Engulu mbuya eyahandikawa na Yohana 18:1-40
18 Yesu mwabya abibugha ebinywa ebi, mwaghenda n’abigha biwe, amasoka omusya we Kidroni bakaya omo ririma eryabya oko ghundi musirya. Iye n’abigha biwe mubahika omo ririma eryo.
2 Yuda oyo wamuhotera naye abya inyanasiho, kusangwa Yesu inyabeghere erihindana aho n’abigha biwe.
3 Neryo Yuda mwasa n’omulondo w’abasuda n’abapolisi b’abahereri bakulu n’Abafarisayo ibanahekire esyotorshe* n’esyotala, n’ebindu by’amalwa.
4 Neryo kundi Yesu abya inyanasi emyatsi yosi eyikasonda erimuhikira, mwaseghera embere n’eribabulya ati: “Mukasondaya ndi?”
5 Mubamusubirya bati: “Yesu, Omunazereti.” Naye mwabugha ati: “Ningye.” Na Yuda oyo wamuhotera abya inianimene haghuma nabo.
6 Aliwe Yesu abere abibwirabo ati, “Ningye,” mubasuba enyuma n’eriwa oko kitaka.
7 Neryo Yesu mwabulyabo engendo y’akabiri ati: “Mukasondaya ndi?” Mubabugha bati: “Yesu Omunazereti.”
8 Yesu mwasubiryabo ati: “Nabiribabwira ko ningye. Neryo amabya in’ingye mukasondaya, muleke aba baghende.”
9 Ekyo mukyabya busana n’eribererya ekyo abugha ati: “Oko abo wabirimba, sinitaheryako n’omughuma.”
10 Simoni Petro abya inianawite oko muyali. Neryo mwalusyagho omo lubo lwagho, amabanda omughombe w’omuhereri mukulu n’eritwa okutu kwiwe kw’amali. Omughombe oyo abya iyo Malko.
11 Nikwa Yesu mwabwira Petro ati: “Subaya omuyali w’omo lubo lwagho. Sinitolere erinywa ekikombe ekyo Tata waghe abirimba kwehi?”
12 Neryo abasuda n’omukulu wabo n’abapolisi b’Abayahudi mubahamba Yesu n’erimuboha.
13 Mubatsuka erimuboha n’erimutwala ewa Ana. Kusangwa Ana abya tata-byala wa Kayafa oyo wabya muhereri mukulu oko mwaka oyo.
14 Kayafa yo wahana Abayahudi ati ni ky’endundi okw’ibo omundu mughuma amahola omo mwanya w’abandu bosi.
15 Simoni Petro, n’oghundi mwigha, mubakwama Yesu. Oghundi mwigha oyo, abya asibwe n’omuhereri mukulu. Neryo mwingira na Yesu omo kibugha ky’omuhereri mukulu.
16 Nikwa Petro mwasighala ehihya inianimene oko lukyo. Neryo oghundi mwigha oyo, oyo wabya asibwe n’omuhereri mukulu, mwahuluka, amakania n’omuteya w’olukyo n’eryingirya Petro.
17 Omughombe w’obukali oyo wabya akateya olukyo, mwabugha na Petro ati: “Naghu sighuli mughuma w’oko bigha b’omulume oyu kwehi?” Petro mwabugha ati: “Iyehe.”
18 Neryo abaghombe n’abapolisi babya ibanatimbire oko muliro w’amakala ogho babya ibabiryakya. Babya ibanemwota, kusangwa yabya embeho. Petro abya inyanimeneho, inyanemwota haghuma nabo.
19 Neryo omuhereri mukulu mwabulya Yesu oko bigha biwe n’erikangirirya liwe.
20 Yesu mwamusubirya ati: “Ingakanaya burora-rora embere sy’abandu. Ingakangiriraya omo hekalu, n’omo sinagogi* aho Abayahudi bosi bakahindana. Kandi sihali omwatsi ogho nabugha omo bubiso-biso.
