro mwakoherya omwigha oyo n’erimubwira ati: “Utubwire ng’akahula ndi. ”
25 Neryo abere atasyaghemera oko kikuba kya Yesu, mwamubulya ati: “Mukama nindi kwehi?”
26 Yesu mwasubirya ati: “Oyo ngendiha ekihande ky’omukati ekyo ngendikolya omo kibakuli, iniye.” Neryo mwabya abikolya ekihande ky’omukati omo kibakuli mwahakyo Yuda, omughala wa Simoni Iskariote.
27 Yuda mwabya abimya ekihande ky’omukati ekyo, Sitani mwalw’inyingira omo mutima wiwe. Neryo Yesu mwamubwira ati: “Ekyo ukakola, ukolekyo luba.”
28 Nikwa abosi ababya oko meza mubataminya ekyamaleka Yesu inyabwira Yuda y’atya.
29 Nibya abandi mubalengekania bati alinga Yesu akabwira Yuda ati, “Uyaghule ebyo tukendilaghako busana n’ebiro bikulu,” kutse ati ahe abera b’ekindu kilebe; kundi yo wabya awite oko kasanduku k’esyofranga.
30 Neryo Yuda mwalw’inyahuluka abimya ekihande ky’omukati ekyo. Kandi bwabya kiro.
31 Abere abihuluka, Yesu mwabugha ati: “Lino Omughala w’omundu amabibana olukengerwa, n’erilabira iye, oMungu amabana olukengerwa.
32 OMungu iyuwene-wene akendimuha olukengerwa, kandi akendimuhalo luba.
33 Bana balere, nikine haghuma nenyu omo katambi kake. Mukendisyanisondya-sondya; na lino, nenyu ngababwira ngoko nanabwira Abayahudi nyiti, ‘Eyo ngaya, simwangatoka erihikayo.’
34 Ngabaha ekyalayiro kihya-kihya nyiti, mwanzane; ngoko nabiribanza, nenyu mwanzane mutya.
35 Abandu bosi bakendisyaminya ngoko muli bigha baghe, mwamabya n’olwanzo omo kati-kati kenyu.”
36 Simoni Petro mwamubulya ati: “Mukama, ukaya hayi?” Yesu mwamusubirya ati: “Lino siwangatoka erinikwama eyo ngaya, nikwa ukendisyanikwama bolo.”
37 Petro mwamusubirya ati: “Mukama, busanaki sinangatoka erikukwama lino? Ninayiteghekire erihola busana naghu.”
38 Yesu mwamusubirya ati: “Kwenene, unayiteghekire erihola busana naghe? Kwenene-kwenene ngakubwira, engoko-lume siyendibika utewanighana ngendo isatu.”
Amaelezo awehikwa
^ Kutse “ekindu ky’erinabirako.”
^ Kutse “abirinihanganirako, abiribya nzighu yaghe.”
^ Kutse “inyanaghemere oko kikuba kya Yesu.”
