Engulu mbuya eyahandikawa na Yohana 14:1-31
14 Isimwahahukaya emitima; mwikiriraye oMungu, naghe munikiriraye.
2 Omo nyumba ya Tata waghe muli emyanya mingyi y’erikalamo. Bite bitya nga nabiribabwira, kusangwa ngaghenda eriyabateghekanirya omwanya.
3 Kandi namabighenda eriyabateghekanirya omwanya, ngendisyasyasa eribatwala eyo niri. Neryo aho niri, nenyu iho mwabya.
4 Kandi munasi enzira y’eyo ngaya.
5 Toma mwamubwira ati: “Mukama sitwasi eyo ukaya! Neryo twangatoka tuti eriminya enzira?”
6 Yesu mwamubwira ati: “Ingye nzira, ekwenene, n’engebe. Sihali oyukahika oko Tata atalyalaba omw’ingye.
7 Ko mulue munyasi nga munasi na Tata. Eritsuka lino mwabirimuminya, kandi mwabirimulolako.”
8 Filipo mwamubwira ati: “Mukama, utukanganaye Tata! N’ekyo kikenditutulerya.”
9 Yesu mwamusubirya ati: “Filipo, ebiro bingana n’ebyo namabibugha nenyu, siwewananiminya? Oyo wabirinilangira inyabirilangira na Tata. Ekikaleka iwabugha uti, ‘Utukanganaye Tata’ niki?
10 Siwikirirye ngoko niri omo bughuma na Tata kandi ngoko na Tata ali omo bughuma naghe? Emyatsi eyo ngababwira sindiyikangirirayo, nikwa Tata oyuli omo bughuma naghe anemukola emibiiri yiwe.
11 Mwikiriraye ngoko niri omo bughuma na Tata; kandi ngoko Tata ali omo bughuma naghe. Nikwa mwamatendikirirya busana n’ebyo ngabugha, mwikiriraye busana n’emibiiri eyo ngakola.
12 Oko kwenene ngababwira, oyukanikiriraya, akendisyakola emibiiri eyo ngakola. Kandi akendisyakola n’emibiiri mingyi kulenga eyi kusangwa ingye ngaya eyiri Tata.
13 Kandi ekyosi-kyosi ekyo mwangasaba omo rina ryaghe, ngendisyakolakyo, Tata atoke eribana olukengerwa erilabira Omughala.
14 Ekindu kyosi-kyosi ekyo mwangasaba omo rina ryaghe ngendisyakolakyo.
15 “Mwamabinyanza imukendisikya n’ebyalayiro byaghe.
16 Ngendisaba Tata, naye inyabaha oghundi muwatikya* oyukendisyabya nenyu kera na kera,
17 ekirimu ky’ekwenene; ekihugho sikyangabana ekirimu ekyo, kusangwa sikirilangirakyo kandi sikyasikyo. Inywe, munasikyo kusangwa kine haghuma nenyu, kandi kine omw’inywe.
18 Sinendibasigha mo ngubi. Ngendisuba eyo muli.
19 Hakisiya katambi kake ekihugho sikyendisyasyanilolako. Nikwa inywe mukendisyanilolako kusangwa nyiriho, nenyu mukendisyabyaho.
20 Ekiro ekyo mukendisyaminya ngoko niri omo bughuma na Tata; kandi ngoko nenyu muli omo bughuma naghe, naghe niri omo bughuma nenyu.
21 Oyunyanzire akaligha ebyalayiro byaghe n’erikwamabyo. N’oyunyanzire, Tata waghe naye akendisyamwanza, naghe ngendisyanza omundu oyo n’eriyikangania burora-rora okw’iye.”
22 Yuda, butsira ye Yuda Iskariote mwamubulya ati: “Mukama, ekyamaleka iwanza eriyikangania burora-rora okw’itwe basa, butsira oko kihugho niki?”
23 Yesu mwamusubirya ati: “Oyunyanzire akasikaya ekinywa kyaghe, na Tata waghe akendisyamwanza. Naghe haghuma na Tata waghe tukendisyasa eyiri omundu oyo n’eryikala haghuma naye.
24 Oyutanyanzire, syalisikaya ebinywa byaghe. Ekinywa ekyo mukowa si kyaghe aliwe ni kya Tata waghe oyo wanituma.
25 “Nabiribabwira emyatsi eyi inikine haghuma nenyu.
26 Aliwe, omuwatikya, ekirimu kibuyirire ekyo Tata akendisyatuma omo rina ryaghe, oyo akendisyabakangirirya emyatsi yosi n’eribibukya emyatsi yosi eyo nababwira.
27 Ngabasighira obuholo. Ngabaha obuholo bwaghe. Sindibahabo ngoko ekihugho kikahitayabo. Isimwahahukaya emitima, kandi simubahe.
28 Momukowa ngababwira nyiti, ‘Ngaghenda, kandi ngendisyasuba eyo muli.’ Ko mulue munyanzire, mulyenditsema mukowa ngoko ngaya eyiri Tata, kusangwa Tata anilengire.
29 Lino namabibabwira embere omwatsi oyu ahike, neryo akendisyabya ahika imwatoka erikirirya.
30 Sinendisyababwira bingyi okw’aho, kusangwa omutabali w’ekihugho kino anemwasa; naye syawite ekyo anganikola.*
31 Ninemukola ngoko Tata ananihana erikola. Ekihugho kitoke erikirirya ngoko nyanzire Tata. Muhangane tulue hano.
