Engulu mbuya eyahandikawa na Yohana 19:1-42
19 Neryo Pilato mwimya Yesu n’erimuswirya omo bikoba.
2 Neryo abasuda mubaluka embita y’amahwa n’erihirayo oko mutwe wiwe, n’erimwambalya ekanzu y’erangyi y’olubono-bono.*
3 Kandi mubabya bakasa eyo ali n’eribugha bati: “Kuti kwe Mwami w’Abayahudi!” Kandi mubabya bakamuha amakofi w’omo busu.
4 Kandi Pilato mwahulukira ehihya n’eribwirabo ati: “Ngabaletera ye, ngamuleta ehihya mutoke eriminya ko sinetamubanako olubanza.”
5 Neryo Yesu mwahulukira ehihya inyanambite embita y’amahwa n’ekanzu y’erangyi y’olubono-bono.* Neryo Pilato mwabugha ati: “Omundu wenyu y’oyu!”
6 Aliwe abahereri bakulu n’abapolisi babere bamulangira, mubabugha omo mulenge muli bati: “Ahanikawe oko muti! Ahanikawe oko muti!” Pilato mwabwirabo ati: “Inywibene-bene mumutwale n’eriyamwita, kusangwa ingye, sinditamusungako lubanza.”
7 Abayahudi mubamusubirya bati: “Tunawite omughambo owakabugha ati atolere inyahola kundi mwakayahula mo mughala w’oMungu.”
8 Omughulu Pilato owa ebinywa ebyo, mwubaha kutsibu okw’aho.
9 Neryo kandi Pilato mwasuba omo kyaghanda n’eribulya Yesu ati: “Walua hayi kwe?” Aliwe Yesu mwatamusubirya.
10 Pilato mwabugha ati: “Ukanihuna? Siwasi ngoko niwite ehamuli y’erikubuhola n’ehamuli y’erikwita?”
11 Yesu mwamusubirya ati: “Siwangabya n’ehamuli okw’ingye utalyahabawayo erilua endata. Busana n’ekyo, oyulyanyihotera okw’iwe aliko olubanza lunene.”
12 Pilato abere abyowa ebi, mwasondekania enzira y’erimubohola. Nikwa Abayahudi mubabirikira bati: “Wamabibohola omulume oyu isighuli mwira wa Kaisari. Kusangwa obuli mundu oyukayahula mo mwami, akabya inyamalwa na Kaisari.”
13 Pilato abere abyowa ebinywa ebi, mwahulukirya Yesu y’ehihya. Neryo amikala oko kitumbi ky’omutsweri ahakahulawa mo Ekibugha ky’Amabwe, aliwe omo Kiebrania ni Gabata.
14 Kyabya kiro ky’eriteghekania Epasaka kandi yabya nga saa sita. Neryo Pilato mwabwira Abayahudi ati: “Omwami wenyu y’oyu!”
15 Nikwa mubabirikira kutsibu bati: “Umubugheho! Umubugheho! Ahanikawe oko muti!” Pilato mwabugha nabo ati: “Nyite omwami wenyu?” Abahereri bakulu mubamubwira bati: “Tuwite omwami mughuma musa, ye Kaisari.”
16 Neryo mwabaha Yesu bamayamuhanika oko muti.
Neryo mubatwala Yesu.
17 Yesu mwahuluka inyanayihekere omuti* ogho bakendimuhanikako amaghenda ahakahulawa mo Erikuha ly’oko Mutwe,* omo Kiebrania ni Golgota.
18 Eyo mubamukongemerera oko muti haghuma n’abandi balume babiri. Omughuma oko luhande lw’amali n’oghundi oko lw’amalembe, na Yesu abya omo kati-kati.
19 Kandi Pilato mwahandika ebinywa oko kibenete amahirabyo oko muti.* Byabya bibughire biti: “Yesu Omunazareti, Omwami w’Abayahudi.”
20 Abayahudi bangyi mubasoma ebinywa ebyo; kusangwa aho Yesu ahanikawa habya hakuhi n’omuyi. Byabya bihandikire omo Kiebrania, omo Kilatini, n’omo Kigiriki.
21 Aliwe abahereri bakulu b’Abayahudi mubabwira Pilato bati: “Isiwahandika uti, ‘Omwami w’Abayahudi,’ aliwe uhandike uti mwabugha ati, ‘Niri Mwami w’Abayahudi.’”
22 Pilato mwasubiryabo ati: “Nabirihandika-nabirihandika.”
23 Neryo abasuda babere babikongomerera Yesu y’oko muti, mubimya esyongyimba siwe bamaghabasyo mo maghabo ani; obuli musuda mwimya erighabo righuma. Kandi mubimya n’ekanzu yiwe. Nikwa ekanzu eyo siyabyamo omulando; iyilukire mo ngumerera erilua endata erihika ekabuno.
