Engulu mbuya eyahandikawa na Yohana 2:1-25
2 Oko kiro ky’akasatu, endwa muyabya e Kana ye Galilaya. Na mama wa Yesu abya inyane oko ndwa eyo.
2 Yesu n’abigha biwe nabo mubabirikirwa oko ndwa eyo.
3 Edivai yabere yabikeha, mama wa Yesu mwabugha naye ati: “Sibakiwite edivai.”
4 Nikwa Yesu mwasubirya mama wiwe ati: “Tahyee! Ingye naghu, omwatsi oyo atulebirye ati? Endambi yaghe siriyahika.”
5 Mama wiwe mwabwira abaghombe b’oko ndwa ati: “Mukole ekyosi-kyosi ekyo akendibabwira.”
6 Habya ihane amalegha* ndatu (6). Ahirawaho busana n’erinaba oko byala embere w’erirya erikwamana n’emitsye y’Abayahudi. Obuli liregha* iryanganahikamo esyolitre 44 kutse 66.
7 Yesu mwabwirabo ati: “Musulaye omo malegha mw’amaghetse.” Nabo mubusulya mugho mw’amaghetse erihika oko minywa.
8 Yesu mwabugha ati: “Mutehe oko divai, mutwalire omwimaniri w’endwa.” Neryo mubamutwalira.
9 Omughulu omwimaniri w’endwa aghonza oko maghetse awabiribya divai, isyasi edivai nga yiryalua hayi (aliwe abaghombe abateha amaghetse ibo babya ibanasi), mwabirikira iba w’omulunga.*
10 Mwabugha naye ati: “Abandi bandu bosi bakatsuka erileta edivai eyuwene, neryo abandu bakabya babitamira imo baleta etsaghu-tsaghu. Nikwa iwe, mo wamahulukya edivai eyuwene!”
11 Ekitiko-tiko eki, Yesu akolerakyo e Kana ye Galilaya. Kyo kyabya kitiko-tiko kiwe ky’erimbere. Omw’ikola atya, mwakangania olukengerwa lwiwe, n’abigha biwe mubamwikirirya.
12 Enyuma syaho, Yesu na mama wiwe, n’abaghala babo, n’abigha biwe mubandaghalira e Kapernaumu. Mubikalayo biro bike.
13 Epasaka y’Abayahudi yabya iyikisiya iyahika. Neryo Yesu mwahetukira e Yerusalema.
14 Mweya omo hekalu mw’abakaghulaya esyonde, esyombuli, n’ehilikuku. N’abahingania b’esyofranga ibanikere oko himesa hyabo.
15 Mwakokotya efimbo y’omo bikoba, neryo mwahigha omo hekalu mw’abosi ababya n’esyombuli n’esyonde; n’eryuta ebitsere by’abakahinganaya esyofranga, n’erikubula ehimesa hyabo.
16 Kandi mwabwira n’abakaghulaya ehirikuku ati: “Mulusaye hino hyo muno! Isimwayira enyumba ya Tata waghe mo soko!”*
17 Abigha biwe mubibuka ngoko kyabirihandikwa kiti: “Omuhwa w’enyumba yaghu akendisyabeberera ng’omuliro omo mutima waghe.”
18 Okw’ekyo Abayahudi mubamubulya bati: “Ukenditukolera ekitiko-tiko kyahi erikangania ngoko uwite ehamuli y’erikola emyatsi eyi?”
19 Yesu mwabasubirya ati: “Muhimbule ehekalu eyi, ngendihanganiayo omo biro bisatu.”
20 Abayahudi mubabugha bati: “Ehekalu eyahimbawa omo myaka 46 iwe uti ukendihanganiayo omo biro bisatu?”
21 Aliwe ehekalu eyo Yesu abya akahula abya iw’omubiri wiwe.
22 Omughulu alubuka erilua oko baholi, abigha biwe mubibuka ngoko anabya abeghere eribugha ekyo. Neryo mubikirirya Amasako n’ebyo Yesu abugha.
23 Inyane e Yerusalema oko kiro kikulu kye Pasaka, abandu bangyi mubamwikirirya* omughulu balangira ebitiko-tiko ebyo akola.
24 Nikwa Yesu mwatayiketerabo kundi inyanabasi
25 kandi kusangwa syabya alaghire eribwirwa n’omundu wosi-wosi oko bilebirye abandu, kundi inyanasi ebiri omo mitima y’abandu.
Amaelezo awehikwa
^ Amalegha aya abya akokotibwe omo mabwe.
^ Erilegha ini bipimo nga bibiri kutse bisatu. Kitokekene ekipimo ky’amaghetse kyabya ebati, eyilingene n’esyolitre 22. Ulebaye endomeko B14.
^ Kutse “iba w’omuheruki.”
^ Kutse “akatale.”
^ Kutse “eribya n’erikirirya omo rina riwe.”
