Engulu mbuya eyahandikawa na Yohana 15:1-27
15 “Ingye muzabibu w’ekwenene, na Tata waghe yo mulimi.
2 Obuli mutahi owali okw’ingye owateheta, akatwagho, n’obuli mutahi owakahetaya akasariragho* atoke erihetya awandi matunda.
3 Mwabiryeribwa omo kinywa ekyo nabiribabwira.
4 Mubye omo bughuma naghe, naghe ngendibya omo bughuma nenyu. Omutahi syangaheta atamatikene oko ndina, nenyu kutya simwangahetya mute omo bughuma naghe.
5 Ingye ndina y’omuzabibu; nenyu muli mitahi. Oyuli omo bughuma naghe, naghe omo bughuma naye, oyo akahetaya amatunda mangyi; kusangwa simwangakola omwatsi wosi-wosi mutamatikene naghe.
6 Oyute omo bughuma naghe, akaghusawa ehihya ng’omutahi, neryo iniuma. Abandu bakakuma-kumira emitahi eyo yo haghuma, ibaghusayo omo muliro, neryo ibatimyayo.
7 Mwamabya omo bughuma naghe n’ebinywa byaghe ibine omo mitima yenyu, mubulaye ekyosi-kyosi ekyo mwanzire, mukendikolerwakyo.
8 Tata waghe akabana olukengerwa mwamabihetya ebighuma bingyi n’erikangania ko muli bigha baghe.
9 Ngoko Tata abirinyanza, naghe nabiribanza. Musighale omo lwanzo lwaghe.
10 Mwamabisikya ebyalayiro byaghe, imukendisyasighala omo lwanzo lwaghe, ngoko naghe nabirisikya ebyalayiro bya Tata n’erisighala omo lwanzo lwiwe.
11 “Nabiribabwira emyatsi eyi, obutseme bwaghe bubye omw’inywe; obutseme bwenyu butoke erihikana.
12 Ekyo namabalayira kya kino: Mwanzane ngoko nabiribanza.
13 Sihali oyuwite olwanzo lunene kwilaba olu, omundu eriherera engebe* yiwe busana n’abira biwe.
14 Mwamabikola ebyo ngabalayira, imuli bira baghe.
15 Sinyikibabirikira mo baghombe, kusangwa omughombe syaliminya ebyo omukama wiwe akakola. Aliwe ngababirikira mo bira kusangwa nabiribabwira emyatsi yosi eyo nowa erilua oko Tata waghe.
16 S’inywe mwanisombola, aliwe n’ingye nabasombola eriyahetya mughulu wosi amatunda awatehwaho, neryo Tata iniatoka eribaha ekyosi-kyosi ekyo mukendisyamusaba omo rina lyaghe.
17 “Ngabahana erikola emyatsi eyi, mutoke eryanzana.
18 Ekihugho kyamabapona, imwaminya ngoko mukyanipona embere kibapone.
19 Ko mulue b’ekihugho, ekihugho ngambe kibanzire. Neryo kundi simuli b’ekihugho, ekihugho kibaponire kusangwa munabasombola erilua omo kihugho.
20 Isimwibirirawa ekyo nababwira niti: Omughombe syalengire omukama wiwe. Bamabya imubanyendererya, nenyu kutya bakendisyabendererya; bamabya imubakenga ekinywa kyaghe, nenyu bakendisyakenga ekyenyu.
21 Nikwa bakendisyabakolera emyatsi yosi eyo busana n’erina ryaghe kusangwa sibasi oyo wanituma.
22 Ko nabya imunitasa n’eribwirabo, ngambe sibawite erilolo. Aliwe lino sibangayighana erilolo lyabo.
23 Oyuniponire, inyaponire na Tata.
24 Ko nitakola omo kati-kati kabo emibiri eyo oghundi mundu wosi-wosi atakola, ngambe sibawite kibi; nikwa lino babirinilolako n’erinipona na Tata kutya.
25 Nikwa ekyo mukyabya eriberererya ekihandikire omo Mighambo yabo kiti: ‘Mubanipona isihali ekikaleka.’
26 Omughulu omuwatikya akendisyahika oyo ngendisyabatumira erilua oko Tata, ekirimu ky’ekwenene, ekikalua oko Tata, omuwatikya oyo akendisyatula omwatsi waghe.
27 Nenyu kikendisyatolera, imwatulagho kusangwa mwabiribya naghe erilua oko nzuko.
