Engulu mbuya eyahandikawa na Yohana 16:1-33
16 “Nabiribabwira emyatsi eyi mukasyatwikala.
2 Abandu bakendisyabahigha omo sinagogi.* Oko kwenene ekiro kinemwasa omundu oyukabita akendisyalengekania ati amabikolera oMungu y’omubiiri abuyirire.
3 Nikwa, bakendisyakola emyatsi eyi kusangwa sibetaniminya, kandi sibetaminya na Tata.
4 Nikwa nabiribabwira emyatsi eyi, neryo omughulu ikendisyahika mukendisyibuka ngoko munababwirayo.
“Erimbere mundababwira emyatsi eyi, kusangwa nabya inine nenyu.
5 Nikwa lino ngaya eyiri oyo wanituma. Aliwe sihali n’omughuma w’okw’inywe oyukanibulaya ati, ‘Ukaya hayi?’
6 Aliwe emitima yenyu yabiryusulamo obulighe kusangwa nabiribabwira emyatsi eyi.
7 Nomo bine bitya, ngababwira ekwenene, ngaghenda busana n’endundi yenyu. Kusangwa namatendighenda, omuwatikya isyendisyasa eyo muli; nikwa namabighenda, ingendisyabatumira ye.
8 Kandi omuwatikya akendisyabya ahika, akendisyakangania ekihugho kyo ndeke-ndeke ekibi nga niki, n’eritunganene nga niki, n’eritswera nga niki:
9 eky’erimbere akendisyakangania ekibi nga niki kusangwa sibalinikiriraya;
10 akendisyakangania eritunganene nga niki, kusangwa ngaya eyiri Tata kandi simwendisyasyanilolako;
11 neryo akendisyakangania n’eritswera nga niki, kusangwa omutabali w’ekihugho kino abiritswerwa.
12 “Nikinawite emyatsi mingyi y’eribabwira, aliwe lino simwangatoka eryowayo.
13 Aliwe omughulu omuwatikya oyo akendisyasa, ni bugha ambu ekirimu ekikabisula ekwenene, akendisyabasondola eriminya ekwenene yo ndeke, kusangwa syendisyabugha omw’iyikangirira riwe. Aliwe akendisyabugha ebyo akabwirawa kandi akendisyababwira emyatsi eyitolere iyahika.
14 Oyo akendisyanipipa, kusangwa akendisyababwira emyatsi eyo ngamubwira.
15 Ebyosi ebyo Tata awite, ni byaghe. Ekyo kyo kiryaleka inababwira niti omuwatikya akendisyababwira ebyo ngamubwira.
16 Hakisiya akatambi kake simwendisyanilolako, kandi omo katambi kake, mukendinilolako.”
17 Neryo abaghuma b’oko bigha biwe mubabwirana bati: “Akasonda eribugha atiki akatubwira ati, ‘Hakisiya akatambi kake simwendisyanilolako kandi omo katambi kake mukendinilolako,’ n’eribugha ati, ‘kusangwa ngaya eyiri Tata’?”
18 Neryo mubabulania bati: “Akasonda eribugha atiki akabugha ati, ‘akatambi kake’? Sitwasi ng’akakanaya okuki.”
19 Yesu mwaminya ngoko bakasonda erimubulya. Neryo mwabugha nabo ati: “Mukabulanaya mutya kusangwa mungabugha niti: ‘Hakisiya akatambi kake simwendisyanilolako, kandi omo katambi kake mukendinilolako?’
20 Oko kwenene ngababwira, mukendisyalira n’erilaka kutsibu, aliwe ekihugho kikendisyatsema; mukendisyabya omo bulighe, nikwa obulighe bwenyu bukendisyabinduka mo butseme.
21 Omughulu omukali akabuta, akabya omo bwaghali, kusangwa endambi iyabirihika, aliwe akabya abibuta, syalisyibuka obulumi busana n’obutseme kundi omundu inyabiributwa omo kihugho.
22 Neryo nenyu, lino muli omo bulighe; aliwe ngenditasyabalolako, n’emitima yenyu ikendisyatsema, kandi sihali oyukendisyabalusyako obutseme obo.
23 Ekiro ekyo, simwendisyanibulya eribulyo ryosi-ryosi. Kwenene-kwenene ngababwira, omwatsi wosi-wosi ogho mukendisyabulya Tata waghe, akendisyabakoleragho omo rina ryaghe.
24 Erihika lino, simwemwabulya omwatsi n’omughuma omo rina ryaghe. Mubulaye, mukendisyahabwa ebyo mulyabulaya, obutseme bwenyu butoke erihikana.
25 “Nabiribakanirya emyatsi eyi omo misyo. Endambi inemwasa sinendisyasyakania nenyu omo misyo, aliwe ngendisyabakanirya oko Tata ko burora-rora.
26 Ekiro ekyo mukendisyabya mukasaba Tata y’emyatsi omo rina ryaghe; omw’ibugha nitya, sindibugha niti ningye ngendisyabya ngabasabira oko Tata.
27 Kusangwa Tata iyuwene-wene abanzire, kundi nenyu mwabirinyanza kandi mwabirikirirya ngoko oMungu yo wanituma.
28 Nasa oko kihugho ng’omutumwa wa Tata. Lino ngalua oko kihugho, ngaya eyiri Tata.”
29 Abigha biwe mubabugha bati: “Lero ibwa, wamabugha burora-rora; siwetasyakolesya emisyo.
30 Lino twamaminya ngoko wasi emyatsi yosi kandi sighulaghire oko ribulyo ry’omundu wosi-wosi kundi unasi ebyo akalengekanaya. Busana n’ekyo, twabirikirirya ngoko walua ew’oMungu.”
31 Yesu mwabasubirya ati: “Mwamikirirya lino?
32 Endambi inemwasa, na lino yabirihika; inywe bosi mukendisyapanzikana, obuli mundu inyatibita eka wiwe. Mukendisyanisigha ingyuwene. Aliwe sindi ingyuwene, kusangwa Tata ane haghuma naghe.
33 Nabiribabwira emyatsi eyi mutoke eribya n’obuholo erilabira ingye. Mukendisyabana amalighe omo kihugho, aliwe musike! Nabirikinda ekihugho.”
Amaelezo awehikwa
^ Ulebaye amaana w’ebinywa.