24 Neryo mubabwirana bati: “Isitwatulayo, aliwe tukole obukanga, tukendilebya nga ikendibya yandi.” Ekyo mukyabya busana n’eriberererya erisako erikabugha riti: “Mubaghabana esyongyimba syaghe, kandi mubakola obukanga busana n’olukimba lwaghe.” Abasuda mubakola ekyo.
25 Mama wa Yesu, na mwali wabo mama wa Yesu, haghuma na Maria muka Kleopa na Maria Magdalena babya ibanimene hakuhi n’omuti* ogho Yesu ahanikawako.
26 Omughulu Yesu alangira mama wiwe n’omwigha oyo abya anzire ibanimene hakuhi, Yesu mwabwira mama wiwe ati: “Eritsuka lino, mughala waghu y’oyu!”
27 Neryo Yesu mwabwira n’omwigha oyo ati: “Eritsuka lino oyu ni mama waghu!” Eritsuka oko ndambi eyo, omwigha oyo mwamutwala eka wiwe.
28 Enyuma syaho Yesu abiminya ngoko emyatsi yosi yamabibererera, mwabugha ati: “Namakwa enyota.” Mwabugha atya busana n’eriberererya Amasako.
29 Habya ihane erilegha eririmo edivai eyikalire kutsibu.* Neryo mubimya ekivuta ekyoswiremo edivai eyikalire kutsibu* bamahirakyo oko muti w’ehisopo n’erihirakyo oko buno bwiwe.
30 Yesu abere abighonza oko divai eyo, mwabugha ati: “Kyamabibererera.” Neryo munamya omutwe, amatwa omutima.
31 Kusangwa kyabya kiro ky’Eriteghekania, Abayahudi mubasaba Pilato bati amaghulu abunangawe n’emibiri ilusibawe oko miti, Esabato isiyahika emibiri eyo iyikine oko miti. (Kusangwa ekiro ky’Esabato ekyo kyabya kikulu).
32 Neryo abasuda mubasa bamabunanga amaghulu w’omulume w’erimbere n’aw’oghundi mulume oyo wabya ahanikire oko muti oko lundi luhande lwa Yesu.
33 Nikwa babere babihika ahali Yesu, mubalangira ngoko abirihola. Neryo mubatabunanga amaghulu wiwe.
34 Nikwa omusuda mughuma mwatsimita olukanga lwa Yesu omo ritumo. Neryo muhalw’ihalua omusasi n’amaghetse.
35 Oyo walangira omwatsi oyu abiritulagho, n’eritulagho riwe ni ry’ekwenene kandi anasi ngoko ebyo akabugha ni kwenene, nenyu imwatoka erikirirya.
36 Emyatsi eyi muyabya yitya eriberererya erisako erikabugha riti: “Sihali n’erikuha riwe n’erighuma erikendisyabunwa.”
37 N’erindi risako rikabugha riti: “Bakendisyasamalira oyo batsimita.”
38 Enyuma syaho, Yozefu we Arimatea mwasaba Pilato y’omubiri wa Yesu. Yozefu abya mwigha wa Yesu, aliwe omo bubiso-biso busana n’erisagha Abayahudi. Pilato mwamulighira omubiri wa Yesu. Neryo Yozefu mwasa amahekagho.
39 Nikodemu naye mwasa. Omulume oyu yo wasungana na Yesu kera omo kiro. Mwaleta amane-mane awatulungenemo obukwa, nga bilo* 30.
40 Mubakimya omubiri wa Yesu w’oko muti bamalingira kugho kw’esyongyimba sy’ekitani haghuma n’amanukato awakakumba ndeke, erikwamana n’emibere y’Abayahudi ey’erita abandu.
41 Aho Yesu ahanikawa oko muti, kwesi habya ihane eririma eryabyamo eyisinda nyihya-nyihya eyiteyatahirwamo omundu.
42 Neryo kundi kyabya kiro ky’Abayahudi eky’eriteghekania, n’eyisinda iyine hakuhi n’aho, mubahira Yesu y’omo.
Amaelezo awehikwa
^ Kutse “erangyi y’omunyama, pourpre.”
^ Kutse “erangyi y’omunyama, pourpre.”
^ Ulebaye amaana w’ebinywa.
^ Kutse “Ah’erihanga.”
^ Ulebaye amaana w’ebinywa.
^ Ulebaye amaana w’ebinywa.
^ Kutse “eyipakere.”
^ Kutse “eyipakere.”
^ Kinywa kwa kinywa, “esyoratili nga 100.” Ulebaye endomeko B14.