21 Ukanibulaya busanaki? Ubulaye ababirihulikirira ebyo nabwirabo. Aba banasi ebyo nabugha.”
22 Yesu abere abibugha ebinywa ebi, omughuma w’oko bapolisi ababya bimeneho, mwamuha erikofi ry’omo busu n’eribugha ati: “Wanganasubirya omuhereri mukulu yo utya?”
23 Yesu mwamusubirya ati: “Namabya inamahaba, umbwire oluhabo olo namabugha; namabya inamabugha ekwenene, wamaniswirya busanaki?”
24 Neryo Ana mwatuma Yesu inyanabohire ew’omuhereri mukulu ye Kayafa.
25 Simoni Petro abya inianimeneho akota oko muliro. Mubamubulya bati: “Naghu sighuli mughuma w’oko bigha biwe kwe?” Mwayighana n’eribugha ati: “Iyehe.”
26 Omutunga w’omulume oyo Petro atwako okutu, kandi oyo wabya mughombe w’omuhereri mukulu mwabugha ati: “Munditakulangira omw’irima haghuma naye kwe?”
27 Aliwe kandi, Petro mwayighana. Neryo aho n’aho engoko-lume muyabika.
28 Neryo mubalusya Yesu y’ewa Kayafa, bamamutwala omo kyaghanda ky’omuguvernere; yabya tututu. Nikwa ibo mubatingira ew’omuguvernere bakasagha erihalya oko Mighambo kundi babya banzire erirya oko Pasaka.*
29 Neryo Pilato mwahuluka, amaya eyo bali, n’eribulyabo ati: “Omundu oyu atwire lubanza lwahi?”
30 Mubasubirya bati: “Omundu oyu kw’atalue mukola-nabi, situlyendikuleteraye.”
31 Pilato mwabasubirya ati: “Mughende naye, muyamutswere erikwamana n’emighambo yenyu.” Abayahudi mubamusubirya bati: “Situhamulirwe eriita omundu wosi-wosi.”
32 Byabya bitya, eriberererya ekinywa ekyo Yesu abugha akakangania omuhanda w’oluholo olo akendihola.
33 Neryo Pilato mwasuba omo kyaghanda ky’omuguvernere, amabirikira Yesu n’erimubulya ati: “Uli Mwami w’Abayahudi kwehi?”
34 Yesu mwamusubirya ati: “Ekyo kikalua omo mutima waghu, kutse abandi bo balyakukaniraya okw’ingye?”
35 Pilato mwasubirya ati: “Ingye niri Muyahudi kwehi? Ekihanda kyenyu n’abahereri bakulu bo balyakuleta eyo niri. Wakolireki kwe?”
36 Yesu mwasubirya ati: “Obwami bwaghe si bw’ekihugho kino. Obwami bwaghe ko bulue bw’ekihugho kino, abaghombe baghe ngambe babirilwa isinahirawa omo byala by’Abayahudi. Nikwa Obwami bwaghe sibuluire oko bandu.”
37 Neryo Pilato mwamubulya ati: “Neryo kwesi uli mwami?” Yesu mwasubirya ati: “Ighuwene-wene wamabugha ngoko niri mwami. Busana n’ekyo, munabutwa kandi busana n’ekyo munasa omo kihugho erisyatula omwatsi w’ekwenene. Obuli mundu oyuli oko kwenene akowa omulenge waghe.”
38 Pilato mwamusubirya ati: “Ekwenene niki?”
Abere abibugha ebyo, mwasuba eyiri Abayahudi n’eribugha nabo ati: “Sinatamubanako lubanza.
39 Aliwe omo mitsye yenyu y’Ekiyahudi, mubeghere eriboholerwa omundu mughuma oko kiro kye Pasaka.* Neryo, mwanzire inababoholera Omwami w’Abayahudi kwehi?”
40 Kandi mubabirikira omo mulenge muli bati: “Butsira omulume oyo, aliwe Baraba!” Baraba abya mwibi.
Amaelezo awehikwa
^ Kutse “ebisosomole.”
^ Ulebaye amaana w’ebinywa.
^ Kutse “Erikiruka.”
^ Kutse “Erikiruka.”
